Read anuak Jeremaya 28 Bible Online

Jeremaya 28 - anuak bible

Jeremaya 28

¹'Ba kanya tïme na køøre cään, ni poot na yi cwiinøgø, ri ŋweer cwiiri moa beet Cëdëkiya ni ena nyeny Juuda, kanya tïme na dwää abïïc, nyikuŋ Jwøk ma Ananiya wär Adhur, na käl Gibien, acäänö ki aani, a na Jeremaya, yi Øt Wuuö Jwøk, nyïm dïlämme ki jiy bëët, ni kööe,

²ni «Luumma caan Wuuö Jwøki, Jwø Icriel, eni na wïth jammi bëët, beeye en, ena köö, ni ‹Teek mar nyeny Babiløn na en bäätu ni caal jaath puur man wø twöö ŋut rwaath araanynya.

³Ki yïth cwiiri ariiø kiree, aani, jammi mo Øt Wuuö Jwøk moa käl Nabukedenecörri nyeny Babiløn, ni kïth geni Babiløn, 'duua kany.

⁴Ni duua Jekönaya wär Jeyöakëm nyeny Juuda kany ki jø Juuda bëët moa mak ki tøŋ na kïth Babiløn, kiper teek mar nyeny Babiløn na en bäätu ni caal jaath puur man wø twöö ŋut rwaath raanynya raanynyø.› Luummögø caana Wuuö Jwøki.»

⁵'Ba nyikuŋ Jwøk ma Jeremaya luummögø ajøle jï nyikuŋ Jwøk ma Ananiya nyïm dïlämme ki jiy bëët moa näk cuŋŋö yi Øt Wuuö Jwøk,

⁶ni kööe, ni «Beerra man thur luummï kare. Beerra man ö Wuuö Jwøki ni tïïc gø, ni ö Wuuö Jwøki ni wëëk luup moi bëët thur karge, ni beege luup moa køpï ni jap Øt Wuuö Jwøk ki jiy bëët moa mak ki tøŋ na kïth Babiløn di duuö kany.

⁷'Ba ennø, wïny luubö mano caana jïrï nø, ni wïnyö jïrï, ni wïnyö jï jøøi ii bëët.

⁸Nyïïkuk Jwøk moa kwøŋ nut nyïmmø cøøn, da gïï maa køpge, ni beege gïï lenye ki gïr gïï mo leth ki gïr täwe mo reyø moo tägi dëët tiet mïëri mo thööth ki dëët akwöm moa døøŋŋø mo nyeye.

⁹'Ba nyikuŋ Jwøk mo køpa gïr bëët-mëër, kanyo tïm luumma købe noo thur kare, put ka ŋäc ni nyikuŋ Jwøk manøgø jääŋŋa Wuuö Jwøki møn.»

¹⁰Kanyøgø nyikuŋ Jwøk ma Ananiya jaath puur mana en ŋut nyikuŋ Jwøk ma Jeremaya akäl wøk ni toor gø.

¹¹Ni ö Ananiya ni cääne ni jiy bëët nutö, ni kööe, ni «Luumma caan Wuuö Jwøki beeye en, ena köö, ni ‹Kaawat mana räny jaath puurri manøgø, aani, teek mar Nabukedenecör nyeny Babiløn na en bäät wïth juurre bëët ni caal jaath puur man wø twöö ŋut rwaath raanynya raanynyø ki yïth cwiiri ariiø.› » Køøre nyikuŋ Jwøk ma Jeremaya aput aay jaak ki jööre.

¹²'Ba kanya ö nyikuŋ Jwøki ma Ananiya na nø raany jaath puur mana en ŋut nyikuŋ Jwøk ma Jeremaya, dwør Wuuö Jwøk aö bäät Jeremaya, ni kööe,

¹³ni «Ciï ni caanï gø jï Ananiya, ni ‹Luumma caan Wuuö Jwøki beeye en: Ïïni jaath puur man wø twöö ŋut mana raanynyï enø beeye jaath jaak, 'ba mano läw kar manøgø beeye gïr puur ma nywïënyö.

¹⁴Kiper luumma caan Wuuö Jwøki, Jwø Icriel, eni na wïth jammi bëët, beeye en: Aani, gïr puur ma nywïënyö man wø twöö ŋut yaa nø twöö ŋut wïth juurre moøgø bëët nee bëëtge ni ge ena tier Nabukedenecör nyeny Babiløn, ni tïnyge eni. Këël lääc paap yaa nø cïp jïre.› »

¹⁵Kanyøgø nyikuŋ Jwøk ma Jeremaya aköö jï nyikuŋ Jwøk ma Ananiya, ni «Ï na Ananiya en, wïny gïn! Wuuö Jwøk ï käre jääŋŋö, 'ba jiy moi atïïyï nee jïëcge ki luum tööt.

¹⁶Kiper manøgønø, mana caan Wuuö Jwøki beeye en, ena köö, ni ‹Ennø, ï tïïa tïïö niï tøør bäät piny. Yi cwiir man kiree ï puta thøø, kiper ïïni, jiy apwönynyï nee gëëmge ki Wuuö Jwøk.› »

¹⁷'Ba yi cwiinøgø kiree, kanya tïme na dwää abïriiø, nyikuŋ Jwøk ma Ananiya aput thøø.