Read anuak Jeremaya 39 Bible Online

Jeremaya 39 - anuak bible

Jeremaya 39

¹'Ba man beeye jöö mana räny Jerucalemmi ki gø: Kanya tïme na ri bïŋweer cwiiri moa beet Cëdëkiya ni ena nyeny Juuda, yi dwää apaar, Nabukedenecör nyeny Babiløn ki jø leny moe bëët aöö ni cielge Jerucalem dïër.

²'Ba kanya tïm cwiiri na apaar kurciel moa beet Cëdëkiya ni ena nyeya, ni nïr dwää aŋween abïŋween, kiir mar pääny atucge.

³Ni ö jøøa kwörge døøŋŋø bëët mo nyeny Babiløn ni öge ni pïge piny dhi kiir man wø cwøl ni Dhi Kiir Dïër, ni beege Nergal-Carëcër, ki Camgar-Nebø, ki Car-Cekim wïth jø kööre, ki Nergal-Carëcër cuumi mana dwøŋ, ki jøøa kwörge døøŋŋø møga bëët mo nyeny Babiløn.

⁴'Ba kanya ö Cëdëkiya nyeny Juuda ki jø leny moe na jootge jøøgø, gena put bwøk wøk yi pääny ki dï wäär, ni aacge ni ge cøra øtjöö man wø cør ya ajïniin nyeya, ni ge dønyi ka dhi kiir mana en yïthakic kiiri moa na ariiø, ni aacge ki øtjöö ni ge coonya goor Jördan ni wø cwøl na Araaba.

⁵'Ba jø leny mo jø Babiløn aläp køørge, ni maage Cëdëkiya yi pwöl Jerikö Paap Araaba; ni makge gø ni kälge gø Ribala, päänya en yi ŋööm Amath, baŋ Nabukedenecör nyeny Babiløn. Ni ö Nabukedenecörri ni ŋut bäät gø ki luubö.

⁶Køøre nyeny Babiløn wäät Cëdëkiya aŋare nyïm gø Ribala ni nëënö jïre, ni ö eni thuwø ni 'näk jøøa kwörge døøŋŋø bëët mo Juuda.

⁷Køøre eni nyeŋ Cëdëkiya atuunynye, ni twöc gø ko oguut jwëëlli nee kïth Babiløn.

⁸Jø Babiløn thuwø paan dwøŋ mar nyeya ki uudi mo jiy awaaŋge, ni nyaage kiir piny mar Jerucalem.

⁹Ni ö Nabucaradanni kwääc jø koor ni käl jiy moa dööŋ dï pääny, ki jiy moa cïp ceŋge jïre, ki jiy møga moa dööŋ, ni kïth geni Babiløn ni maae ka tøŋ.

¹⁰'Ba Nabucaradan kwääc jø koor, jø møøk moa can døc na näk jïge bäŋ jammi awii yi ŋööm Juuda, ni put geni møyø ki pwöth omøki ki pwöth beel kar kaace.

¹¹'Ba kanyøgø Nabukedenecör nyeny Babiløn acïpö ki dwøl kiper Jeremaya ki bäät Nabucaradan kwääc jø koor, ni kööe,

¹²ni «Lwør Jeremaya ni gwøgï gø, ni bäŋe gïn mo raac mo tïïyï dëëre; 'ba gïn wø manynye wär tïïyï jïre.»

¹³Køøre Nabucaradan kwääc jø koor, ki Nabucacban wïth jø kööre, ki Nergal-Carëcër cuumi mana dwøŋ, ki jøøa kwörge døøŋŋø bëët mo nyeny Babiløn,

¹⁴gena jäägö ki jiy ni kälge Jeremaya wøk ki yi kal mar øt jø koor. Ni cïpge gø cer Gedaliya wär Akikam o Capan, kiper nee kïth paare. Ni ö Jeremaya ni bëëde ki jiy.

¹⁵'Ba kanya bëët Jeremaya noo twöö yi kal mar øt jø koor, dwør Wuuö Jwøk aö bäät Jeremaya, ni kööe,

¹⁶ni «Ciï ni caanï gø jï Ebet-Melek nyï Ithiöpia ni luumma caan Wuuö Jwøki, Jwø Icriel, eni na wïth jammi bëët, beeye en: Ka adïëri møn, aani, luup moa caana kiper pääny man 'käla bääte, ni beege gïï mo leth ni patha gïï mo beyø, ni gïïögø, dïcäŋo täkge yie, tägö ni nëënö jïrï.

¹⁷'Ba a na Wuuö Jwøk, ï piema piemø dïcäŋöca, niï ba cïp ceŋ jøøa lwäärï ki geni.

¹⁸Kiper ka adïëri møn, ï piema piemø, niï ba 'näk. 'Ba jwïëy moï bøth, kiper ï bëëdö niï ŋäätha aani. Luummögø caana Wuuö Jwøki.»