Read anuak Jeremaya 46 Bible Online

Jeremaya 46 - anuak bible

Jeremaya 46

¹'Ba dwør Wuuö Jwøk mana caane kiper wïth juurre acaane jï nyikuŋ Jwøk ma Jeremaya,

²ni tägi ka Ijep. Ni mana caane kiper jø leny mo Peerø-Nekø nyeny Ijep, ŋata bööti bäät Naam Upareeti päänya cwøl ni Karkëmec, na bööt Nabukedenecörri nyeny Babiløn kanya tïme na ri ŋweer cwiiri moa beet Jeyöakëmmi o Jöcaya ni ena nyeny Juuda, beeye en:

³«Jiiŋŋu kööde mo leny moa therø ki moa døøŋŋø, ni cou wøk baŋ leny.

⁴Jiiŋŋu okwëënyi ni ethu bäätge. Kïthu cööc nywïëny wïthu, ni maaŋŋu kwöru. Paagu tøøŋi mou, ni røøu abïïk nywïëny mo leny dëëtu.

⁵«?Aŋø, agïnaŋø na tägö ni nëëni jïra enø? Jø Ijep, dëëtge atïmö ni kwanynyi ki lwär, ni døøge ŋäthge. Otëëe mo leny moge abööti, ni bwøkge ni reŋge; ni bäŋ ŋat mo olwïthö ŋääe, ni ö lwärri mo dwøŋ ni pääŋ piny bäre.» Luummögø caana Wuuö Jwøki.

⁶«Ŋata tiere piew ba jöömmi, ni ŋata näk oteeø ba bøth; kanyo enge yie jï løø wï-piny bäät Naam Upareeti, tietge cwanyge cwanynyø ni päänhge.

⁷«?A jøøe ni bwön wøk kaamar pï Naam Ijep ma Nail en, ni ge rïïŋi kaawat man wø rïïŋ pï nämmi mo kwödö ko odhäny?

⁸Jø leny mo Ijep bwönna wøk kaamar pï naam poge ma Nail, ni ge rïïŋi kaawat man wø rïïŋ pï nämmi mo kwödö ko odhäny. Ni köge, ni ‹Wa bwönna wøk, ni pääŋwa piny bäre; ka adïëri møn, päänye bëët ki jø wø bëëdö yïthge raanywa raanynyø.›

⁹Wui, u na jø Ijep mo wø cäädhi ki bäät okwëënyi, ki u ni wø cäädhi ki yïth jïëth leny mo wø tut okwëënyi, pööthu maal ni rïïŋu ki geni døc kaamar ŋwïëc bøøl. Ni ö jø lenynyi mou moa teek, ni beege jø Ithiöpia ki jø Put ni wø käär kööt leny, ki jø Lidiya ni wø thöödhö ka athëëre ni pööthge nyïm.

¹⁰Kiper dïcäŋöce beeye cäŋ mar Kwäärö Wuuö Jwøk, eni na wïth jammi bëët, ni beeye cäŋ mano cool kwöri yie dëët nyïïmän moe. Opëëllö ocämö rege gøøc mano jääŋe, ni mädhe ki rem moge këël mano røme. Kiper Kwäärö Wuuö Jwøk, eni na wïth jammi bëët, ge wëëge ŋaal kaamar olämme yi paano enge yie jï løø wï-piny bäät Naam Upareeti.

¹¹«Wui, u na jø Ijep ni wø caal nyakøø mo dëër dïcwøø poot kuue, cou yi ŋööm Gelät ni lwötu ki jaath man wø rwøth ŋwellø ki gø. Jenni mo thööth apääru ki jaak, 'ba bäŋ køny mo jootu.

¹²Wïth juurre lään wïc maru owïnyge, ni ö pinynyi bäre ni gääbe ko oduuru maru. Kiper oteen leny, oteen leny maya odhïëre, ni päthge bëët karge riet.»

¹³'Ba dwøl mana caan Wuuö Jwøki jï nyikuŋ Jwøk ma Jeremaya kiper ööny Nabukedenecör nyeny Babiløn nee ŋööm Ijep raanynye beeye en:

¹⁴«Gøøu piny Ijep, ni gøøu gø piny Migdöl, ki Mempic ki Thapinac,[17] ni kööu, ni ‹Maaŋŋu kwöru, ni jegu rou, kiper jø mïëri moa karge cään ki uuni bëët athöör opëëllö.›

¹⁵?Aŋø, aperŋø noo ö rwaathi maru man wø lammu noo pädhe en? Eni ba cuŋŋi kare, kiper eno cöör Wuuö Jwøki piny ni pädhe.

¹⁶Jø leny mou tietge ocwanyge, ni ö ŋati man nø ni päth bäät wati, ni köge, ni ‹Ööø maal, waa døø baŋ jø pøø yi ŋöömma nywøl øøni yie, ni ø ŋwieya opëëllö mar nyimän.›

¹⁷Kaace geno jwöŋi ki nyeŋ Peerø nyeny Ijep, ni köge, ni ‹Peerø ŋat ŋwøc jaak, eni cäŋa dee tïïö yie ki gïn mo dwøŋ awëëk pöödhö jaak.› »

¹⁸'Ba Nyeya na näk nyeŋŋe beeye Wuuö Jwøk, eni na wïth jammi bëët, ena kööŋ, ni «Ŋëëta keera, a na Wuuö Jwøk, da ŋat mo öö mo tuga Ijep mo kare dwøŋ, mo caala Kïn Tabör ni wø dwøŋ døc yïthakic kïte, ki Kïn Karmël ni wø en deŋ naama dwøŋ.

¹⁹Wui, u ni wø bëëdö Ijep, japu wär twöyu, kiper u di maaø ki tøŋ ni kïth uuni paac mør. Kiper Mempic ränynyö ni neeruuth, ni bäŋ ŋat mo bëëdö yie.

²⁰«Ijep caala dhieŋ ma nyakøø mo poot mïërö, 'ba lwaa jø leny ööi ki paana en jï løø wï-piny, ni tïïge dëëre ki teeŋ gïn wø tïïc lwaa rumö dëër dhieŋ.

²¹Ni ö jø lenynyi mo wø cun jø Ijepi ki gwel nee këëtge kiperge, na caal nyïïrwädhe mo pulli, ni løkge rege ni reŋge na aciel, ni geni ba cuŋŋi karge. Kiper cäŋ gïï mo leth opïï bäätge, ni beeye cäŋ ajäla mana wäŋŋi kiperge.

²²«Jø Ijep oreŋi kaawat man wø reŋ thwölli ni kudhö, kiper nyïïmän moge ocäänh bäätge ki teek. Geno ööi kaamar jiy mo käädö ki lïge mo cøøa baŋ ŋøt ka aŋøta.

²³Ni raanyge Ijep kaawat man wø ŋøt lul piny, këël na bëët jiyi moe ni thööth ni caala lul mo odhïŋ. Jøøi thööth døc ni kaala lwaa bäänyö, ni geni ba løny ki kwaan.

²⁴Jø Ijep wïthge otïmö ni laay, kanyo cïp geni ceŋ jøw ööi ki jï løø wï-piny.» Luummögø caana Wuuö Jwøki.

²⁵Wuuö Jwøk, Jwø Icriel, eni na wïth jammi bëët, ena köö, ni «Ka adïëri møn, aani, a kännö ka ajäla bäät jwøa cwøl na Amön ni wø en Tëbic, ki bäät Peerø nyeny Ijep ki jø Ijep, ki bäät juu moe ki nyeye moe, ki jø wø ŋääth Peerø bëët.

²⁶Aani, ge 'cïba ceŋ jø wø many jwïëcge, ni beeye cer Nabukedenecör nyeny Babiløn, ki jø kööre moe. 'Ba køør manøce nø, Ijep obeet kaawat mana bëëde dïkwøŋ.» Luummögø caana Wuuö Jwøki.

²⁷«Wui, jø Icriel, u na nyïïkwaac dhaanhnha ma Jeekap, käru lwäyö, ni ba bwøk cwïnynyu; kiper ka adïëri møn, a na Wuuö Jwøk, uuni ki jøw käl dëëtu, u piema piemø paanøgø ni kare bäär ki pou enø, na kïth uuni yie ki tøŋ. Ni ööu, u na nyïïkwaac Jeekap, ni duu pou ni bëëdu mëëth ni uuno nikwak, ni bäŋ ŋat mo wëëk uuni lwär.

²⁸Wui, u na nyïïkwaac dhaanhnha ma Jeekap, käru lwäyö, kiper a nut buutu. Aani, tiet wïth juurre moo riema uuni yïthge bëët raanynya raanynyø na bäre. 'Ba uuni, u ba raanynya bäre. U pwönynya pwönynyö ka ajäla mana näk kare, nou ba wiia ka ajäla.»