Read anuak Jeremaya 38 Bible Online

Jeremaya 38 - anuak bible

Jeremaya 38

¹'Ba Cepathiya o Matan, ki Gedaliya o Pacuur, ki Jïyukal o Celemiya, ki Pacuur o Malkiya, luup moa car Jeremaya jï jiy bëët awïnyge, kanya kööe,

²ni «Luumma caan Wuuö Jwøki beeye en: Ŋato bëëdö yi pääny man thøw ki käc ki täw mo leth, ni nääi ko opëëllö, 'ba ŋato aa wøk ni cïp cere jï jø Babiløn, eni kwøw; ni bøth jwïëyi moe, ni bëëde ni kwøw.

³Luumma caan Wuuö Jwøki beeye ni pääny man ocïp ceŋ jø leny mo nyeny Babiløn møn, ni ö eni ni put pääny mak.»

⁴Køøre jøøa kwörge døøŋŋø gena köö jï nyeya, ni «Ennø, beerra man 'näk nyenøgø, kiper eni bäätha bäät jø leny ki jiy bëët moa näk odööŋ yi pääny man ki køør luup moa care jïge. Kiper nyenøgø ba many bëënynyö mar jiy moi, 'ba eni manynya ränynyö marge.»

⁵Køøre nyeya ma Cëdëkiya aköö, ni «Neennu, eni ena ceŋŋu, kiper nyeya bäŋ gïn mo løny ki tïïc jïre ni näk patha mana manynyu.»

⁶Køøre Jeremaya akälge, ni kïthge gø yi buur man wø cuŋ pïïyi yie mar o nyeya ma Malkiya, ni lwarge gø piny ki thøøli. 'Ba buurögø ena yi kal mar øt jø koor, ni yie bäŋ pïï, 'ba nuta onøt yie keere. Ni ö Jeremaya ni neemwøny piny yo onødøgø.

⁷'Ba Ebet-Melek, nyï Ithiöpia ma ŋat köör mo ena paan dwøŋ, awïnynye ni Jeremaya okïth yi buur. 'Ba kar kaagø nyeya opï piny dhi kiir man wø cwøl ni Dhi Kiir Benjamen.

⁸Køøre Ebet-Melek aö wøk ki paan dwøŋ ni cääne ki nyeya, ni kööe,

⁹na «Awuuö, ï na nyenynya, gïïa tïïc jøøi ii bëët dëër nyikuŋ Jwøk ma Jeremaya beege gïï mo reyø. Ena leeŋge yi buur, kany mo eni thøw yie ki käc, kiper bäŋ cam dï pääny këët.»

¹⁰Køøre nyeya Ebet-Melek nyï Ithiöpia aköömme, ni kööe, ni «Kädï ki jiy ma pïëradäk kany, mo ge ena cerï, ni cou ni kälu nyikuŋ Jwøk ma Jeremaya wøk ki yi buur, kany poode ni eni kär thøw.»

¹¹Kanyøgø Ebet-Melek jøøa cïp cere akäle, ni ci paan dwøŋ, ni døny piny tier øtø kany wø kan jammi yie, ni lwöte ka abïïe mo ojeeyø ka abïïe ma nywate, ni twöö geni ri thøøl, ni lwar ge piny yi buur baŋ Jeremaya.

¹²Ni kö Ebet-Meleki nyï Ithiöpia jï Jeremaya, na «Abïïe moi no ojeeyø ki moi na nywate ii cïp tiet jööthï, ni riidï thøøli bäätge.» Ni ö Jeremaya ni tïïc gø ki køør mana caan.

¹³Køøre Jeremaya atuutge wøk ki thøøli ni kälge gø wøk ki yi buur. Ni ö Jeremaya ni put bëëte yi kal mar øt jø koor.

¹⁴Køøre nyeya ma Cëdëkiya ajääk baŋ nyikuŋ Jwøk ma Jeremaya, ni käli baŋe buut dää dhøgi man wø døny øt Wuuö Jwøk ki gø. Ni kö nyeya jï Jeremaya, ni «Da gïn miï pëënynya pëënynyö ki gø; kär dee gïn mo mooŋï ki aani.»

¹⁵Ni kö Jeremaya jï Cëdëkiya, na «?Aŋø, ni näk mo yaa caanø jïrï, ka adïëri møn, a ba 'nägï? Këël a doo cïpö ki pwöc jïrï thuwø, mara ba wïnynyï.»

¹⁶'Ba nyeya ma Cëdëkiya akööŋ mëëth ki piny jï Jeremaya, ni kööe, ni «Ŋëët Wuuö Jwøk, Jwøa kwøw, eni na cïp jwïëy moø, ï ba nääa, niï ba cïba ceŋ jøøi ni many jwïëy moï ii.»

¹⁷Køøre Jeremaya aköö jï Cëdëkiya, ni «Luumma caan Wuuö Jwøki, Jwø Icriel, eni na wïth jammi bëët, beeye en: Ni näk cerï cïpï cïbö møn jï jøøa kwörge døøŋŋø mo nyeny Babiløn, ï bëëdö niï kwøw, ni pääny man ba waaŋ, ni ö ïïni ki jø paarï ni bëëdu nou kwøw.

¹⁸'Ba ni näk cerï ba cïpï jï jøøa kwörge døøŋŋø mo nyeny Babiløn, pääny man cïba ceŋ jø Babiløn, ni waaŋge gø, ni ïïni ki dëërï, ï ba bøth ceŋge.»

¹⁹Køøre nyeya ma Cëdëkiya aköö jï Jeremaya, na «A lwäär ki jø Juuth moa näk ceŋge ege cïbö jï jø Babiløn, kiper kanymør jø Babiløn a 'cïpge ceŋ jøøgø, ni caarge aani.»

²⁰'Ba Jeremaya aköö, ni «Ï ba cïpge ceŋ jøøgø. Beerra man wïnynyï luum Wuuö Jwøk man caana jïrï en; køøre tïmö ni beer kiperï, ni bëëdï niï kwøw.

²¹'Ba ni näk mo ï poot bëëdö niï kweeyø ki man cïpï cerï, luubö mana nyooth Wuuö Jwøki jïra beeye en:

²²Ka adïëri møn, mään bëët moa näk odööŋ paan dwøŋ mar nyeny Juuda okäl wøk ni kïthi baŋ jøøa kwörge døøŋŋø mo nyeny Babiløn. Ni ö määnni moøgø ni cäänge ni köge, «ni ‹Nyïïawäätï moa näk iï ŋäädhö ïïna cøøkge ni böötge ïïni ki luubö; 'ba ennø, kanya tïme ni tietï omwøny onøti, ïïna wecge.›

²³«Mään moï ko obwöre moï bëët okäl wøk ni mëëgi jø Babiløn, ni ïïni ki dëërï ï ba bøth ceŋge. 'Ba ïïno mak nyeny Babilønni, ni ö päänynyi man ni waaŋe.»

²⁴Køøre Cëdëkiya aköö jï Jeremaya, ni «Kär dee ŋat mo ŋäc luup moi na caanø ii, niï ba thøwï.

²⁵'Ba ni näk mo wïny jøøa kwörge døøŋŋø wïnynyö ni aano cäänö ki ïïni, ni öge baŋï ni köge, ni ‹Gïna caanï jï nyeya ki gïna caan nyeya jïrï caanï jïwa; kär dee gïn mooŋï ki waani, niï ba 'näkwa,›

²⁶køøre wärï kööï jïge, ni ‹Mara beeye kwac nyïm nyeya kiper naa ba dwøk øt twöc øt Jönathan, naa ba thøøa kaace.› »

²⁷Køøre jøøa kwörge døøŋŋø bëët aö baŋ Jeremaya ni pëënyge gø; 'ba luup moa caane jïge acaane ki køør luup bëët moa caan nyeya jïre. Køøre bäŋ gïn mo ege caanø ki gø këët, kiper gïna caan Jeremaya ki nyeya kär wïnyö.

²⁸Køøre Jeremaya aput bëëte yi kal mar øt jø koor këël dïcäŋa ö Jerucalemmi na maai yie ki tøŋ.