Read anuak Jeremaya 48 Bible Online

Jeremaya 48 - anuak bible

Jeremaya 48

¹'Ba man beeye luumma caan Wuuö Jwøki, Jwø Icriel, eni na wïth jammi bëët, kiper Möap, ena köö, «Otïmö ni raac jï Nebø,[18] kiper eno nyak. Ni ö Kiriatayimmi ni maai ki tøŋ, ni lää wïth jiy moa en yie; ni ö jø wø bëëdö kwöra näk ogeerø ni teek ni bwøk cwïnyge, ni tïm wïthge ni laay.

²Möap otïmö ni bäŋ ajiem jïre këët. Jø Ëcbön ogëëmö ki eni, ni köge, ni ‹Ööø maal ni raanynyø gø nee bëëde ni patha paac këët.› U ni wø bëëdö Matmën, wïthu odïïr, ni bëët opëëllö ni caatha køøru.

³Oduuru owïnyi ki Örönaim, ni beeye oduuc ränynyö mo dwøŋ døc.

⁴Jø Möap oränynyi, ni ö nyïïge moa therø ni gööge ko oduuru.

⁵Geno jwöŋi døc ni cwïnyge keecge keeyø kanyo aacge ni ge etha thuur Lukith, ni kanyo løøcge piny yi Örönaim ge poot göö ko oduuc ränynyö.

⁶U na jø Möap, u reeŋø nou ŋwieya jwïëyu, ni bëëdu dï tëën kaamar abuŋŋö.

⁷Uuni ki dëëtu, uuno mak ki tøŋ ni käl uuni, kiper uuna bëëdö nou ŋäätha tïïe mou ki jap kwärö mou. Jwøu ma Kemöc okïth paac mør ni mak ki tøŋ, eni ki dïlämme moe ki jø wø tïny gø.

⁸Jø aranya ööa bäät päänye bëët, ni bäŋe pääny mo bøth. Mïëri moa en ya agäm-kïdi oränynyi, ni ö moa en yi ŋöömma näk ree ee päärö ni ränyge thuwø, kaawat mana caana, a na Wuuö Jwøk.

⁹«Cïpu jï jø Möap ki bwöm kiper nee ge määtge; päänye moge oränynyi, ni bäŋ jiy mo bëëdö yïthge.

¹⁰«Acïëni oen bäät ŋato ba tïïc tïïc mar Wuuö Jwøk ki cwïnye bäre dëët jø Möap; acïëni oen bäät ŋato ba køny rem jøøgø piny ko opëëllö mare.

¹¹«Jø Möap gena bëëdö ni geno nikwak poge ki mana täk paaci, ni ge bëëdö kaamar køøŋø mo onïër piny, mo kär daa yi dak maya; kiper geni, ge kär kïth paac mør ni ge mak ki tøŋ. Kiper manøgønø, ge caala køøŋø mo mete bëëdö kare, ni ŋwäänynye kär wïïtö.

¹²'Ba da nïne mo öö maa jääga baŋge ki jiy, a na Wuuö Jwøk, mo daa geni paac mør kaawat man wø daa køøŋø yi dak mør, ni dööŋ yie ni ŋaam ni nyadhi.

¹³Jø Möap wïthge olää jwøge ma Kemöc kaawat mana ö wïth jø Icrielli ni lääi ya jwøki mana ŋääthge na lamge Bëthël.

¹⁴«?U na jø Möap, aŋø ni wø kööu, ni ‹Waano otëëe, ni waana jiy mo këëdö ki leny mo teek.›?»

¹⁵'Ba mana caan Nyeya na näk nyeŋŋe beeye Wuuö Jwøk, eni na wïth jammi bëët, beeye en, ena köö, ni «Möap oränynyi; kiper jø aranya oci yïth päänye moe ni raanyge geni, ni ö wøpe moa teek ki leny ni nääi.

¹⁶Kar ränynyö mar Möap acäännö, ni beeye kanyo pïïc gïï mo lethi bääte.

¹⁷U ni karu cään ki Möap, u bëët ni wø ŋäc nyeŋŋe, uuno jwöŋi kiper Möap, ni kööu, na ‹Aŋø, teek Möap na caal athøya teek oränynyö nidïï, teega näk caala athøny ajiem jïre.›

¹⁸«Wui, u ni wø bëëdö Dibön, u ööa wøk ki kwör ajiem mou, ni bëëdu yi ŋöömö mo lïëth mo yie da riew. Kiper jøw raany pou ma Möap ööa kuna tukge uuni, ni raanyge kwör gwøk røk mou moa näk ogeerø ni teek.

¹⁹Wui, u ni wø bëëdö ya Aröör, cuŋŋu deŋ jöö nou rääŋö, ni pëënynyu cwøw ki mään mo wø rïŋŋi, mo wø bøth ri leny, ni kööu, na ‹?Agïnaŋø na tägö?›

²⁰'Ba mano løkge, ge köö, ni ‹Möap anyak, ni ö jiyi ni lää wïthge. Uuno jwöŋi ni gööu ko oduuru, ni gøøu gø piny bäät Naam Arnön bäre ni Möap araanynyi.›

²¹«Ajäla öö bäät mïëya en yi ŋöömma näk ree ee päärö, ni beege Olön, ki Jaca, ki Mëpät,

²²ki Dibön, ki Nebø, ki Bëëth-Dibilatayim,

²³ki Kiriatayim, ki Bëëth-Gamul, ki Bëëth-Miyön,

²⁴ki Kiriöt, ki Bödhra, ki päänye bëët moa en yi ŋööm Möap, moa kwörge bäyö ki moa kwörge cärö.

²⁵Möap tuge ocääny wøk, ni ö bääte ni tøyi.

²⁶«Möap wär maathu ki køøŋø ni meere, kiper eni dëëre atïïe ni dwøŋ bääta, a na Wuuö Jwøk; Möap oŋïëli yïth ŋwøk moe, ni ö jiyi ni ŋïërge bääte.

²⁷?Aŋø, ï na Möap en, ï kär bëëdö niï ŋïërö bäät Icriel? ?Aŋø, ena mak dï kuuwe, ni tïme ni gïn wø caanï kipere, wïïï putï ka keny en?

²⁸«Wui, u ni jø Möap, päänye mou weyu wiiø ni cou ni bëëdu yïthakic kïte, ni bëëdu kaamar akuuru man wø geer øde deŋ dhi øt kïdi.

²⁹Gïr atöör mar Möap ŋäcwa; eni koorrø døc. Ni eni ŋäya dëëre keere ni eni töödö, ni dëëre ee tïŋ maal.

³⁰A na Wuuö Jwøk, atöör mare ŋääa, 'ba bäŋ gïn mo duue, ni ŋwøc mare bäŋ gïn mo tïïe.

³¹'Ba kiper gïïögø bëët, cwïnya opädhi kiper Möap, ni jwöŋa kiperge bëët, ni kïmma kiper jøøa en Kir-Ërë.

³²Wui, u na jø Cebama, aani, a jwöŋö kiperu, ni kaala mano jwöŋö kiper jø Jadher. Uuna bëëdö kaamar jaath mo olaak, mo bäädi moe opïï løø naam løøga, ni aacge ni pïïcge Jadhar. 'Ba jø wø raany paac uuno lemge, kaawat man wø lem nyïïjenni.

³³Otïmö ni bäŋ dïlweel mar met ec ki dwør met ec yïth pwöth Möap mo wø ciek ki cam mo päl; kwøŋ otïïa ni bäŋgø yïth dääk nyööbö, ni bäŋ ŋat mo nyööbö këët ki køøŋø mo kwöŋŋö ni yie met. 'Ba këël ge doo kwöŋŋö, kwöŋŋö marge patha mar met ec.

³⁴«Jø wø bëëdö Ëcbön ki jø wø bëëdö Eliyali ge göö ko oduuru ni döötge ena maal døc këël mano wïnye Jäc, ni täge ki Dhöär këël mano pïïe Örönaim ki Ëglat-Celicia, kiper pïï moa en yi waŋ Nimrim otal.

³⁵A na Wuuö Jwøk, jø Möap mo wø cïpi ko olämme jï juu moge kwör lam moa en bäät thuuri, ni wø wääŋge jïge ki gïn wø jïye ŋwääi ni met, raanynya raanynyø.

³⁶«'Ba gïr jø wø bëëdö Kir-Ërë, ki dï Möap bäre, okïïna ki cwïnya kaamar ŋat wø jwøk jwøk thøø ko opelø, kiper jap kwärö moa jootge oränynyi.

³⁷Kiper jiy bëët obëëdö ni wïthge ogwäär wøk, ni jïëc tïkge olielø, ni ceŋge oŋarø ki gïï mo beth, ni keece ege kïth dëëtge na abïïe.

³⁸Yïth uudi mo Möap bëët, ki kwör acooŋe moe, tïmö ni beeye oduuru keere noo wïnynyi, kiper a na Wuuö Jwøk, jø Möap nyadha nyadhø kaawat man wø nyath dak mo bäŋ ŋat mo many gø.

³⁹«A teeŋ nyath mo nyïëdi nø noo nyath jø Möap ki gø! Na ateeŋ jwøk mo nyïëdi noo jwöŋ jiyi kipere! Jø Möap ŋäthge oløkge ki køør mano tïm wïthge ni laay, ni tïmge na gïr abuua, ni ö jiyi bëët mo wø bëëdö buutge ni tïm cwïnyge ni böö ki gïno tägi dëëtge.»

⁴⁰'Ba man beeye luumma caan Wuuö Jwøki, ena köö, ni «Ka adïëri møn, da jø leny mo öö mo läänna kuna tukge Möap, kaamar odhuuth mo bwöpe ee peerø mo läänna baŋ lääy.

⁴¹Päänye mo Möap omak ki tøŋ, ni mak kwör leny moe moa näk ogeerø ni teek. Dïcäŋöca cwïny otëëe mo Möap otïmö kaamar cwïny dhaagø mo ree da mäc lwaar.

⁴²Möap oränynyi ni bëëde ni patha paac këët, kiper dëëre atïïe ni dwøŋ bääta, a na Wuuö Jwøk.

⁴³Wui, u na jø Möap, gïï lwär, ki buur, ka abïëp ena nyïmmu.

⁴⁴Ŋato reŋi ni ŋwieya gïï lwär, pätha yi buur, noo ïnh wøk ki yi buur, omak abïëpi. Kiper a na Wuuö Jwøk, gïï ii okäla bäät jø Möap yi cwiino jääla geni yie.

⁴⁵«Jø Möap moo reŋ Ëcbön, bäätge opädhi, kiper maac otägi ki Ëcbön, paana kwøŋ nyeya ma Cëëwönni bëëdö yie, ni thöör jø Möap, jø wø tïïc okiera.

⁴⁶U na jø Möap, otïmö ni raac jïïu. Uuni ni wø lam Kemöc, uuno ränynyi, kiper wäätu ki nyïïu okïth paac mør ni mak ka tøŋ.

⁴⁷«'Ba kanyo tïme na aŋuun nïne, bëët jø Möap ocäŋa dwøk kare.» Luummögø caana Wuuö Jwøki. Ajäla manøgø beeye mana ŋøl bäät Möap.