Read anuak Jeremaya 18 Bible Online

Jeremaya 18 - anuak bible

Jeremaya 18

¹Man beeye dwør Wuuö Jwøk mana caane jïra, a na Jeremaya, ena köö,

²ni «Ö maal ni ciï po ŋat wø cwääö ki dääe; køøre dwøra ocaana jïrï kaace.»

³Køøre aana ci po ŋat wø cwääö ki dääe, ni jooda gø ni cwääö ki dak ni ee cïp bäät thaac.

⁴'Ba dak mana cwääe ko odhöönh aränynyö cere; ni cäŋ gø cwääyö na dak mør mana met yie ki gø.

⁵Køøre dwør Wuuö Jwøk aö bääta, ni kööe,

⁶na «?Aŋø, u na jø Icriel, ba løny jïra ki man tïïa uuni kaa teeŋ gïna tïïc dïcwäc dääe manøgø? Ka adïëri møn, u na jø Icriel, u ena cera ni caala manø ni bëët odhöönhnhi cer dïcwäc dääe enø.

⁷Ki nyi kany mo thiinh løny jïra ki man cääna kiper wï jur ka akwöm nyeya ki man cööda geni wøk ni nyaa geni piny ni raanynya geni.

⁸'Ba ni näk mo jøøa cääna dëëtge ki luubö, cwïnyge løkge løø ni wecge gïïa reyø, aani, cwïnya dwøga piny ki gïna leth na caara ni daa tïïö dëëtge.

⁹Ni aani, ki nyi kany mo thiinh thuwø, løny jïra ki man cääna kiper wï jur ka akwöm nyeya ki man tïïa geni ni teek ni këëlla tietge piny.

¹⁰'Ba ni näk mo ge tïïö ki gïï mo nëëni ni reyø ki jïra, ni dwøra ba wïnyge, aani, gïna beer na caana ni daa tïïö jïge ba tïïa këët.

¹¹«'Ba ennø, ï na Jeremaya en, caan gïn jï jø wø bëëdö Jerucalem, ki jï jø wø bëëdö dï Juuda bäre, ni kööï, ni ‹Mana caan Wuuö Jwøki beeye en: Ka adïëri møn, aani, a kännö bäätu ki gïn mo leth døc, ni beeye acaay ajäla mo teek døc kiperu. 'Ba ennø, ŋati man nø dïïu luu ree ni wec jöör bëëtö mare na raac, ni tïïyu uutjïëth bëëtö mou ki tïïe mou ni beyø.›

¹²'Ba geno köö, ni ‹Bäŋ gïn løny jïwa këët na bäre bäre; waani, wa poot cäädhö køør acaare mowa, ni ö ŋati man nø dïwa ni tïïe ki køør teek wïc mare na öö ki køør rääö mana en cwïnye.› »

¹³Kiper manøgønø, luumma caan Wuuö Jwøki beeye en, ena köö, ni «Pëënynyu wïth juurre, man näk da ŋat mo teeŋ gïn ee wïnynyö. Jø Icriel na caal nyakøø mo dëër dïcwøø poot kuue atïïö ki gïn mo raac døc mo ec thäŋŋö ki gø.

¹⁴?Aŋø, pey wø aay dëët kïte moa en wï Kïn Libaanø? ?A pïï moa ŋec mo wø löönynyi ki bäät kïdi manøgø wø tal?

¹⁵'Ba jiya aana wecge, ni tïmge ni ge wääŋö ki gïn wø jïye ŋwääi ni met jï juu mo oballe; ni ö juugögø ni wëëk tietge cwanynyø yïth uutjïëtha cääŋŋe na cørge yïthge, ni wëëkge ge wääth yïth uutjïëthe moa näk kär ŋeth.

¹⁶'Ba ŋöömö marge oränynyi, ni tïme na gïr abuua na bäre bäre. Ni ö jiyi bëët mo opöödhi ki buute ni thäŋ yïthge, ni putge wïthge keny.

¹⁷Geni, ge keetha keethø nyïm nyïïmänge kaawat man wø tïïc jam wø kwönni ki jï løø kur tuul-cäŋ. Aani, ŋääa løøa baŋge, ni mäna täärnyïma ki geni, kanyo tïme na cäŋ gïna leth na wäŋŋi kiperge.»

¹⁸'Ba jø møøk aköö, ni «Ööu, nøø määnyö ki jöö man raanynyø Jeremaya ki gø. Kiper dïlämme mo wø caan ciik kee nut cøøn, ki jøøa wïthge leer ni wø cïpi ki pwöc, ki nyïïkuk Jwøk mo wø køp luum Jwøk. Ööu nø, nee eni raanynyø ki lëëpø, ni ba ciiø ïthø ki gïn wø caane.»

¹⁹Wui Wuuö Jwøk, cek ïthï ki mara; wïny gïn wø caan jøøa män ki aani.

²⁰?Aŋø, gïn mo beer doo coolø ki gïn mo raac? Par wïïï ki mana cuŋŋa nyïmï kiperge, na cääna ki gïn mo beer na kar dhøkge, kiper nee wëër marï paanyï bäätge. 'Ba ennø, gena kunyö ki buur kipera.

²¹Kiper manøgønø, cïp geni dho opëëllö, ni wëëgï obwöre moge thøø ki käc. Beerra man tïm määrge na määr thuunhnhi, ni bëëtge ni bäŋ obwöre jïge. Beerra man 'näk cwøwge ni thøwge, ni ö wøpe moge moa teek ni 'näk geni ko opëëllö ri leny.

²²Kanyo jääŋŋï jøw oraany paac baŋge ki nyi kany mo thiinh, beerra man put tïmö ni da oduuru mo wïnyö mïëcge, kiper gena kunyö ki buur naa makge, ni cekge abïëp kipera.

²³'Ba ï na Wuuö Jwøk, gïï mo pïï ri thøø na tut jøøgø kipera bëët ŋäyï. Kär bääyö marge uumï, ni ba gööbï raay moge wøk nyïmï. 'Ba beerra man ränyge nyïmï, ni kanyo kööï niï wëër yie, wärï tïïï ki gïn mo leth dëëtge!