Read anuak Jeremaya 19 Bible Online

Jeremaya 19 - anuak bible

Jeremaya 19

¹Man beeye luumma caan Wuuö Jwøki jïra, a na Jeremaya, ni «Ciï ni ŋëëï ki dak baŋ ŋat wø cwääö ki dääe. Ni kädï ki jiy røk jø døøŋŋø ki røk dïlämme moa kwörge døøŋŋø.

²Ni ciï ya agäm-kïdi mana cwøl ni Ben Inöm, na en buut dhi kiir man wø leeŋ abänni yie, ni caanï luummi ni caana jïrï en kaace,

³ni caanï gø nee wïny nyec Juuda, ki jø wø bëëdö Jerucalem, ni kööï, ni ‹Wïnynyu luum Wuuö Jwøk. Mana caan Wuuö Jwøki, Jwø Icriel, eni na wïth jammi bëët, beeye en: Ka adïëri møn, aani, a känna bäät paani ki gïn mo leth, ni ŋat wø wïny gø, cwïnye puta bwøk.

⁴Kiper jiy 'moa aana wecge, ni tïïcge kany na kany wø lamge juu mo wïth juurre yie, ni waaŋge gïn wø jïye ŋwääi ni met jï juu moøgø mo kucge, mo kuc kwäcge, këël nyeye mo Juuda; ni pääŋge kany ki rem jiy mo bäŋ gïn mo ege baaø.

⁵Ni tïïge ki kwör lam jï jwøa cwøl ni Baal, kiper nee wäätge waaŋge no olämme jï Baal, ni beeye gïn mo ge kära köömmö ki man tïïcge gø, na gïn mo kära caanø, na acaac gïnögø bäŋgø mo ö wïïa thuwø.

⁶Kiper manøgønø, da cääŋŋe mo öö, mo kany ba cwøl këët ni Töpeth wala Agäm Kïn Ben Inöm, 'ba ocwøl na Agäm Kïn Kar Ŋaal Jiy.

⁷« ‹Aani, acaare mo jø wø bëëdö Jerucalem ki dï Juuda bäre raanynya raanynyø yi paani, ni cïba geni dho opëëllö nyïm nyïïmän moge, jø wø many jwïëcge. Ni cïba rïŋ dëëtge na cam jï wec maal ki jï lääc paap.

⁸Aani thuwø, pääny man tïïa tïïö nee ränynye, ni tïme na gïr abuua. Ni ö jiy bëët mo wø pöödhi ki buute ni buuge gø ni thäŋ yïthge kiper gïïo leth noo pïï dëër paani.

⁹Jiya otïïa nee ge ciel nyïïmänge dïër, ni ö nyïïmänge, ni beege jø wø many jwïëcge, ni tïïcge bëëtö marge ni leth; ni ö jiya ni camge rïk wäätge ki rïk nyïïge, ni ö geni ni døøge dëëtge keerge ni ö ŋati man nø ni cam rïŋ wati.›

¹⁰«Kanyøgønø, dak wär put gøø piny ni nëënö jï jiy moa aay ki ïïni,

¹¹ni kööï jïge, ni ‹Luumma caan Wuuö Jwøki, eni na wïth jammi bëët, beeye en: Aani, jøøi ii ki pääny man raanynya raanynyø kaamar dak man na gøø piny en ni ba løny ki man dwøgi kare këët. Køøre geno koony Töpeth kany këël kanyo pääŋe ni bäŋ kany kuny yie.

¹²Manøgø beeye gïno tïïa dëër paani en ki dëët jiy mo wø bëëdö yie, ni tïïa pääny man na Jerucalem en kaamar Töpeth.

¹³Uudi mo Jerucalem, ki mo nyeye mo Juuda, otïmö ni ba waany[9] kaamar Töpeth, ni beege uudi bëët moa näk jiy wääŋö bäätge ki gïn wø jïye ŋwääi ni met ni ge lama cäŋ ki dwääy ki ceer, ni kunyge piny bäätge ki muuy mar køøŋø jï juu møøk.› »

¹⁴Køøre Jeremaya aduuö ki Töpeth kanya jääŋŋi ya Wuuö Jwøki yie nee luum Jwøk købe, ni cuŋŋe dï kal mar Øt Wuuö Jwøk ni kööe jï jiy bëët,

¹⁵ni «Luumma caan Wuuö Jwøki, Jwø Icriel, eni na wïth jammi bëët, beeye en, ena köö, ni ‹Ka adïëri møn, aani, gïïa leth bëët na nø caana käla bäät pääny man ki bäät mïëri bëët moa en deŋŋe, kiper wïthge adøøcge mo teek ni kweerge ki man cekge ïthge ki luup 'moa.› »