Read anuak Jeremaya 23 Bible Online

Jeremaya 23 - anuak bible

Jeremaya 23

¹Wuuö Jwøk aköö, no «Otïmö ni raac jï dïkwääye mo wø raany jiy 'moa ni keethge geni, ni beege jiy mo wø kwaaya kaamar pïïth dïëk 'moa.»

²Kiper manøgønø, luumma caan Wuuö Jwøki, Jwø Icriel, kiper dïkwääye mo wø käär jiye beeye en, ena köö, ni «Uuni, jiya na caal pïïth dïëk 'moa akeethu, ni riemu geni wøk, ni ge käru gwøø. Ennø, a na Wuuö Jwøk, a känna bäätu ka ajäla kiper tïïe mou na reyø.

³'Ba aani ki dëëra, jiya moa näk odööŋ ni kwøw ni caal pïïth dïëk 'moa, lema lemø yïth mïëri bëët moa riema geni yïthge, ni duua geni kar bëëtö marge, ni ö geni ni nyöötge ni nyaacge.

⁴Ni mooa geni ki dïkwääye mo käär geni, ni ge ba lwäyi këët, ni ge ba bööi, ni bäŋ aciel mo rwäänyi rege.» Luummögø caana Wuuö Jwøki.

⁵Wuuö Jwøk aköö, ni «Ka adïëri møn, da nïne mo öö, maa tïŋŋa maal ki ŋat mo mare beeye adïëri, na ŋat mo tïmö na lwiidhø mo käla ri dhi øt Deebit, ni ö ŋatøgø ni bëëde ni nyeya, ni käär paac ni wïïe leer, ni luup ŋøle na karge ni tïïya adïëri yi paac.

⁶'Ba ki yïth nïr nyec moe jø Juuda di piemø, ni ö geni na jø Icriel ni bëëtge ni geno nikwak. 'Ba man beeye nyeŋŋe mano cwøl eni ki gø, ni ‹Wuuö Jwøk beeye tier bëënynyö marø.›

⁷«Kiper manøgønø, mana caan Wuuö Jwøki beeye ni da nïne mo öö, mo jiy ba kööŋ këët, ni ‹Ŋëët Wuuö Jwøk, Jwøa kwøw, na käl jø Icriel wøk ki Ijep,›

⁸'ba geno kööŋ, ni ‹Ŋëët Wuuö Jwøk, Jwøa kwøw, na käl jø Icriel wøk ki paana en jï løø wï-piny, ni duu geni ki mïëri bëët moa riem geni yïthge.› Køøre geno bëëdö yi ŋöömö marge.»

⁹'Ba kany wø caara bëët nyïïkuk Jwøk, cwïnya puta pädhö døc, ni tïm dëëra ni kwanynyi. Aana tïmö naa caala dhaanhø moo meer moo bööt køøŋe, kany wø cäda kiper Wuuö Jwøk, ki luup moe na en kur keerge.

¹⁰Kiper paac päŋ ki jø luui, ni tïm ŋøømmi ni kïmmö ki køør acïëni mana pïï bääte, ni ö kwör kwaathi bëët moa en paap ni talge. Nyïïkuk Jwøk jöör bëëtö marge raac, ni teek marge tïïcge ka jöö mo patha kare.

¹¹Wuuö Jwøk aköö, ni «Nyïïkuk Jwøk ki dïlämme bëët bëëtö marge araanyge; këël ki yi øtø mara kiree, gena jooda ni ge tïïö yie ki gïï mo reyø.

¹²«Kiper manøgønø, jöörge otïmö ni da adipøødha yie mo ceeya tietge, ni cöör geni wøk yi muudhö, ni päthge yie; kiper a kännö bäätge ki gïn mo leth yi cwiino jääla geni yie.» Luummögø caana aani, a na Wuuö Jwøk.

¹³«Mør thuwø, gïn mo raac ajooda baŋ nyïïkuk jwøk mo Cameria; luup akøpge ki nyeŋ jwøa cwøl ni Baal, ni ge løøa wïth jiya wøk ma jø Icriel.

¹⁴'Ba aani, gïn mo raac døc mo ec thäŋŋö ki gø ajooda baŋ nyïïkuk Jwøk mo Jerucalem; ni ge tïïya tïï luui, ni ge bëëdö ni ge caatha køør luup tööt; ge bëëdö ni ge wëëga bäät jø wø tïïc gïï mo reyø tëënnö, nee bäŋe ŋat mo wec tïïe moe na reyø. Ni put jø Jerucalemmi bëët tïmö kaamar jø Cødam ki jïra, ni tïmge thuwø kaamar jø Gømöra.[12]

¹⁵«Kiper manøgønø, mana caana, a na Wuuö Jwøk, Jwø wïth jammi bëët, kiper nyïïkuk Jwøk moøgø beeye en: «Ka adïëri møn, aani, ge caama caamø ki lweet jaath mo keec, ni maadha geni ki pïï mo ree da cïm; kiper bëëtö mo raac anyaay paac bäre, ni tägi ka baŋ nyïïkuk Jwøk mo Jerucalem.»

¹⁶Man beeye mana caan Wuuö Jwøki, Jwø wïth jammi bëët, ena köö, ni «Kär nou wïnynya luup nyïïkuk Jwøk moø ni køp luup yøø jïïu. Geni, ge pääŋa cwïnynyu jaak ki luup ŋäädhe mo oballe; luup moøgø ni carge yøø käla wïthge keerge, ni patha moa cur dhi Wuuö Jwøk.

¹⁷Ge wø köö cooth jï jø wø kwier dëëra, ni ‹Luumma caan Wuuö Jwøki beeye nou jïtö ki bëëtö mo beer;› ni köge jï jø wø cäädhi ki køør teek wïc mana öö ki køør rääö mana en cwïnyge, ni ‹Bäŋ gïn mo leth mo pïï bäätu.›

¹⁸«?'Ba aŋa nø na bëëdö wï maac mara, a na Wuuö Jwøk, nee luum Wuuö Jwøk raŋe døøc ni wïny gø? ?Na aŋa na cek ïthe na wïny luumma?

¹⁹'Ba ennø, wëër mar Wuuö Jwøk öö bäät jøøa reyø kaamar atuunna, ni beeye atuunna mo teek døc mo raanynya geni.

²⁰Wuuö Jwøk ba døø ŋääe ki wëër mare këël mano tïïc mana en cwïnye ni wëëk gø thur kare. 'Ba kanyo täk gïïögø ya aŋuun nïne, tiere ojootu na kare.

²¹A na Wuuö Jwøk, nyïïkuk Jwøk moøgø, ge kära jääŋŋö, 'ba gena aay ki wïthge keerge jaak; naa kär cäänö ki geni, 'ba luup køpge ka wïthge keerge.

²²'Ba doo na geno bëëdö wï maac mara, a na Wuuö Jwøk, luup 'moa dege købø jï jiya, ni dege jiya duu wøk ki yïth uutjïëth raay moge, ki tïïe moge na reyø.

²³«?Aŋø, a na Wuuö Jwøk, aana Jwøk mo kara cään ka u keeru, naa patha Jwøk mo ena bäät piny bäre?

²⁴?Aŋø, løny jï dhaanhø ki man kan ree kwör mo kuc, nee eni ba jooda, a na Wuuö Jwøk? ?Aŋø, a na Wuuö Jwøk, maal ki piny patha yaa pääŋö bäre?

²⁵«Aani, gïïa car nyïïkuk Jwøki mo wø køp luup tööt ki nyeŋŋa awïnynya ni ge köö, ni ‹Aana lägö, aana lägö.›

²⁶?Aŋø, a këël kany mo nyïëdi nø noo bëët gïïögø ni poot ena cwïny nyïïkuk Jwøk moi na tööte ii, jø wø car jap cwøk moa en cwïnyge keerge?

²⁷Ki jïge ege caarø ni ki køør lääk mo wø carge yïthakicge ni wïth jiya wïl ki nyeŋŋa, kaa mana wïl wïth kwäcge ki nyeŋŋa ki køør mana wøørge Baal.

²⁸Beerra man ö nyikuŋ Jwøki mana lägö ni caan gø ni beeye lääk mare keere, 'ba beerra man ö nyikuŋ Jwøki mano wïny luumma ni caan gø na kare. ?Aŋø, lethø pere wø leth kaamar beel?

²⁹?Aŋø, a na Wuuö Jwøk, luumma ba caal maac, ni caal guduum man wø tøk kïdi na thäŋi?

³⁰«Kiper manøgønø, ka adïëri møn, a na Wuuö Jwøk, mara caana caanø dëët nyïïkuk Jwøk mo wø kwaal luup yïthakicge keerge, ni tïïcge ge ni beege luup 'moa.

³¹Ka adïëri møn, a na Wuuö Jwøk, mara caana caanø møn dëët nyïïkuk Jwøk moøgø mo wø car luup ki lëëpge jaak, ni wø köö, ni ‹Man beeye luumma caan Wuuö Jwøki.›

³²Ka adïëri møn, a na Wuuö Jwøk, mara caana caanø dëët nyïïkuk Jwøk mo wø car lääk jaak mo bäŋ tietge jï jiya, ni løøge wïth jiya wøk ki køør tööt ki diwaŋ marge; 'ba ge kära jääŋŋö, ni ge kära köömmö, ni bäŋ gïn mo thiinh mo ege kønyø ri jiy moi.

³³«'Ba kanyo ö dhaanhe acielli røk jøøi ii, wala nyikuŋ Jwøk, wala dïlämi noo pëëny ïïni, ni ‹?Da dwør Wuuö Jwøk mana caal tëër mo iï wïnynyö?› køøre wär put løk jïge, ni ‹Wuuö Jwøk aköö, ni u ki dëëtu, beeye u na tëër bääta; 'ba aani, u 'leeŋa piny.›

³⁴'Ba ni näk da nyikuŋ Jwøk wala dïlämi wala dhaanhø mør mo cäänö jaak kiper dwør Wuuö Jwøk mana caal tëër, ŋatøca jääla jäälö ki paare bäre.

³⁵'Ba man tïmö ni beeye gïno caan ŋati man nø jï wati ki jï tuuŋge, na ‹?Agïnaŋø na løk Wuuö Jwøki? ?Agïne na caan Wuuö Jwøki?›

³⁶'Ba u tïmö nou ba cäänö këët kiper dwør Wuuö Jwøk mana caal tëër, kiper ŋato cäänö, luubö mare otïmö na tëër bääte, kiper mana daaŋŋu luup Jwøa kwøw, Jwøk maru, eni na wïth jammi bëët.

³⁷'Ba man beeye mano caannu jï nyikuŋ Jwøk, na ‹?Agïnaŋø na løk Wuuö Jwøki jïrï? ?Agïne na caan Wuuö Jwøki?›

³⁸'Ba ni näk mou cäänö jaak kiper dwør Wuuö Jwøk mana caal tëër, këël na bëëde ni aano jääk baŋu ki dwøl ni käru cäänö kiper dwør Wuuö Jwøk mana caal tëër,

³⁹ennø, u tïŋa maal ni riema uuni wøk nyïma, ni raanynya pääny mana cïba jïïu ki kwäyu.

⁴⁰Ni känna bäätu ka ajøøŋ mo bëëdö na bäre bäre, ki law waŋ mo wïc ba wïl ki gø na bäre bäre.»