Read anuak Jeremaya 22 Bible Online

Jeremaya 22 - anuak bible

Jeremaya 22

¹Man beeye dwøl mana caan Wuuö Jwøki, ena köö, ni «Ci paan dwøŋ po nyeny Juuda ni caanï luummi en kaace,

²ni kööï, ‹Wui, ï na nyeny Juuda, ï na läw bäät wäl Deebit, wïny luum Wuuö Jwøk, ïïni ki jø kööre moï bëët, ki jiy moï mo wø cäädhi ki dhøk kal man.

³Luumma caan Wuuö Jwøki beeye en: Ŋøllu luup na karge ki jöö ma adïëri, ni kønynyu jiy mo wø japge møt ceŋ jø wø caan geni. Käru bääyö dëër jur mo bëëdö dïïu, ki kïïc, ki cï thøø, ni ba tïïu ki gïï mo reyø dëëtge, ni ba kønynyu rem jiy piny kany, mo bäŋ gïn mo ege baaø.

⁴'Ba ni näk mo gïï ii tïïyu tïïö na adïëri, nyeye moo läw bäät wäl Deebit paan dwøŋ kany, ocäädhi ki dhøk kal man, ni ge cäädhi ka jïëthe mo wø tut okwëënyi, ki bäät okwëënyi, ni nyeya man nø cäädhi ka jø kööre moe ki jiy moe.

⁵'Ba ni näk mo luumma ba wïnynyu, a na Wuuö Jwøk, a puta kööŋ ŋëëta keera, ki man räny paan dwøŋŋi man na bäre.›

⁶«Kiper luumma caan Wuuö Jwøki kiper paan dwøŋ man mar nyeny Juuda beeye en: «Ï na paan dwøŋ en, këël na bëëdï jïra niï beer kaamar ŋööm Gelät, niï mïërö kaamar wï Kïn Libaanø, ka adïëri man, aani, ï tïïa tïïö kaamar paap ma tëën, ni tïïa ïïni kaamar päänye mo ba beet.

⁷Aani, jøw oraany ïïni jääŋŋa jääŋŋö baŋï, ni ŋati man nø cere da jap leny moe; ni öörge jer geer moï wøk moa beyø, ni leeŋge geni yi maac.

⁸«'Ba wïth juurre mo thööth moo pöödhi ki buut pääny man, ŋati man nø oköö jï wati, na ‹?Aperŋø na ö Wuuö Jwøki na tïïc gïn na leth dëër päänyi ni dwøŋ en?›

⁹Køøre oløkge, ni ‹Beeye kiper mana ö jø päänynyi man na wecge luumma tuut Wuuö Jwøki, Jwøk marge, ni wøørge juu møøk ni tïnyge geni.› »

¹⁰Kär nou jwöŋö kiper Jöcaya, nyeya mana thøw, ni ba kïmmu kipere; 'ba jwöŋu ni yïthu you keeyø kiper Jeyöakac, nyeya mana mak ki tøŋ na käl, kiper eni ba duui këët, ni ŋööm poge ba neene.

¹¹Kiper luumma caan Wuuö Jwøki kiper Calum[10] o Jöcaya nyeny Juuda, ŋata läw kar wänni ma Jöcaya na nyeya, na mak ki tøŋ na käl, beeye en, ena köö, ni «Calum ba duu kany këët na bäre bäre.

¹²'Ba eno thøø kanyo kïth eni yie ni eni mak ki tøŋ, ni ŋöömmi en ba cäŋ neennø këët.»

¹³Wuuö Jwøk aköö, no «Otïmö ni raac jï ŋat wø geer øt nyec mare ni jø tïïc ee mødø, ni gëët bäät ødøgø ki øtø mør ni jø tïïc ee caarø, ŋat wø wëëk jiy tïïc jaak, ni bäŋ gïn coole jïge kiper tïïc marge;

¹⁴ŋat wø köö, ni ‹Dëëra gëënna gëënnö ki øt nyec mo dwøŋ døc, mo bääte yaa gëënnö ki øtø mo yïthe døøŋŋø, ni kïtha dëëre ki uut awëërnyeŋŋi mo thööth, ni tïïa gø ni mïërö ko opämi mo beyø, ni rwødha gø ki booya mo kwaar.›

¹⁵«?Aŋø, ii caarø ni nyec marï beeye kiper mana geerï øt nyec marï ko opämi mo beyø mo thööth niï kaatha ceŋ jø møøk? Aŋø, wäru kera abëëdö ni cämö ni mädhö, ni tïïc tïïc mana näk kare na näk adïëri, ni bëët jammi bëët ni beyø jïre.

¹⁶Eni kee luup jøøa no ocaarø ki luup jøøa can aŋøle na karge, ni bëët paaci bäre na wøp. ?Aŋø, ki man ŋäc aani, a na Wuuö Jwøk, paa beeye ki man tïïc teeŋ tïïe moøgø nø?

¹⁷'Ba ïïni, waŋï ki cwïnyï wø ena køør jammi mo wø jöötï ki jïëth atade, ki køny rem jiy piny mo bäŋ gïn mo ege baaø, ki 'caar jiy ki thiel jiy piny.»

¹⁸Kiper manøgønø, mana caan Wuuö Jwøki kiper Jeyöakëm o Jöcaya nyeny Juuda beeye en, ena köö, ni «Jiy ba doo jwöŋö kipere kanyo thøøe, ni ge köö yïthakicge keerge, ni ‹Wui coka! Wui coka!› Ni jiy ba doo jwöŋö kipere, ni ‹Wui nyenywa öy! Wui nyenywa, ï na nyeny ajiem marwa!›

¹⁹'Ba eno kïth wøk kaamar arëën mo othøw, ni tïïc ni di tuudö ni leeŋi wøk ŋää kiir Jerucalem.»

²⁰«U na jø Jerucalem, u cøøa bäät Kïn Libaanø ni gööu ko oduuru, ni cou Baacan ni jwöŋu ni döötu ena maal, ni cou bäät Kïn Abarim thuwø ni gööu ko oduuru, kiper wïth juurre moa mëërru ki geni na dwätu ki geni bëët ge di raanynyø.

²¹Uuna köömma kanya bëëdu ni bëëtö maru jööt jaak, 'ba uuna köö, ni ‹Marï ba wïnywa!› Manøgø beeye bëëtö maru cøøn ki mana täge ki kanya täk paac yie, ni dwøra ba wïnynyu.

²²Dïbwöthe mou bëët onikeet kaawat man wø tïïc jame, ni ö wïth juurre moa mëërru ki geni na dwätu ki geni ni maai ki tøŋ. Køøre wïthu otïmö ni laay, ni tïm nyeŋŋu ni law, kiper gïïa reyø bëët na tïïyu.

²³U na jø Jerucalem, u ni wø bëëdö yïth uudi mo beyø, mo geer ka jer lur Libaanø, a teeŋ cooyø mo nyïëdi nou cooyu ki gø kanyo ö räämmi bäätu, ni beeye rääm mo caala mar dhaagø mo ree da mäc lwaar.»

²⁴Wuuö Jwøk akööŋ ŋëëte keere, ni kööe jï Jekönaya[11] wär Jeyöakëm, nyeny Juuda, ni «Këël doo na ï bëëdö kaamar ogut lweedø man ni pere leth ni cer cwïïa en, ï daa käla wøk.

²⁵Ïïni, ï cïba ka ceŋ jø wø many jwïëy moï, jø wø lwäärï ki geni, ni beeye Nabukedenecör nyeny Babiløn ki jiye ma jø Kaldia.

²⁶Ïïni ki meru na nywøl ïïni, u leeŋa paac mør, kany mou ba nywølla yie, ni thøwu kaace.

²⁷'Ba yi ŋöömö mano manynyu ki cwïnynyu, u ba duu yie këët.»

²⁸Ennø, nyenøgø na Jekönaya enø, atïmö ni caala dak mo othøw mo pere ba leth, na dak mo bäŋ ŋat mo many gø këët, ni beeye na wet eni ki wääte en, ni leeŋ geni yi ŋöömö mo kucge.

²⁹Wui ŋöömmi en, wui ŋöömmi en, wui ŋöömmi en! Wïny dwør Wuuö Jwøk!

³⁰Mana caan Wuuö Jwøki beeye en, ena köö, «Göör nyeŋ Jekönaya piny na dhaanhø mo kee bäŋ wïïe mo ee nywølø, na dhaanhø mo bëëtö mare ba bëënynyi ki yïth nïr kwøw moe; kiper ki røk jiy moo käl dëëre, bäŋ dhaanhø mo bëënynyi, ni bäŋ dhaanhø mo pï piny bäät wäl Deebit, ni bäŋ dhaanhø mo käär jø Juuda.»