Read anuak Jeremaya 37 Bible Online

Jeremaya 37 - anuak bible

Jeremaya 37

¹'Ba Cëdëkiya o Jöcaya arøøny Nabukedenecörri nyeny Babiløn na nyeya yi ŋööm Juuda kar Jekönaya wär Jeyöakëm, ni bëëde na nyeya ni paac ena cere.

²'Ba eni ki jø kööre moe ki jø paac, luup Wuuö Jwøk moa caane ki dhi Jeremaya kärge wïnynyö.

³'Ba eni na nyeya ma Cëdëkiya, Jïyukal o Celemiya ki dïlämi ma Jepaniya o Maycëya ajääŋŋe baŋ nyikuŋ Jwøk ma Jeremaya, ni kööe, ni «Beerra man lämï jï Wuuö Jwøk, Jwøk marø, kiperwa.»

⁴'Ba kar kaagø Jeremaya poot cäädhö jaak dï jiy, kiper eni poot kär kïth øt twöc.

⁵Ni jø leny mo Peerø nyeny Ijep onø tïŋŋö Ijep; 'ba kanya ö jø Babilønni moa näk Jerucalem ege ciel dïër na wïnyge luum ööny jø Ijep, Jerucalem aputge wec.

⁶Køøre dwør Wuuö Jwøk aö bäät nyikuŋ Jwøk ma Jeremaya ni kööe,

⁷ni «Luumma caan Wuuö Jwøki, Jwø Icriel, beeye en: Wär caannu jï nyeny Juuda, ŋata jääŋ uuni baŋa naa pëënynye, ni kööu jïre, ni ‹Neenï, jø leny mo Peerø moa nø tïŋŋö, ni ge ööa kuna kønyge ïïni, ge døøa poge Ijep.

⁸Ni ö jø Babilønni ni cäŋge duuö ni këëtge ki pääny man, ni makge gø ni waaŋge gø.›

⁹Luumma caan Wuuö Jwøki beeye en: ‹Kär rou cøøgu ni kööu, ni «Jø Babiløn wa wecge wiiø møn,» 'ba u ba wecge!

¹⁰Këël doo naa jø leny bëët mo jø Babiløn moa këëdö ki uuni you böötö, ni tïme ni dööŋŋa jiy moa näk dëëtge da ŋwiili keerge, ŋati man nø dïge doo ööa wøk ki yo oduŋkaara mare ni öge maal ni waaŋge paac man.› »

¹¹'Ba gïna tägö, kanya ö jø lenynyi mo jø Babiløn na wecge Jerucalem, na näk ege ciel dïër, kiper ööny jø leny mo Peerø,

¹²Jeremaya atïŋŋö Jerucalem ni eni cøøa yi ŋööm jø tuuŋ Benjamen, kiper nee ŋöömö mana näk kure lwøre ni jiy nutö.

¹³'Ba kanya pïïe dhi kiir man wø cwøl ni Dhi Kiir Benjamen, ŋata bëëdö na wïth jø koor, mo nyeŋŋe Iriya o Celemiya wär Ananiya ena kaace. Ni ö eni ni mak nyikuŋ Jwøk ma Jeremaya, ni kööe, ni «Ïïni, ï kwala riï nee riï cïpï jï jø Babiløn.»

¹⁴'Ba Jeremaya aköö, ni «Manøgø patha kare. Aani, mara paa cïp raa jï jø Babiløn.» 'Ba mana caan Jeremaya käre leŋø. Køøre Iriya Jeremaya aput mak, ni käl gø baŋ jøøa kwörge døøŋŋø.

¹⁵Ni ö jøøa kwörge døøŋŋø ni räny cwïnyge ki Jeremaya ni pwötge gø, ni putge gø kïth kar twöc yi øt Jönathan, ŋat wø göör luup akwöma piny, ni beeye øda näk ege tïïö na kar twöc.

¹⁶Jeremaya akïth yi øt buur mana näk otïïö na kar twöc, ni bëëde kaace ki nïne mo thööth.

¹⁷'Ba nyeya ma Cëdëkiya ajääk baŋ gø ni käl gø wøk. Ni ö nyeya ni pëëny Jeremaya mëëth ki piny paare paan dwøŋ, ni kööe, ni «?Da dwøl moo öö ki baŋ Wuuö Jwøk?» Ni kö Jeremaya, ni «Dagø.» Ni ö Jeremaya ni put köö, ni «Ïïni, ï cïba cer nyeny Babiløn.»

¹⁸Ni ö Jeremaya ni pëëny nyeya ma Cëdëkiya, na «?Agïnaŋø ni raac ni yaa tïïö dëërï en, ki dëët jø kööre moï, ki dëët jøøi ii, na kïthu aani øt twöc kipere en?

¹⁹?Aŋø, nyïïkuk Jwøk mou moa cäänö ki uuni na köö, ni ‹Nyeny Babiløn ba ö baŋu baŋ leny, ni ba ö baŋ leny paani,› geni, ge enge kaa ennø?

²⁰'Ba ennø Awuuö, ï na nyenynya, beerra man wïnynyï kwac mara, ni ba dwøgï aani yi øt Jönathan, ŋat wø göör luup akwöma piny, kiper naa ba thøøa kaace.»

²¹Køøre nyeya ma Cëdëkiya acïpö ki dwøl, ni ö jiyi ni kïthge Jeremaya yi kal mar øt jø koor, ni bëëtge ni ge cïpö jïre ki dääpö cooth ki yïth nïne bëët, mo käla baŋ jø wø budö ki dääpe, këël mana thum dääpe bëët dï paac. 'Ba Jeremaya aput bëëte kaace yi kal mar øt jø koor.