Read anuak Jeremaya 43 Bible Online

Jeremaya 43 - anuak bible

Jeremaya 43

¹'Ba Jeremaya luupögø bëët acaane jï jøøgø bëët, ni beege luup moa ö Wuuö Jwøki, Jwøk marge, na jääŋ eni ki geni nee caane. 'Ba kanya lønye ki caan luupögø,

²Adhiriya wär Ocaya ki Jöanan o Karëa ki jøw okiera bëët aköö jï Jeremaya, ni «Ïïni, ï caana tööt jaak! Wuuö Jwøk, Jwøk marø, ï käre jääŋŋö baŋwa niï kööï ki waani, ni ‹Käru ci Ijep baŋ bëëtö kaace.›

³'Ba Baruk o Neriya yiï acoone kiper nee wa cïbï ceŋ jø Babiløn nee wa 'näkge ni makge wa ki tøŋ ni kïthge waani Babiløn.»

⁴'Ba Jöanan o Karëa ki kwääc jø leny bëët, ki jiy møga bëët, dwør Wuuö Jwøk mana caane ni bëëtge yi ŋööm Juuda kärge wïnynyö.

⁵'Ba Jöanan o Karëa ki kwääc jø leny bëët, jø Juuda bëët moa dööŋ akälge, ni beege jøøa duuö ki tiet mïëri bëët moa riem geni yïthge na duu yi ŋööm Juuda,

⁶ni beege cwøw, ki mään, ko obwöre, ki nyïï nyeya, ki jiy bëët moa wii Nabucaradanni kwääc jø koor cer Gedaliya wär Akikam o Capan, ni kälge nyikuŋ Jwøk ma Jeremaya ki Baruk o Neriya thuwø.

⁷Jøøgø gena ci Ijep ni dwør Wuuö Jwøk kärge wïnynyö, ni aacge këël mana pïïcge Thapinac.

⁸Køøre dwør Wuuö Jwøk aö bäät Jeremaya ni eni ena Thapinac ni kööe,

⁹ni «Kwäny cerï ki kïte mo døøŋŋø ni mwönï geni piny ko odhöönh kanya näk ocaamø ki thuube na en dhi kal mar paan dwøŋ mar Peerø mana en Thapinac, ni gïnögø tïïyï ni da jø Juuth mo neeta ïïni;

¹⁰ni kööï jïge, ni ‹Luumma caan Wuuö Jwøki, Jwø Icriel, eni na wïth jammi bëët, beeye en: Ka adïëri møn, aani, a jääga baŋ Nabukedenecör nyeny Babiløn, eni na en cera, kiper nee ööe, ni cïba wälu mare bäät kïte moi moa mwön piny kany, ni ö eni ni cwöth oduŋkaany nyec mare piny bäätge.

¹¹Eni öö ni tuk Ijep, ni ö jøøa näk marge thøø ni thøwge, ni ö jøøa näk marge mäk ki tøŋ ni mak geni ki tøŋ, ni ö jøøa näk marge 'näk ni 'näk geni ko opëëllö.

¹²Ni ö eni ni nyep uut juu mo jø Ijep ni waaŋ geni, ni käl juu moge. Eni ŋööm Ijep olwøre ni jööt jaak, kaawat man wø ö dïkwääc dïëki wø rïëba aleeŋŋa dëëre ni jööt jaak, ni ö eni na Nabukedenecör ni døøe ni bäŋ gïn mo tägi dëëre.

¹³Eni thuwø kïte moa näk ocwää maal na bäyö Ijep, na en kany wø wøørge cäŋ yie, tøøe piny, ni waaŋ uut juu mo jø Ijep.› »