Read anuak Jeremaya 32 Bible Online

Jeremaya 32 - anuak bible

Jeremaya 32

¹'Ba dwør Wuuö Jwøk aö bäät Jeremaya ri paac cwiiri moa beet Cëdëkiya ni ena nyeny Juuda, kanya tïme na ri cwiiri apaar ka abära moa beet Nabukedenecörri ni ena nyeny Babiløn.

²'Ba kar kaace beeye kanya bëët jø lenynyi mo nyeny Babiløn ni Jerucalem ege ciel dïër, ni nyikuŋ Jwøk ma Jeremaya odëët yi kal mar jø koor mana en paan dwøŋ mar nyeny Juuda.

³Kiper beeye Cëdëkiya nyeny Juuda na dëët Jeremaya yi kal, ni kööe jïre, na «?Aperŋø na køpï luupi ii? Ïïna köö ni Wuuö Jwøk aköö, ni ‹Ka adïëri møn, pääny man en 'cïba cer nyeny Babiløn, ni ö eni ni mac gø.

⁴Ni Cëdëkiya nyeny Juuda ba bøth ceŋ jø Babiløn, 'ba ka adïëri møn, eno cïp cer nyeny Babiløn, ni ö eni na Cëdëkiya ni cääne ki nyeny Babiløn ni ge løøŋŋa dhøkge, ni joot gø møn ni ge neeta nyeŋge.

⁵Nyeny Babiløn Cëdëkiya okïth Babiløn, ni ö Cëdëkiya ni bëëde kaace këël kanyo cøøa baŋe.› Ni cäŋï köö ni Wuuö Jwøk aköö, ni ‹U ni jø paani en, këël u doo këëdö ki jø Babiløn, leny maru ba thur kare.› »

⁶'Ba dwør Wuuö Jwøk mana ö bääta, a na Jeremaya, beeye en, ena köö,

⁷ni «Ennø, Anamel o Calum cöök wäru ööa baŋï ni kööe jïrï, ni ‹Ŋeew pwödhö mara mana en ya Anathöth, kiper øøna tuuŋ ni løny jïrï ki man tïme ni ŋeewa ïïni.› »

⁸Køøre Anamel o cöök wära aö baŋa yi kal mar jø koor, kaawat mana caan Wuuö Jwøki, ni kööe jïra, ni «Ïïni, beerra man ŋeewï pwödhö mara mana en ya Anathöth na en yi ŋööm Benjamen, kiper øøna tuuŋ ni løny jïrï ki man tïme ni ŋeewa ïïni nee dööŋe jïrï. Ŋeewï nee tïme na marï.» Køøre, aani, aputa ŋäc ni dwørøgø beeye dwør Wuuö Jwøk møn.

⁹Kanyøgø pwödhö manøgø na en ya Anathöth enø aputa ŋeew baŋ Anamel o cöök wära, ni røma gwet-bïrö apaar ka abïriiø jïre.

¹⁰'Ba nyeŋŋa agööra yi wëëlö tier luubö mana jïëcwa bääte, ni mwöna gø ni jøøa cwøla nutö, ni cïba gwel bäät rumi ni røma geni.

¹¹Køøre wëël ŋïëw mana näk omwönö ki mana näk kär mwönö, moa näk luubö mana jïëcwa bääte ogöörö yïthge, alwøra,

¹²ni cïba weetøgø jï Baruk o Neriya nyikwaar Maciya nyïm Anamel o cöök wära, ki nyïm jiy moa nut na göör nyeŋge yïth weet ŋïëw moøgø, ki nyïm jø Juuth bëët moa näk opï piny yi kal mar jø koor.

¹³Ni köömma Baruk nyïm jøøa nut bëët, ni kööa,

¹⁴ni «Luumma caan Wuuö Jwøki, Jwø Icriel, eni na wïth jammi bëët, beeye en, ena köö, ni ‹Lwør weet ŋïëw moi, mana näk omwönö ki mana näk kär mwönö, ni kanï geni yi dak, kiper nee ruuge ki kany mo bäär.›

¹⁵Kiper luumma caan Wuuö Jwøki, Jwø Icriel, eni na wïth jammi bëët, beeye en, ena köö, ni ‹Uudi ki pwöth beel ki pwöth omøki ocäŋ ŋeewø yi ŋöömmi en.› »

¹⁶'Ba kanya nø cïba wëël ŋïëw jï Baruk o Neriya, aana lämö jï Wuuö Jwøk, ni kööa,

¹⁷«Wui, Kwäärö Wuuö Jwøk, beeye ï na cwääc maal ki piny ki køør teek badï na dwøŋ! Bäŋ gïn dhäthi jïrï!

¹⁸Beeye ïïni ni wø nyooth mëër marï ni wø ba jøøl jï jiy ma kum kum, 'ba ïïni, gïïa reyø ni wø bac wëëe wø coolï coolø dëët obwöre moge mo wø ööi køørge. Bee ï na Jwøa dwøŋ na teek, ni nyeŋŋï beeye Wuuö Jwøk, Jwø wïth jammi bëët.

¹⁹Acaara marï dwøŋ, ni tïïe moï wø tïïyï ka teek mo dwøŋ, ni waŋï iï peerø bäät uutjïëth tïïe mo jiy bëët, ni ŋati man nø wø cunnï cunnö ki køør bëëtö mare ki tïïe moe.

²⁰Ïïna tïïö ki nyuuthe ki gïï mo rëëma ec yi ŋööm Ijep, ni ï wø poot tïïö ki nyuuthe yi ŋööm Icriel ki dï jiy ma teeŋi këël dïcäŋi en, ni tïïyï nyeŋŋï nee wïnye kaawat man bëëde dïcäŋi en.

²¹Ïïni, jiyï ma jø Icriel akälï wøk ki yi ŋööm Ijep ki køør ŋïïce ki gïïa näk rëëma ec, na tïïyï ki køør teek badï na dwøŋ, ki gïïa døøŋŋø na tïïyï na kännö ki lwär.

²²Ni cïpï ŋöömmi en jïge, ni beeye ŋöömma kööŋï kipere jï kwäcge ni cïpï cïbö jïge, ŋöömma näk caak ki maar kïc päl yie.

²³Ni öge yie ni macge gø, 'ba dwørï kärge wïnynyö, ni kärge cäädhö køør ciik moï. Ni bäŋ gïn mo ege tïïö kiper gïïa köömmï geni ki ge bëët nee kïthge bäät tïïc, ni beeye tiere gø na jääŋŋï gïï na leth bëët ii bäätge.

²⁴«Ennø, ŋøøm moø ni thør jø Babilønni deŋ kiir pääny enø, anø pïï maal kiper nee pääny macge; 'ba kiper mäny ki käc ki täw mo leth, pääny aløny ni cïp ceŋ jø Babiløn, jøø ni këëdi ki gø yøø. 'Ba kawaane, gïna caanï kiper päänyi en anø tägö, ni nëënö jïrï.

²⁵Wui, Kwäärö Wuuö Jwøk, ïïna cäänö ki aani ni kööï, ni ‹Ŋeew pwödhö jïrï ki gwel nyïm jiy mo iï cwølø,› 'ba pääny onø cïp ceŋ jø Babiløn.»

²⁶Kanyøgø dwør Wuuö Jwøk aö bääta, a na Jeremaya, ni kööe,

²⁷ni «Neenï, beeye aani na Wuuö Jwøk, Jwø wïth gïïa kwøw bëët. ?Aŋø, da gïn mo dhäthö jïra?

²⁸Kiper manøgønø, gïn caana en, a na Wuuö Jwøk, beeye en: Ka adïëri møn, päänyi en 'cïba ceŋ jø Babiløn, cer Nabukedenecör nyeny Babiløn, ni mac gø.

²⁹Ni ö jø Babilønni moø ni këëdi ki päänyi en, ni dønyge yie, ni nyepge gø ki maac ni waaŋge gø. Ni waaŋge uudi bëët mo wø wääŋ jiyi bäätge ki gïn wø jïye ŋwääi ni met jï jwøa cwøl ni Baal, ni wø kunyge piny bäätge ki muuy mar køøŋø jï juu møøk, ni raanyge cwïnya.

³⁰«Ka adïëri møn, jø Icriel ki jø Juuda bëëdö ni ge tïïya gïï mo nëëni ni reyø keerge ki jïra, ni tägi ki kanya täkge bëëtö cøøn; kiper geni, ge bëëdö ni ge raanynya cwïnya keere ki køør gïï wø tïïcge.

³¹Ka adïëri møn, päänyi en atïmö na gïn mo raanynya cwïnya mo käla wëër mara bääte, ni tägi ki kanya geeri, këël dïcäŋi en. Kiper manøgønø, raanynya raanynyø nyïma,

³²kiper gïïa reyø bëët na tïïc jø Icrielli ki jø Juuda ni raanyge cwïnya, ni beeye geni ki nyeye moge, ki jø kööre moge, ki dïlämme moge, ki nyïïkuk Jwøk moge, ki jø wø bëëdö Jerucalem ki dï Juuda bäre.

³³Ni öge bëët ni luuge ŋäthge baŋa ni patha nyïmge; ni këël na bëëda naa pwönynya geni cooth, ïthge kärge ciiø nee pwöc wïnyge.

³⁴'Ba gïïa näk ec raac ki ge døc ni wø lamge akïthge yi øtø man wø cwøl ri nyeŋŋa, ni ge tïïya gø ni ba waany.

³⁵Ni gëëtge ki kwör lam jï Baal ya agäm-kïdi mana cwøl ni Ben Inöm, nee wäätge ki nyïïge waaŋge no olämme kaace jï Mölek, ni beeye gïn mo ge kära köömmö ki man tïïcge gø, na acaac gïnögø bäŋgø mo ö wïïa thuwø ki man tïïcge gïïögø ni ec raac ki ge døc yøø, ni wëëkge jø Juuda bääyö.

³⁶«'Ba këël na bëët jø Jerucalemmi ni ge köö, ni ‹Päänyi onø cïp cer nyeny Babiløn ki køør leny ki käc ki täw mo leth,› a na Wuuö Jwøk, Jwø Icriel, gïn caana en kiper päänyi beeye en:

³⁷Ka adïëri møn, aani, jiya lema lemø yïth kwöra riema geni yïthge bëët kanya räny cwïnya ni wëëra ki geni ki wëër mo liel kaamar maac; ni duua geni kany en, ni bëëtge ni geno nikwak.

³⁸Ni bëëtge ni gena jiya, ni bëëda ni aana Jwøk marge.

³⁹Ni mooa geni ki cwïny aciel ni cääthge ki jöö aciel, nee bëëtge ni ge lwäär ki aani cooth, nee bëëtö marge ki bëëtö mar obwöre moge moo ööi køørge tïme ni beer.

⁴⁰Ni ööa ni tuda ki luubö ki geni mo bëëdö na bäre bäre, ni beeye ni gïn mo beer ba wiia ki man tïïa gø jïge. Ni mooa cwïnyge ki lwär, ni bëëtge ni ge lwäär ki aani cooth, naa ba wecge.

⁴¹Aani, a bëëdö ni yia met ki geni naa tïïya gïn mo beer jïge, ni këëlla tietge piny døøc yi ŋöömmi en, ni tïïa ki cwïnya bäre ki jwïëya bäre.

⁴²«Kiper gïn caana en, a na Wuuö Jwøk, beeye en: Kaawat mana tïïa gïï na leth bëët ii dëët jøøi, aani, gïïa beyø bëët na caana kiperge tïïa tïïö jïge.

⁴³Pwöth ocäŋ ŋeewø yi ŋöömmi en, ŋööm wø cään jiyi kipere noo ränynyö, ni bäŋ dhaanhø ni bäŋ lääy mo bëëdö yie, ni eno nø cïp ceŋ jø Babiløn.

⁴⁴Jiy pwöth oŋeewge ki gwel, ni göörge luum ŋïëw piny yïth weet ŋïëw, ni mwönge geni nyïm jiy mo ege cwølø. Gïnögø otïïcge yi ŋööm Benjamen, ki mïëri moa en deŋ Jerucalem, ki yïth mïëc Juuda, ki yïth mïëri moa en bäät thuuri, ki yïth mïëri moa en yi ŋöömma näk ree ee päärö, ki yïth mïëri mo Nëgëp. Kiper bëëtö marge 'cäŋa dwøk kare ni beer.» Luummögø caana Wuuö Jwøki.