Read anuak Jeremaya 33 Bible Online

Jeremaya 33 - anuak bible

Jeremaya 33

¹'Ba dwør Wuuö Jwøk acäŋ ö bäät Jeremaya ri rietge, kanya bëët Jeremaya ni poot noo dëët yi kal mar jø koor, ni kööe,

²ni «Man beeye luumma caan Wuuö Jwøki, eni na cwääc piny ni tïïc gø nee bëëde kare, eni na näk nyeŋŋe beeye Wuuö Jwøk, ena köö,

³ni ‹Cwøl aani, løøa løø jïrï, ni cara gïï mo døøŋŋø jïrï mo tietge ba løny joot jïrï, mo kuyï.›

⁴Kiper a na Wuuö Jwøk, Jwø Icriel, aana cäänö kiper luum uudi mo pääny Jerucalem man, ki luum uudi mo nyec Juuda moa nyaa piny nee kiir thør ki geni kiper leny mano këël ki jø Babiløn, nee ba ïnhge yi kiir ki bäät ŋøøm moa thørge deŋ kiir.

⁵'Ba kanyo këëtge ki jø Babiløn, uudi moøgø opäŋ ki rïŋ dëët jiy moo 'näk ki køør räny cwïny ki wëër mara. Aani, täärnyïma kana kanø ki pääny man kiper gïïa temge na reyø.

⁶«'Ba yi nyïme, pääny man odwøga kare, ni døø kare ni beer, ni dwøga bëët jiy kare, ni nyoodha bëët mëër ki bëët adïëri jïge ni päl.

⁷Ni ö jø Juuda ki jø Icriel bëët ni dwøga bëëtö marge kare, ni cäŋa tietge këël piny ni teek kaawat mana bëëtge dïkwøŋ.

⁸Ni pïnya raay moge wøk, ni beege raay bëët moa bacge dëëra; ni wëënna raay moge bëët, ni beege raay moa bacge dëëra, ka ageem mana tïïcge dëëra.

⁹Køøre nyeŋŋa tïmö ni wïnyö, ni jïta ki met ec ki pwøc, ka ajiem ki køør pääny man nyïm wïth juurre bëët mo bäät piny, moo wïny gïïa beyø bëët moo tïïa kiper jø pääny man, ni thäŋ yïthge ni rïïŋ dëëtge kiper bëët bëënynyö ki bëët mëër mano tïïa kiper pääny man.

¹⁰«Man beeye mana caan Wuuö Jwøki, ena köö, ni ‹Këël na bëëdu nou köö, ni «Paani oränynyö, ni bäŋ jiy ni bäŋ lääy mo bëëdö yie,» yïth mïëc Juuda ki dï Jerucalem ni bëëdö jaak ni bäŋ jiy ni bäŋ lääy mo bëëdö yïthge enø, dwøl ocäŋ wïnyö yïthge,

¹¹ni beeye dïlweel mar met ec ki dwør met ec, ki kanynyø mar nywöm, ki dööt jø wø cïpi ko olämme mo dwøk met ec yi Øt Wuuö Jwøk, ni ge köö, « ‹ni «Dwøgu met ec jï Wuuö Jwøk, eni na wïth jammi bëët, kiper Wuuö Jwøk beer, ni mëër mare ni wø ba jøøl bëëdö na bäre bäre.» Kiper aani, paac 'dwøga kare ni caala mana dïkwøŋ.› Luummögø caana Wuuö Jwøki.

¹²«Man beeye mana caan Wuuö Jwøki, eni na wïth jammi bëët, ena köö, ni ‹Dï paani ni bëëdö no oränynyö en, ki yïth mïëri moa en deŋŋe bëët, ni bëëdö ni bäŋ jiy ni bäŋ lääy mo bëëdö yïthge enø, otïmö ni da kwör kwaath mo løny jï dïkwääye ki man wëëkge dïëk moge jwömö yïthge,

¹³ni beege yïth mïëri moa en bäät thuuri, ki yïth mïëri moa en yi ŋöömma näk ree ee päärö, ki yïth mïëri mo Nëgëp, ki yi ŋööm Benjamen, ki yïth mïëri moa en deŋ Jerucalem, ki yïth mïëri mo Juuda, noo cäŋ tïmö ni da pïïth dïëk mo kwaan dïkwääye kwaanø.› Luummögø caana Wuuö Jwøki.

¹⁴«Wuuö Jwøk aköö, ni ‹Ka adïëri møn, da nïne mo öö, mo luumma beer na caana kiper jø Icriel ki jø Juuda wëëga thur kare.

¹⁵« ‹Noo tïme na yïth nïröke yi kar kaace, ŋat mo mare beeye adïëri owëëga twöö na lwiidhø, na ŋat mo käla ri dhi øt Deebit, ni ö ŋatøgø ni bëëde ni luup ŋøle na karge ni tïïya adïëri yi paac.

¹⁶'Ba ki yïth nïröke, jø Juuda di piemø, ni ö jø Jerucalemmi ni bëëtge ni geno nikwak. 'Ba man beeye nyeŋ mano cwøl Jerucalem ki gø: ni «Wuuö Jwøk beeye tier bëënynyö marø.» ›

¹⁷Kiper mana caan Wuuö Jwøki beeye en, ena köö, ni ‹Deebit bäŋ doo can na bäre bäre ki dhaanhø mo läw kare bäät wälu mar jø Icriel.

¹⁸Ni tuuŋ dïlämme ma jø dhi øt Libay ba doo can ki dhaanhø mo öa nyïma na ŋat wø cïp olämme mo wø waaŋ bäre, ki muuce mo beel, na ŋat mo jiiŋŋa olämme møga cooth.› »

¹⁹Køøre dwør Wuuö Jwøk aö bäät Jeremaya, ni kööe,

²⁰ni «Luumma caan Wuuö Jwøki beeye en: Ni näk mo løny jïïu ki man raanynyu gïna tuuda kiper waŋcäŋ ki gïna tuuda kiper wäär, nee waŋcäŋ ki wäär ba bëëtge kwörge kanya näk owäŋŋö,

²¹løny ki man räny gïna tuuda ki dhaanhnha ma Deebit, ni eni ba jïti ki wääde mo läw bäät wälu mare nee paac kääre. Ni gïna tuuda ki tuuŋ dïlämme ma jø dhi øt Libay, jø wø tïny aani, løny ki man ränynye thuwø.

²²Nyïïkwaac dhaanhnha ma Deebit, ki jø dhi øt Libay, jø wø tïny aani, kwäänge meeda meedø ni tïmge ni thööth ni ba løny ki kwaan, kaawat man wø bëët ceerri ni ba løny ki kwaan, kaawat man wø bëët akwöny deŋ naama dwøŋŋi ni ba løny ki røm.»

²³Køøre dwør Wuuö Jwøk aö bäät Jeremaya, ni kööe,

²⁴na «?Aŋø, gïna caan jøøi ii kärï wïnynyö, kanya köge, ni ‹Icriel ki Juuda, wïth tuŋi moa näk ariiø moa jier Wuuö Jwøki, gena nø kwiere›? Kanya caange teeŋ luummögø, ge taaga jiya, ni ge patha paac ki jïge këët.

²⁵'Ba man caana, a na Wuuö Jwøk en, beeye ni näk mo gïna tuuda kiper waŋcäŋ ki wäär kära tïïö nee bëëde kare, ni ciik moa cïba kiper maal ki piny kära tïïö nee bëëde kare,

²⁶løny jïra ki man kwiera nyïïkwaac Jeekap, ki dhaanhnha ma Deebit, ni bäŋe ŋat mo kwanya këët røk nyïïkwaaye mo käär jiya ma nyïïkwaac Eeberam ka Aydhak ki Jeekap. 'Ba ge ba kwiera; bëëtö marge odwøga kare, ni nyoodha mëër mara jïge.»