Read anuak Jeremaya 2 Bible Online

Jeremaya 2 - anuak bible

Jeremaya 2

¹'Ba dwør Wuuö Jwøk aö bääta, a na Jeremaya, ni kööe,

²ni «Ciï ni køpï luummi ni wïnyö jï jø Jerucalem, ni kööï ni luumma caan Wuuö Jwøki beeye en, ena köö, «ni ‹Ï na Icriel[1] ï poot lääŋŋa lääŋŋö ki mana cïpï cwïnyï jïra niï poot thiinh, ki mëër mana mëërï ki aani kaamar dhaagø thiinh, ki mana caathï køøra dï paap bäre, yi ŋöömma näk kär puurö.

³Kar kaaca ïïno cïp kur keerï na mara, a na Wuuö Jwøk, kaamar thwønh bëëlö mara. Ni jøøa cam ïïni bëët akwaan no obääyö, ni pïïc gïï mo lethi bäätge.› Luummögø caana Wuuö Jwøki.»

⁴Wui, u na nyïïkwaac Jeekap, ni beeye u jø dhøk uudi mo jø Icriel bëët, wïnynyu dwør Wuuö Jwøk.

⁵Luumma caan Wuuö Jwøki beeye en, ena köö, na «?Agïnaŋø na raac na joot kwäyu baŋa, ni tïïcge karge ni bäär ki aani, ni putge cäädhö køør juu mo oballe jaak, ni tïmge ni bäŋ karge en?

⁶Geni, ge kär pëëö, ni ‹?Wuuö Jwøk en kaa, na käl øøni wøk ki yi ŋööm Ijep, na bwøth øøni ki dï paap, yïth pwöle mo otal mo ocöötö ki kääk, yi ŋöömma näk yie da meel na kany mo cøl ma kar thøø, yi ŋöömma näk bäŋ ŋat mo cør yie, na näk bäŋ ŋat mo bëëde yie?›

⁷'Ba aani, uuna käla yi ŋöömma beer, nee caammi ki gïïa beyø na en yie bëët nee cammu. 'Ba uuna öö, ni raanynyu ŋöömma, ni tïïyu ŋöömma näk mara na kany mo ec raac ki gø.

⁸Këël dïlämme thuwø, ge kär pëëö, ni ‹?Wuuö Jwøk en kaa?› Jø wø caan tiet ciik a kärge ŋääö, ni ö dïbwöthe ni bääcge dëëra, ni ö nyïïkuk Jwøki ni køpge luup ki nyeŋ jwøa cwøl ni Baal, ni caathge køør juu mo bäŋ gïn duuge.

⁹«Kiper manøgønø, a löö ki uuni, a na Wuuö Jwøk, ni lööa ki nyïïkwaayu.

¹⁰Ennø, kathu løøga ya acuul Caypara, na en jï løø kur pänh-cäŋ, ni neennu bëëtö marge, ni jäägu Këdar, na en jï løø kur tuul-cäŋ, ni raŋŋu bëëtö marge døøc. Neennu geni døøc, man näk da teeŋ gïn tïïyu en mo ege tïïö.

¹¹?Aŋø, da tier paac mo juu moe ee wiilø, këël na bëët juuwi moe ni patha adïëri? 'Ba jiy 'moa, a na näk ajiem marge, aana wiilge kiper juu mo bäŋ gïn duuge.

¹²Wui, ï na maal, beerra man ö yiï ni neethay ki gïnögø, ni thääŋ yiï, ni tïm dëërï ni kwanynyi.

¹³Kiper jiya atïïö ki teeŋ raay ariiø; aana wecge, a na näk jøøro mar pï kwøw, ni kunyge ka aguule kiper dëëtge, na aguule mo laara cöötö ki kääk, mo bäŋ pïï mo mägi yïthge.» Luummögø caana Wuuö Jwøki.

¹⁴«?Aŋø, Icriel a laŋŋø? ?Aŋø, eni nywöli na laŋŋø cøøn? ?Aperŋø nø ni tïm nyïïmänni moe ni manynya eni keda gïn mo di camø en?

¹⁵Nyïïmänne amärö bääte kaamar ŋuuwe, ni märge døc ni döötge ena maal. Paac mare atïïcge ni bäŋ gïn mo odööŋ yie, ni ö päänye moe ni ränyge, ni bäŋ jiy mo bëëdö yïthge.

¹⁶Ni ö jø Mempic ki jø Thapinac ni loonyge eni, ni gwäärge wïïe wøk.

¹⁷?Aŋø, ï na Icriel, gïnögø ba käla ï bäätï keerï ki køør mana weyï aani, a na Wuuö Jwøk, Jwøk marï, kanya bwødha ïïni øtjöö?

¹⁸?'Ba ennø, ciin Ijep agïnaŋø noo duue dëërï, per niï mädhï ki pï naama pïïe cøl? ?A ciin Aciria agïnaŋø noo duue dëërï, per niï mädhï ki pï Naam Upareeti?

¹⁹Rääö marï otïmö ni pwöc jïrï, ni gaan wøk marï ïïno jwøe. 'Ba ennø, neenï døøc, ni ŋäyï gø, ni ki man weyï aani, a na Wuuö Jwøk, Jwøk marï, ni bëëdï niï ba lwär ki aani beeye gïn mo raac, mo duunnö ki räny cwïny.» Luummögø caana Wuuö Jwøki, eni na wïth jammi bëët.

²⁰«Ïïni, ki kany mo bäär ïïna kweer ki man bëënnï aani, a na Wuuö Jwøk, ni kweerï ki man jïëyï ciik 'moa; ni kööï, ni ‹Ï ba daa tïnynyö.› 'Ba ïïni, ïïna bëëdö na kääbi kanya wøørï juu møøk kwör lam moa en bäät thuuri moa bäyö, ki tiet jenni moa no onigïït piny bëët.

²¹'Ba aani, ïïna pïïdha kaamar omøk mo ojierø, mo käla røk köödhi ma liil. ?Aperŋø nø na wiilï bëëtö marï mana bëëdï ki aani ki gø, ni tïmï niï raac kaamar omøk mar paap en?

²²Ennø, këël dëërï diï lwøø ko olew, ni røtï dëërï ki caabuun, bääyö marï poot nëënö jïra kaamar kïdö.

²³?Aŋø, ïïna diï köö nidïï ni dëërï kärï raanynyø, ni kööï niï kär ci køør juu mo wø cøøri ni Baal? Caar wïïï døøc ki jööra caathï ya agäm-kïdi, ni ŋäyï gïna tïïyï. Ï caala nya athïrööl mo wïïe känni ni wø jøøc piny jaak;

²⁴ni ï caala arëën paap mo oŋïyö ki bëët paap, wø ŋwäc jam thwønh kany wø näk dëëre da tïk. ?Aŋa ni maar lønyø jïre ki man män gø ki ciin baŋ thwønh? Ni thwönhi mo wø many gø bäŋ wø ööl; eni wø jootge joodø kany wø päŋ dwääy mare.

²⁵Ï na Icriel, kär dëërï öölï ki wääth køør juu mo oballe, ni ba 'nägï dëërï ki riew. 'Ba ïïna köö, ni ‹Bäŋ gïn løny jïra këët na bäre bäre, kiper a bëëdö naa mëër ki juu mo path, naa poot caatha køørge.›

²⁶«'Ba kaawat man wø tïm wï kuuwi ni laay kany wø maai, wïth jø Icriel olääi, ni beeye geni, ki nyeye moge, ki jø kööre moge, ki dïlämme moge, ki nyïïkuk Jwøk moge,

²⁷jø wø köö jï jaath, ni ‹Ïïna wära,› ni köge jï kïdi, ni ‹Beeye ï na nywøl aani.› Kiper geni ŋäthge aluuge baŋa, ni patha nyïmge. 'Ba kany wø enge yïth gïï mo leth, ge wø köö ki aani, ni ‹Ö maal ni piemï waani!›

²⁸?'Ba u na jø Juuda, age juu mou moa tïïyu kiper dëëtu? Beerra man öge maal, ni näk mo løny jïge ki man piemge uuni kany wø enu yïth gïï mo leth; kiper juu mou thööth ni röömi ki kwään päänye mou.

²⁹«?Aperŋø ni lööu ki aani, a na Wuuö Jwøk en? U bëët, uuna gëëmö ki aani.

³⁰Aana tïïö ki gïï mo leth dëëtu, 'ba bäŋ pwöc mo you wïnynyö; opëëlle mou nyïïkuk Jwøk mou athöörge kaamar ŋuu mo owär.

³¹Wui, u na jø Icriel, wïnynyu luumma, a na Wuuö Jwøk. ?Aŋø, aana bëëdö kaamar paap ki jïïu? ?A aana bëëdö kaamar ŋöömö mo yie da muudhö mo cøl ki jïïu? ?Aperŋø ni kööu, u na jiya, ni ‹Waani, wa bëëdö ki wïthwa jaak, ni wa ba ö baŋï këët›?

³²?Aŋø, nyakøø wïïe wø wïl ki jap mïërö moe? ?A dhaagø thiinh wïïe wø wïl ka abïïk nywöm moe? 'Ba jiya wïthge awïl ki aani ki nïne mo thööth mo ba kwaan.

³³«Ï na Icriel en, wääth køør juu møøk akwanyï kiree, kaamar kääbi mo ŋweeya køør cwøw, niï caala dhaagø m mään moa reyø kwänynyö baŋe.

³⁴Maya thuwø, rem jiy moa can na näk bäŋ gïn mo ege baaø akønynyï piny, ni joot remø marge ra abïï marï, ni jøøgø kärï joodø ni ge turö ki øtø. 'Ba këël na näk mo gïïögø bëët ii tïïö,

³⁵ï wø poot köö, ni ‹Bäŋ gïn mo yaa baaø;› ni kööï, ni ‹Ka adïëri møn, Wuuö Jwøk wëër mare ee paanyø bääta.› 'Ba ennø, ï jääla jäälö kar løøk, kiper na kööï, na ‹A kär bääyö.›

³⁶?Aŋø ni wïïrï yïthakic jiy en, ni wellï uutjïëthe moï en? Wïïï olää jø Ijepi, kaawat mana ö jø Aciria na lääge wïïï.

³⁷Ïïno ö wøk ki Ijep ni ceŋŋï ii kwaa wïïï; kiper Wuuö Jwøk jøøa ŋääthï anø kwiere, niï ba jïti ki bëëtö mo beer baŋge këët.»