Read anuak Jeremaya 21 Bible Online

Jeremaya 21 - anuak bible

Jeremaya 21

¹'Ba dwør Wuuö Jwøk aö bäät Jeremaya, kanya ö nyeya ma Cëdëkiya na jääŋ Pacuur o Malkiya ki dïlämi ma Jepaniya o Maycëya baŋe. Ni köge jïre,

²ni «Beerra man pëënynyï Wuuö Jwøk kiperwa, kiper Nabukedenecör nyeny Babiløn amäänynyö baŋwa. Kanymør Wuuö Jwøk ø pieme piemø ki køør tïïe moe na näk rëëma ec, kiper nee nyïïmän døøge ŋäthge.»

³Køøre dwør Wuuö Jwøk mana ö bäät Jeremaya acaane jïge, ni kööe, ni «Caannu jï Cëdëkiya, ni kööu,

⁴ni ‹Luumma caan Wuuö Jwøki, Jwø Icriel, beeye en: Ennø, aani, tøøŋi moø ni en ceŋŋu yøø 'dwøga dëëtu, ni beege tøøŋi moøgø ni këëdu ki nyeny Babiløn ki ge yøø ki jø leny moe, ni bëëdö ni kiir maru ege ciel dïër yøø; aani, ge käla ka yi pääny man.

⁵Ni ööa ki dëëra ni rwiea cera bäätu ki køør teek bada, ni këëda ki uuni ni aano wëër ki wëër mo dwøŋ mo liel kaamar maac.

⁶Aani thuwø, jiy ki lääy mo wø bëëdö yi pääny man nääa nääö, ni thøwge ki täw mo leth døc.

⁷Køør manøgønø, gïno tïïa, a na Wuuö Jwøk, Cëdëkiya nyeny Juuda, ki jø kööre moe, ki jiy mo odööŋ ni kwøw yi pääny man, no obøth ki täw ki leny ki käc, cïba cer Nabukedenecör nyeny Babiløn, ki ceŋ nyïïmän moge, jø wø many jwïëcge. Ni ö Nabukedenecörri ni 'näk geni ko opëëllö. Eni cwïnye ba dee bäädhö ki geni, ni cwïnye ba doo pädhö ki gïrge, ni yie ba dee warø ki geni.› »

⁸Ni ö Wuuö Jwøki ni cäŋ köö jïra, ni «Caanï jï jø päänyi en, ni ‹Luumma caan Wuuö Jwøki beeye en: Ennø, jöör kwøw ki jöör thøø acïba nyïmmu.

⁹Ŋato bëëdö yi pääny man thøw ki käc ki täw mo leth, ni nääi ko opëëllö. 'Ba ŋato aa wøk ni cïp cere jï jø Kaldia moø ni u ege ciel dïër yøø, eni kwøw, ni bøth jwïëyi moe.

¹⁰Kiper a na Wuuö Jwøk, wïïa yaa nø këël ri päänyi ki man tïïa ki gïn mo leth dëëre, ni patha gïn mo beer. Päänyi en 'cïba cer nyeny Babiløn, ni ö eni ni waaŋ gø.›

¹¹«Ni kööï jï jø dhi øt nyeny Juuda, « ‹Wui, u na jø dhi øt Deebit, wïnynyu luum Wuuö Jwøk. Luumma caan Wuuö Jwøki beeye en: Ŋøllu luup cooth na karge, ni kønynyu jiy mo wø japge møt ceŋ jø wø caan geni. 'Ba ni näk mo ba tïïyu, nou tïïya tïïe mo reyø, wëër mara ni wø liel ni wääŋö kaamar maac mo ba løny ki bïp 'käla bäätu.› »

¹³Wuuö Jwøk acäänö ki luubö dëët jø Jerucalem, ni kööe, «U ni wø bëëdö kany mo ociel kïdi dïër ya apany thuur, aani, mara caana caanø dëëtu, u ni wø köö, na ‹?Aŋa noo ö baŋwa kany nee këëde ki waani, na aŋa noo duny kar bëëtö marwa?›

¹⁴'Ba a na Wuuö Jwøk, u jääla jäälö ki køør tïïe mou na reyø, ni waaŋa paan dwøŋ maru ki maac ni ö gïïo en lage bëët ni thööri ya maaci.»