Read anuak Jeremaya 26 Bible Online

Jeremaya 26 - anuak bible

Jeremaya 26

¹Man beeye dwøl mana caan Wuuö Jwøki kanya täk Jeyöakëmmi o Jöcaya ki man bëëde ni ena nyeny Juuda,

²Wuuö Jwøk aköö, ni «Cuŋŋï dï kal mar øtø mara, ni caanï luummi en jï jiy bëët mo wø bëëdö yïth päänye mo Juuda, mo wø ö baŋ lam yi øtø mara, ni beege luup moa caana jïrï bëët nee caanï jïge, ni bäŋ luubö aciel mo weyï.

³Kanymør ni wïnyge wïnynyö, ni ö ŋati man nø ni wec uutjïëth tïïe moe na reyø; køøre cwïnya dwøga piny ki man ba tïïa gïna leth na caara ni daa tïïö dëëtge kiper raay moa tïïcge.

⁴Ni man beeye mano caanï jïge, ni ‹Mana caan Wuuö Jwøki beeye en: Ni näk mo dwøra ba wïnynyu, ni ba caathu køør ciik 'moa, moa cïba jïïu,

⁵ni ba wïnynyu luup mo jiya ma nyïïkuk Jwøk mo wø jääŋŋa baŋu cooth, kaawat man wø bëëdu ni luupge ba wïnynyu cooth,

⁶aani, øtø man na mara en raanynya raanynyø kaamar øtø mara mana raanynya Cëëlö, ni tïïa pääny man en na gïr abuua ki jï wïth juurre bëët mo bäät piny.› »

⁷'Ba dïlämme ki nyïïkuk Jwøk ki jiy bëët dwør Jeremaya awïnyge ni cara luupögø yi Øt Wuuö Jwøk.

⁸'Ba kanya løny Jeremaya ki caan luupögø jï jiy bëët, ni beege luup bëët moa ö Wuuö Jwøki na kööm eni ki gø nee caane, ena mak dïlämme ki nyïïkuk Jwøk ki jiy bëët, ni köge, ni «Ï thøw kiree!

⁹?Aperŋø ni køpï luupi ii ki nyeŋ Wuuö Jwøk, ni kööï, ni ‹Øt Wuuö Jwøk man ränynyö kaamar Øt Wuuö Jwøk mana ränynyö Cëëlö, ni ö päänynyi man en ni ränynye ni tïme ni bäŋ ŋat mo bëëdö yie këët›?» 'Ba kanyøgø jiy bëët rege acooŋge lak Jeremaya yi Øt Wuuö Jwøk.

¹⁰'Ba kanya ö jø Juuda moa kwörge døøŋŋø na wïnyge gïïa tägö yøø, gena öö ki paan dwøŋ ni cige Øt Wuuö Jwøk, ni pïge piny kar acooŋa dhi kal mar Øt Wuuö Jwøk mana cwøl ni Dhi Kal Mana Nyään.

¹¹Ni ö dïlämme ki nyïïkuk Jwøk ni köge jï jøøa kwörge døøŋŋø ki jiy bëët, ni «Nyeni en, mare ŋøl yi thøø, kiper gïï mo reyø akøbe dëër pääny man, kaawat mana wïnynyu gø ki ïthu.»

¹²'Ba Jeremaya acäänö ki jøøa kwörge døøŋŋø bëët ki jiy bëët, ni kööe, ni «Wuuö Jwøk aana jääŋŋe nee luup moa wïnynyu bëët yøø køba dëër Øt Wuuö Jwøk man en ki päänyi en.

¹³'Ba ennø, tiirru jöör bëëtö maru ki tïïe mou, ni wïnynyu dwør Wuuö Jwøk, Jwøk maru; køøre Wuuö Jwøk cwïnye odwøk piny, ni ba tïïc gïna leth na caane ni dee tïïö dëëtu.

¹⁴'Ba ennø, a ena ceŋŋu; gïna caarru ni beer na näk beeye adïëri ki jïïu, tïïyu dëëra.

¹⁵'Ba ka adïëri møn, ni näk maa you nääö, wär ŋäyu nou käla kwör dhaanhø mo bäŋ gïn mo ee baaø bäätu, u ki dëëtu, ki bäät päänyi en, ki jiy mo wø bëëdö yie. Kiper ka adïëri møn, aana jääŋ Wuuö Jwøki baŋu nee luupi bëët ii caana jïïu nee wïnynyu.»

¹⁶'Ba jøøa kwörge døøŋŋø ki jiy bëët aköö jï dïlämme ki nyïïkuk Jwøk, ni «Ŋati en mare ba doo ŋøla yi thøø, kiper ena cäänö jïïø ki nyeŋ Wuuö Jwøk, Jwøk marø.»

¹⁷'Ba jiy møøk røk jø døøŋŋø mo paac aö maal ni cäänge jiy moa en ya acooŋa bëët, ni köge,

¹⁸ni «Mikiya nyï Mörëcëth dwør Jwøk akøbe yïth nïra beet Edhekaya ni ena nyeny Juuda; ena cäänö ki jø Juuda bëët ni kööe, ni ‹Luumma caan Wuuö Jwøki, eni na wïth jammi bëët beeye en: « ‹Dhayan na näk Jerucalem oränynyi, ni puuri na pwöth jaak, ni ö thuurri mana näk Øt Jwøk ogeer bääte ni tuue ka abuŋŋe.›

¹⁹?Aŋø, Edhekaya nyeny Juuda ki jø Juuda bëët Mikiya anäkge na bëëde? ?Aŋø, Edhekaya kär lwäyö ki Wuuö Jwøk, ni bëëde ni kwaaya Wuuö Jwøk, ni ö Wuuö Jwøki ni dwøk cwïnye piny ki man ba tïïc gïna leth na caane ni dee tïïö dëëtge? 'Ba ennø, ø käla gïn mo raac døc bäätø.»

²⁰Da dhaanhø mør thuwø mo luup ee købø ki nyeŋ Wuuö Jwøk, ni ŋatøce beeye Uria o Cemaya nyï Kiriat-Jeerim. Eni luup gïïo tägi dëër päänyi ki dëër ŋöömmi en akøbe, ni beege luup mo caala moa køp Jeremaya yøø.

²¹'Ba kanya ö nyeya ma Jeyöakëmmi ki jø leny moe bëët moa teek, ki jiy moe bëët moa kwörge døøŋŋø na wïnyge luup moa køp Uria, nyeya acädö ki man 'näk Uria. 'Ba kanya wïnynyi ya Uria, ena lwäyö ni päär wøk ni reŋ Ijep.

²²Køøre nyeya ma Jeyöakëm ajääk Ijep ki jiy, ni beege Elnathan wär Akbör ki jiy møøk.

²³Ni øømge Uria Ijep, ni kälge eni baŋ nyeya ma Jeyöakëm, ni ö Jeyöakëmmi ni 'näk gø ko opëëllö, ni leeŋ dëër gø kany wø koony jiy møga jaak yie.

²⁴'Ba gïna tägö kiper Jeremaya, Akikam o Capan odwätö ki Jeremaya; køøre Jeremaya kär cïp ceŋ jiy nee 'näk.