Read anuak Jeremaya 20 Bible Online

Jeremaya 20 - anuak bible

Jeremaya 20

¹'Ba kanya ö dïlämi ma Pacuur wär Imër, ŋata bëëdö na wïth jø tïïc mo wø tïïö øt Wuuö Jwøk, na wïny Jeremaya ni køpa luum Wuuö Jwøk,

²eni na Pacuur nyikuŋ Jwøk ma Jeremaya awëëk pöödö, ni wëëk tiet gø kïth yo orøgø na en deŋ dhi kal mar Øt Jwøk mana cwøl ni Benjamen.

³'Ba kanya tïme na amöölla, kanya ö Pacuurri na käl tiet Jeremaya wøk ki yo orøgø, Jeremaya aköö jïre, ni «Nyeŋŋï mana cïp Wuuö Jwøki jïrï patha Pacuur këët, 'ba beeye Magör-Micabip, na näk tiere beeye ni lwär mo dwøŋ piny opääŋe bäre.

⁴Kiper luumma caan Wuuö Jwøki beeye en, ena köö, ni ‹Ka adïëri møn, aani lwär mo dwøŋ jääŋŋa jääŋŋö bäätï ki bäät nyïïawäätï bëët. Geni, geno 'näk nyïïmänni moge ko opëëllö ni nëënö jïrï. Aani, jø Juuda bëët cïba cer nyeny Babiløn, ni ö eni ni 'näk møøk ko opëëllö, ni mak møøk ki tøŋ ni kïth ge Babiløn.

⁵Aani thuwø, jap kwärö mo päänyi en bëët cïba ceŋ nyïïmän moge, ni beege jammi moa jootge ki ri tïïc marge, ki jammi moa perge leth, ki jammi bëët moa perge leth mo nyec Juuda; ni ö nyïïmänni ni twierge japøgø, ni lwørge ge, ni kïthge geni Babiløn.

⁶'Ba ï na Pacuur en, ïïni ki jø wø bëëdö paarï bëët, u di maa ki tøŋ ni kïth uuni Babiløn. Køøre ï thøøa kaace, ni koony ï yie, ni beeye ïïni ki nyïïawäätï bëët moa køpï luum tööt jïge ki nyeŋ Wuuö Jwøk.› »

⁷Wui Wuuö Jwøk, aana cøøgï, aana cøøgï møn. Aana magï ki teek, ni böötï aani. 'Ba ennø, aana tïmö ni jøw ŋeethø bääta ki yïth cääŋŋe bëët, ni jiy bëët buua aani.

⁸Kiper kany wø cääna, a cäänö ni dwøra ena maal døc naa køpa gïr caannø mar jiy ki ränynyö mano tägi. 'Ba luum Wuuö Jwøk akännö bääta ka ajøøŋ ka abuua ki yïth cääŋŋe bëët.

⁹'Ba ni näk maa köö, ni «Nyeŋ Wuuö Jwøk ba mula ki dhaa, ni bäŋ gïn mo caana ki nyeŋŋe këët,» gïno tägi, luumme gwenni cwïnya ni caala maac mo liel, ni aano ööl ki man jwøa gø, ni ba løny jïra ki man kana gø cwïnya.

¹⁰Aani, jiy mo thööth awïnynya ni ge mööŋö ki nyeŋŋa, ni «Kee ena köö, ni ‹Lwär mo dwøŋ, piny opääŋe bäre.› Jäällu eni! Beerra man jäälø eni kiree!» Këël nyïïawääta bëët moa näk yaa ŋäädhö kiree, ge manynya ränynyö mara, ni köge, ni «Kanymør wïïe di maaŋŋø, nee ø jïtö ki jöö man böötø eni ki gø, ni marø cool kwör dëëre.»

¹¹'Ba Wuuö Jwøk ena buuta kaamar oteen tøŋ. Kiper manøgønø, jø wø 'caan aani a ba böötge; 'ba tietge ocwanyge, ni tïm wïthge ni laay døc kiper no ba thur gïna manyge kare, ni wïc ba wïl ki lään wïc marge na bäre bäre.

¹²Wui Wuuö Jwøk, ï na wïth jammi bëët, ï ni wø raŋ jøøa marge beer, ni wø neet cwïny ka acaare, wëëk a neen cool kwör marï mano tïïyï dëëtge, kiper luubö mara yaa cïp cerï.

¹³Wärru jï Wuuö Jwøk nou pwøya eni! Kiper jøøa can wø pieme piemø ceŋ jø wø tïïc gïï mo reyø.

¹⁴Wui, acïëni en bäät cäŋa nywøl aani yie! Beerra man ö cäŋögø na ö mera na nywøl aani yie ni ba gwïëdhi!

¹⁵Acïëni en bäät ŋata caan dwøl jï wära, na tïïc yi wära ni met, ni kööe, ni «Ïïna nyöönni ki nyilaal ma dïcwøø.»

¹⁶Beerra man tïm ŋatøgø kaamar päänye moa raany Wuuö Jwøki, na näk cwïnye käre dwøk piny ki gïrge. Beerra man ö ŋatøgø ni täk gïn mo lethi poge, ni wïny oduuru ka amöölla, ni wïny dwør tuuŋ mar leny ki dhöör cäŋ,

¹⁷kiper a käre nääö yi mera; ni kär yi mera tïmö na bwörö mara ni di yi mera bëëdö ni dwøŋ cooth ki aani.

¹⁸?Aperŋø na öa wøk yi mera, naa jïta ki gïï mo leth ki kïmmö, ni thum cääŋŋe 'moa bëët ni wïïa laay en?