Read anuak Jeremaya 27 Bible Online

Jeremaya 27 - anuak bible

Jeremaya 27

¹Man beeye dwøl mana caan Wuuö Jwøki jïra, a na Jeremaya, kanya täk Cëdëkiya ö Jöcaya ki man bëëde ni ena nyeny Juuda.

²Wuuö Jwøk aköö jïra, ni «Tïïï ki jaath mo caala jaath puur man wø twöö ŋut rwaath ki kaae, ni kïthï gø ŋutï.

³Ni jääŋŋï dwøl baŋ nyeny Ëdöm, ki nyeny Möap, ki nyeny Amön, ki nyeny Tayar, ki nyeny Caydan, ni jääŋŋï ka jøøa jääŋŋi na ö Jerucalem baŋ Cëdëkiya nyeny Juuda.

⁴Ni köömmï geni nee cige baŋ nyeye moge, ni köge, ni ‹Mana caan Wuuö Jwøki, Jwø Icriel, eni na wïth jammi bëët, nee caannu jï nyeye mou beeye en:

⁵Aani, piny ki jiy ki lääy moa en bäät piny acwääa ki køør teek bada na dwøŋ, ni løny jïra ki man cïba gø jï ŋata met yia ki gø jaak.

⁶'Ba ennø, mïëri mou bëët anø cïba cer Nabukedenecör nyeny Babiløn, eni na en cera, ni mëëga lääc paap eni thuwø ni bëëtge ni ge ena cere.

⁷Ni ö wïth juurre bëët ni bëëtge ni gena laaŋe moe, eni ki wääde, ki nyikwaare, këël mano päŋ cwiiri moa kwaan kiper akwöma mare. Køøre wïth juurre mo thööth ki nyeye mo døøŋŋø eno tïïcge na laŋŋø marge.

⁸« ‹'Ba ni näk mo da wï jur wala akwöm nyeya mo kweer ki man bëëde ni ena laŋŋø mar Nabukedenecör nyeny Babiløn, ni ba jïëy ki man bëëde tier teek mare na caal jaath puur man wø twöö ŋut rwaath, a na Wuuö Jwøk, wï jur manøce jääla jäälö, ni thøwge ko opëëllö ki käc ki täw mo leth, këël mano thööra geni ki cere.

⁹'Ba uuni, luup nyïïkuk Jwøk mou mo wø køp luup ki wïthge kär wïnynyu, ki luup jø adïëda mou, ki jiy mou mo wø car lääk, ka ajuuk mou, ki jiy mou mo wø thöödhö ki war, jø wø cäänö ki uuni, ni «Käru bëëdö ni uuna laaŋe mo nyeny Babiløn.»

¹⁰Kiper ge køpa luup tööt jïïu; ki køør luupögø u di daa ni cou kany mo kare bäär ki ŋöömö maru, ni beeye aani noo riem u wøk, ni thøwu kaace.

¹¹'Ba wï jur mano jïëy ki man bëëde tier teek mar nyeny Babiløn na caal jaath puur man wø twöö ŋut rwaath, ni bëëde ni ena laŋŋø mare, geni, ge wëëga bëëtö yi ŋöömö marge, ni puurge gø ni bëëtge yie.› Luummögø caana Wuuö Jwøki.»

¹²'Ba teeŋ luupögø bëët acaana jï Cëdëkiya nyeny Juuda, ni kööa, ni «Jïëyu ki man bëëdu tier teek mar nyeny Babiløn na caal jaath puur man wø twöö ŋut rwaath, ni bëëdu ni uuna laaŋe moe ki jiye; køøre u bëëdö nou kwøw.

¹³?Aŋø, ïïni ki jiyï, aperŋø ni manynyu thøø jaak en, nou thøwu ko opëëllö ki käc ki täw mo leth, kaawat mana caan Wuuö Jwøki kiper wï jur mano kweer ki man bëëde na laŋŋø mar nyeny Babiløn?

¹⁴Kär luup nyïïkuk Jwøk mo wø køp luup ki wïthge wïnynyu, jø wø cäänö ki uuni, ni ‹Käru bëëdö na laaŋe mo nyeny Babiløn,› kiper ge køpa luup tööt jïïu.

¹⁵A na Wuuö Jwøk, ge kära jääŋŋö, 'ba luup tööt køpge ka nyeŋŋa; 'ba ki køør luupögø, u riema wøk, ni thøwu ki nyïïkuk Jwøk bëët mo wø køp luup jïïu.»

¹⁶Køøre aana cäänö thuwø ki dïlämme ki jøøi ii bëët, ni kööa, ni «Luumma caan Wuuö Jwøki beeye en, ena köö, ni ‹Kär luup nyïïkuk Jwøk mou mo wø køp luup ki wïthge wïnynyu, jø wø cäänö ki uuni, ni «Neennu, jap Øt Wuuö Jwøk laar ka duuö kany mo cään ki Babiløn.» Geni, ge køpa luup tööt jïïu.

¹⁷Kär luupge wïnynyu, 'ba bëëdu nou tïnynya nyeny Babiløn, køøre u bëëdu nou kwøw. ?Aperŋø no ö päänyi man no wëëgi ränynyö en?›

¹⁸'Ba ni näk mo gena nyïïkuk Jwøk møn, ni luum Wuuö Jwøk nut dhøkge, beerra man öge ennø ni kwacge Wuuö Jwøk, eni na wïth jammi bëët, nee jammi moa näk odööŋ yi Øt Wuuö Jwøk, ki moa näk odööŋ yi øt nyeny Juuda ki yi Jerucalem bäre, nee ba kïth Babiløn këët.

¹⁹Kiper Wuuö Jwøk, eni na wïth jammi bëët, acäänö kiper gïïa näk caala dïkweeye mo Øt Wuuö Jwøk, ki gïr pïï mana dwøŋ, ki jïëthe mo wø käär pïï ki ge, ki jammi møga moa näk odööŋ yi pääny man,

²⁰na näk kär käl Nabukedenecörri nyeny Babiløn, kanya käl Jekönaya wär Jeyöakëm nyeny Juuda ni maae ki tøŋ Jerucalem ni kïth gø Babiløn, ki jøøa kwörge døøŋŋø bëët mo wø bëëdö Jerucalem ki dï Juuda bäre.

²¹Ka adïëri møn, luumma caan Wuuö Jwøki, Jwø Icriel, eni na wïth jammi bëët, kiper jammi moa näk odööŋ yi Øt Wuuö Jwøk, ki moa näk odööŋ yi øt nyeny Juuda, ki yi Jerucalem bäre, beeye en, ena köö,

²²ni ‹Japøgø 'kïtha Babiløn, ni bëëtge kaace këël dïcäŋo cøøa baŋge, ni käla geni ni duua geni karge kany.› Luummögø caana Wuuö Jwøki.»