Read anuak Jeremaya 24 Bible Online

Jeremaya 24 - anuak bible

Jeremaya 24

¹'Ba kanya nø ö Nabukedenecörri nyeny Babiløn na nø mak Jekönaya wär Jeyöakëm nyeny Juuda, ki jø kööre mo Juuda, ki rëëmme, ni maae Jerucalem ki tøŋ ni nø kïth geni Babiløn, Wuuö Jwøk anyuuthö jïra ko orööge ariiø mo päŋ ki nyïïolämmi mo ocïp piny nyïm Øt Wuuö Jwøk.

²Oröögö aciel yie da nyïïolämmi mo beyø døc, mo caala mo wø kwøŋ ciek. No oröögö maya yie da nyïïolämmi mo reyø døc mo ba løny ki cam kiper mana näk mo geno kwäk.

³Køøre Wuuö Jwøk aana pëënynye, ni kööe, ni «?Jeremaya, agïnaŋø ni neetï enø?» Ni dwøga gø jïre, ni «Beege nyïïolämmi, nyïïolämmi moa beyø, beyø døc; 'ba nyïïolämmi moa reyø, reyø døc, ni ba løny ki cam kiper mana näk mo geno kwäk.»

⁴Køøre dwør Wuuö Jwøk aö bääta, ni kööe,

⁵ni «Man caana, a na Wuuö Jwøk, Jwø Icriel beeye en: Aani, jø Juuda moa riema wøk ki yi ŋöömmi en na mak ki tøŋ na kïth yi ŋööm jø Babiløn, ge raŋa raŋø ni beyø ni caala nyïïolämmi moi ni beyø ii.

⁶Ni neeta geni ki waŋ mo beer, ni duua geni yi ŋöömmi en, ni tïïa geni ni teek, ni ba nyaaa geni piny këët. 'Ba tietge okëëlla piny, ni ba cööda geni wøk këët.

⁷Aani, ge mooa mooø ki cwïny mo løny ki man ŋäcge aani ni beeye aani na Wuuö Jwøk; ni bëëtge ni gena jiya, ni bëëda ni aana Jwøge, kiper ge duua baŋa ki cwïnyge bäre.

⁸«'Ba a na Wuuö Jwøk, Cëdëkiya nyeny Juuda, ki jø kööre moe, ki jø Jerucalem moa no odööŋ ni kwøw yi ŋöömmi en, ki mo wø bëëdö Ijep, kwiera kwierø kaamar nyïïolämmi moi ni reyø ii, na kwier ki cam kiper mana näk mo geno kwäk.

⁹Ni tïïa geni nee tiet mïëri bëët mo bäät piny tïmge ni cwïnyge böö ki gïno tägi dëëtge, ni tïmge na jiy mo reyø ki jïge, ni tïmge na gïr ajøøŋ, na gïr aŋaada, na gïr abuua, na gïr acïëni kwöro riema geni yïthge bëët.

¹⁰Aani, mänye ki käc ki täw mo leth jääŋŋa jääŋŋö bäätge, këël mano thumge ki thøø yi ŋöömma cïba jïge ki kwäcge.»