Read anuak Jeremaya 41 Bible Online

Jeremaya 41 - anuak bible

Jeremaya 41

¹'Ba kanya tïme na dwää abïriiø, Icmiel o Nethaniya nyikwaar Elicama na käl ri jø dhi øt nyec, na näk dhaanhø aciel røk kwääc jø koor mo nyeya, aöö ki jiy apaar, ni öge Micpa baŋ Gedaliya wär Akikam. 'Ba kanya cämge na aciel Micpa,

²Icmiel o Nethaniya ki jøøa na apaar na öö ki eni, gena ö maal ni cwøpge Gedaliya wär Akikam o Capan piny ko opëëlle ni 'näkge gø, ni beeye ŋata røøny nyeny Babilønni yi ŋöömö.

³Ni ö Icmielli thuwø ni 'näk jø Juuth bëët Micpa moa bëëdö ki Gedaliya, ki jø leny mo jø Babiløn moa nut kaace.

⁴'Ba gïna tägö, kanya tïme na aruunnø man ni Gedaliya onø 'näk, ni poot bäŋ ŋat mo ŋäc gø,

⁵jiy ma pïërabära aöö ni ge käla Cekam ki Cëëlö ki Cameria, ni jïëc tïkge ege lielø na abïïe moge ege jeeyø ni dëëtge ege ŋarø ki gïï mo beth, ni ge käädö ki muuce mo beel ki gïn wø jïye ŋwääi ni met, kiper nee cïpge yi øt Wuuö Jwøk.

⁶Ni ö Icmielli o Nethaniya ni tïŋŋe Micpa, ni cøøa kuna røømme ki jøøgø, ni cäädhi ni jwöŋö. 'Ba kanya røømme ki geni, ena köö jïge, ni «Ööu ni cou baŋ Gedaliya wär Akikam.»

⁷'Ba kanya tïm jøøgø ni ge pïï dï paac ennø, Icmiel o Nethaniya ki jiye, jøøgø anäkge, ni leeŋge geni yi buur man wø cuŋ pïïyi yie.

⁸'Ba da jiy apaar røk jøøgø moo köö jï Icmiel, ni «Kär wa 'nägï, kiper da beel ka abäy ki mädhi ki kïïnynye mo ewa cooŋ piny mo ewa kanø yïth pwöth.» Køøre jøøgø awiie ni käre nääö kanya 'näk jøøa cäädhö ki geni.

⁹'Ba buur manøgø mana ö Icmielli na leeŋ dëët jiy yie moa nääe beeye buur mo dwøŋ mana koony nyeya ma Aca kanya bëëde ni eni lääŋŋa ööny Baaca nyeny Icriel baŋ leny. Buurögø apääŋ Icmielli o Nethaniya ki jiy moa nääe.

¹⁰Køøre Icmiel jiy bëët moa näk odööŋ Micpa amaae ki tøŋ, ni beege nyïï nyeya ki jiy møga bëët moa en Micpa, na cïp Nabucaradanni kwääc jø koor cer Gedaliya wär Akikam. Icmiel o Nethaniya jøøgø 'akäle ki tøŋ, ni tïŋŋe kiper nee ŋut po jø Amön.

¹¹'Ba kanya ö Jöananni o Karëa ki kwääri bëët mo jø leny moa en buute na wïnyge gïïa reyø bëët na tïïc Icmielli o Nethaniya,

¹²cwøw bëët 'akälge ni aacge kiper nee këëtge ki Icmiel o Nethaniya. Ni maage gø buut puul mana dwøŋ na en Gibien.

¹³'Ba kanya ö jiyi moa mak Icmielli ki tøŋ na jootge Jöanan o Karëa ki kwääri mo jø leny moa öö ki eni, yïthge aput mïnnö.

¹⁴Ni ö jiyi bëët moa mak Icmielli ki tøŋ Micpa ni putge rege løk ni duuge ni cige baŋ Jöanan o Karëa.

¹⁵'Ba Icmiel o Nethaniya ki jiy abära gena päär wøk ki cer Jöanan, ni reŋge po jø Amön.

¹⁶Køøre Jöanan o Karëa ki kwääri bëët mo jø leny moa öö ki eni, jiy bëët moa näk odööŋ Micpa, moa lwørge cer Icmiel o Nethaniya, 'akälge. Jøøgø beege jiy moa mak Icmielli ki tøŋ kanya nø 'näk Gedaliya wär Akikam, ni beege jø leny ki mään ko obwöre ki jø kööre, jøøa duu Jöananni kanya maa geni yie Gibien.

¹⁷Ni tïŋge ni ge cøøa Ijep, ni pïge piny Gëröt-Kimiam, na en buut Bethelem, ni ruuge kaace mëëth.

¹⁸'Ba tier wääth mana cige Ijep kipere beeye kiper mana lwäcge ki jø Babiløn, kiper Gedaliya wär Akikam, na røøny nyeny Babilønni yi ŋöömö, anäk Icmielli o Nethaniya.