Read anuak Jeremaya 42 Bible Online

Jeremaya 42 - anuak bible

Jeremaya 42

¹'Ba kwääri mo jø leny, ni beege Jöanan o Karëa ki Jaadhania wär Ocaya, ki kwääc jø leny møga bëët, ki jiy bëët, ki mana täge ki jiy moa kwörge bäŋgø këël mana pïïe ri jøøa kwörge døøŋŋø, gena ö baŋ nyikuŋ Jwøk ma Jeremaya,

²ni köge jïre, ni «Beerra man wïnynyï kwac marwa, ni lämï kiperwa jï Wuuö Jwøk, Jwøk marï, ni beeye kiper jøøi ii bëët moa dööŋ, kiper beeye waani keerwa na nøk ii na dööŋ røk jøøa thööth, kaawat man nëënwa jïrï ki waŋï ennø.

³Lämï kiper nee Wuuö Jwøk, Jwøk marï, kanyo ciwa yie ki gïno tïïcwa nee nyoodhe jïwa.»

⁴Køøre nyikuŋ Jwøk ma Jeremaya aköö jïge, ni «Gïna caannu awïnynya. Ennø, a lämö jï Wuuö Jwøk, Jwøk maru ki køør luup moa caannu. Gïno løk Wuuö Jwøki kiperu ocaana jïïu. Aani bäŋ luubö mo mooŋa ki uuni na bäre.»

⁵Køøre gena köö jï Jeremaya, «Ni näk mo luubö bäre mar Wuuö Jwøk, Jwøk marï, mano caane jïrï kiperwa ba tïïcwa, beerra man ö Wuuö Jwøki, eni na ŋäc luummögø na adïëri, ni ŋøl mare na kare bäätwa.

⁶Waani Wuuö Jwøk, Jwøk marø, na jääŋwa ïïni baŋe, dwøre wïnywa wïnynyö, na gïn mo ec met ki gø wala ec raac ki gø, kiper nee tïme ni beer jïwa. Ka adïëri møn, waani, dwør Wuuö Jwøk, Jwøk marø, wïnywa wïnynyö.»

⁷'Ba kanya tïme na køør nïne apaar, dwør Wuuö Jwøk aö bäät Jeremaya.

⁸Ni ö Jeremaya ni cwøl Jöanan o Karëa ki kwääri bëët mo jø leny moa öö ki Jöanan, ki jiy bëët, ki mana täge ki jiy moa kwörge therø këël mana pïïe ri jøøa kwörge døøŋŋø,

⁹ni kööe jïge, ni «Mana caan Wuuö Jwøki, Jwø Icriel, eni na jääŋŋu aani baŋe nee kwac maru caana jïre, beeye en:

¹⁰Ka adïëri møn, ni näk mou bëëdö yi ŋöömö man, u tïïa tïïö nou teek, ni ba nyaa uuni. 'Ba tietu këëla piny, ni ba cööda uuni wøk; kiper cwïnya apädhö ki gïna leth na tïïa dëëtu.

¹¹Uuni, käru bëëdö nou lwäär ki nyeny Babiløn, manø ni lwäärru ki gø enø. Käru lwäyö ki eni, kiper a ena buutu, naa peemma uuni ni käla uuni wøk cere.

¹²Aani thuwø, mëër mara nyoodha nyoodhø jïïu, nee eni na nyeny Babiløn mëër mare nyoodhe jïïu, ni dwøk uuni yi ŋöömö maru.

¹³«'Ba ni näk mou köö, ni ‹Wa ba bëëdö yi ŋöömmi en,› nou kwiera dwør Wuuö Jwøk, Jwøk maru,

¹⁴ni kööu, ni ‹Jïwa bäyö, wa cøøa yi ŋööm Ijep, kany mo gïr leny ki dwør tuuŋ leny ba wïnywa yie, na kany mo wa ba 'näk käci yie; wa cøø ni bëëtwa yie,›

¹⁵ka adïëri møn, u na jø Juuda moa näk odööŋ, wïnynyu dwør Wuuö Jwøk. Luumma caan Wuuö Jwøki, Jwø Icriel, eni na wïth jammi bëët, beeye en: Ni näk mo wïthu you këël ri wääth Ijep, ni aayu kiper nou bëëdu kaace,

¹⁶leny mana lwäärru ki gø ööa bäätu yi ŋööm Ijep, ni ö käci mana lwäärru ki gø ni läm køøru kaace Ijep, ni putu thøø kaace.

¹⁷Ni jiy bëët moo këël wïthge ri wääth Ijep nee bëëtge kaace, ge di nääö ko opëëllö, ni thøwge ki käc ki täw mo leth, ni bäŋ dhaanhø aciel dïge mo dööŋ ni kwøw, ni bäŋ dhaanhø mo bøth ki gïna leth noo käla bäätge.

¹⁸Kiper luumma caan Wuuö Jwøki, Jwø Icriel, eni na wïth jammi bëët, beeye en: Aani, räny cwïny mara ki wëër mara 'käla bäätu kanyo pïïyu Ijep, kaawat mana käla wëër mara bäät jøøa bëëdö Jerucalem; ni tïmu ni uuna gïr acïëni, ni jiy cwïnyge böö ki gïno tägi dëëtu, ni tïmu na gïr ajøøŋ na gïr abuua; ni kany ba jootu këët.

¹⁹«Wui, u na jø Juuda moa dööŋ, Wuuö Jwøk acäänö ki uuni ni kööe, ni ‹Käru ci Ijep.› Beerra man ŋäyu gø ni dïcäŋi gïn caana naa köömma uuni.

²⁰Kiper uuni dëëtu acøøgu keeru; beeye uuni na jääŋ aani baŋ Wuuö Jwøk, Jwøk maru, ni kööu, ni ‹Lämï kiperwa jï Wuuö Jwøk, Jwøk marø, 'ba gïno caan Wuuö Jwøki, Jwøk marø, wär caanï jïwa; køøre tïïcwa tïïö.›

²¹'Ba beeye gïnögø na caana jïïu dïcäŋi en. 'Ba mar Wuuö Jwøk, Jwøk maru, käru wïnynyö, ni beege gïïa caane jïra bëët kiper nee caana jïïu.

²²Kiper manøgønø, wär putu ŋäc ennø nou di nääö ko opëëllö, ni thøwu ki käc ki täw mo leth, kanyo manynyu nou cøøa yie enø nou bëëdu yie.»