Read anuak Jeremaya 49 Bible Online

Jeremaya 49 - anuak bible

Jeremaya 49

¹'Ba man beeye luumma caan Wuuö Jwøki kiper jø Amön, ena köö, na «?Aŋø, Icriel bäŋ nyïïkwaaye? ?Aŋø, Icriel jïre bäŋ lwiidhi? ?Aperŋø nø na ö jø wø lam Milköm ni macge ŋööm Icriel mar jø tuuŋ Gaat en, ni bëëtge yïth päänye moe?

²Kiper manøgønø, ka adïëri møn, da nïne mo öö mo a na Wuuö Jwøk, a kännö ki jø leny mo ge ööi ni ge kudhö ki tuŋi, ni ge ööa kuna tukge Raaba, pääny mar jø Amön. Ni ö päänyögø ni ränynye ni needwöt, ni ö mïëri moa en deŋŋe ni waaŋi. Køøre Icriel ŋöömme olwøre ceŋ jøøa käl gø cere.

³Wui, u ni wø bëëdö Ëcbön, jwöŋu kiper Gaay aränynyö. Wui, u ni wø bëëdö Raaba, jwöŋu, ni kïthu keece dëëtu na abïïe, ni gööu ko oduuru, ni rïïŋu nou duda yi kiir; kiper jwøu ma Milköm okïth paac mør ni mak ka tøŋ, eni ki dïlämme moe ki jø wø tïny gø.

⁴Wui, u na cwïnynyu ogaa wøk en, ni wø ŋääth jap kwärö mou ni kööu, na ‹?Aŋa ni løny jïre ki man thunh baŋwa?› ?Aperŋø ni töödu kiper teek maru en, ni beeye teek mo døøa piny?

⁵'Ba ka adïëri møn, a na Kwäärö Wuuö Jwøk, a na wïth jammi bëët, a känna bäätu ki gïr lwär mo dwøŋ, mo öö ki løøi ki løøi. Uuno riem wøk ni bäŋ ŋat mo lwïthi ŋääe, ni kanyo reŋu, bäŋ ŋat mo rwöp uuni kanya ciel.

⁶«'Ba køør manøce nø, jø Amön bëëtö marge ocäŋa dwøk kare.» Luummögø caana Wuuö Jwøki.

⁷'Ba man beeye luumma caan Wuuö Jwøki, eni na wïth jammi bëët, kiper Ëdöm, ena köö, na «?Aŋø, bäŋ jiy mo wïthge leer këët Tëman?[19] ?Aŋø, pwöc atïmö ni bäŋgø baŋ jøøa nyeŋge reegø? ?A leec wïc marge aränynyö?

⁸Wui, u ni wø bëëdö Didan, u døøa ŋäthu, ni reŋu, ni kanu rou yïth uut kïte, kiper gïn mo leth mano käla bäätu, u na nyïïkwaac Icøø kanyo jääla nyïïkwaac Icøø bëët.

⁹Kany wø ö jiyi wø pønge nyïïjenni, ge wëëö ki mo thenh. Ni kany wø ö kuuwe ki wäär baŋ kwal, ge kwala mo wø manyge keerge.

¹⁰'Ba aani, nyïïkwaac Icøø loonya loonyø na bäre ni jaamma kwöro kange rege yïthge, nee ba lønye jïge ki man kange rege. Jøøa käl dëëre ki tuuŋge ki jiy moa en buutge oraanynyi, ni bäŋe wïïe mo kwøw këët.

¹¹Obwöre mou moo dööŋ piny na kïïe, gwøa gwøø ni bëëtge ni ge kwøw; ni ö määr thuunhnhi mou ni bëënge aani.»

¹²Kiper man caan Wuuö Jwøki en beeye en: «?Ni näk mo jøøa näk athöönh ajäla ba dege maadhø, maathge maadhø, uuno kääŋu nidïï ni ba maathu? U mäthö, ni ba kääŋu ka ajäla.

¹³A na Wuuö Jwøk, aana kööŋ ŋëëta keera, ni Bödhra, pääny Ëdöm, oränynyi ni tïme na gïn mo cwïny jiy böö ki gïno tägi dëëre, na gïr ajøøŋ, na gïr acïëni, ni ö päänye moe bëët ni nigeruuth na bäre bäre.»

¹⁴Aani, da dwøl mo yaa wïnynyö baŋ Wuuö Jwøk; nyïïatwiel dagø moo jääŋŋö baŋ wïth juurre, nee kööe, ni «Ööu maal baŋ leny, ni dwalu rou kanya ciel ni cou kuna tugu Ëdöm.»

¹⁵Ni kö Wuuö Jwøki jï jø Ëdöm, ni «Ka adïëri møn, karu tïïa tïïö ni bäŋgø dï wïth juurre, ni ö jiyi ni taakge uuni.

¹⁶Wui, u ni wø bëëdö yïthakic kïte, ni bäät thuuri moa bäyö you maaø, lwär mana lwäär uuni ki gø, ka atöör mana en cwïnynyu, wïthu amaaŋge. Këël kwör bëëte mou doo ena maal kaamar øt odhuuth, u 'duua pinyi en ki kaace.

¹⁷«Ëdöm otïmö na gïn mo cwïny jiy böö ki gïno tägi dëëre; ni ö jiyi bëët moo pöödhi ki buute ni thäŋ yïthge ni buuge gø kiper gïïa leth bëët noo pïï bääte.

¹⁸Teeŋ gïna tägö dëër Cødam ki Gømöra, ni ränyge ki mïëri moa kwörge cärö ki geni, tägö dëër Ëdöm, ni bäŋ ŋat mo bëëdö yie, ni bäŋ ŋat mo joot kaace.

¹⁹Ka adïëri møn, da jø leny mo öö kaamar ŋuu mo ö wøk ka yi lur Jördan, mo ööa yi ciel mo teek baŋ dïëk, ni ge ööa kuna tukge Ëdöm. Ki nyi kany mo thiinh, jø Ëdöm 'riema wøk ki køør gïno tïïc jøøgø, ni jëëta ki ŋato manynya jaak ni røønya gø kaace. ?Kiper aŋa ni röömi ki aani? ?Na aŋa ni kïth aani kar løøk? ?Na a kwääye mane ni løny jïre ki man pïëme ki aani?

²⁰Kiper manøgønø, wïnynyu gïno tïïc Wuuö Jwøki, ni beeye acaara mare kiper gïno tïïe dëët jø wø bëëdö Tëman ki dï Ëdöm bäre: Ka adïëri møn, obwöre moa therø na en dïge otuut wøk, ni tïm cwïny jiy ni böö ki gïno tägi dëëtge.

²¹Kanyo päth Ëdömmi, piny puta tïmö ni kwanynyi ki dööt jiye. Oduuru mano gøøcge puta wïnyö bäät Naama Kwaar.

²²Ka adïëri møn, jø leny öö ni läänna kuna tukge Bödhra kaamar odhuuth mo bwöpe ee peerø mo läänna baŋ lääy; ni dïcäŋöca cwïny otëëe mo Ëdöm otïmö kaamar cwïny dhaagø mo ree da mäc lwaar.»

²³'Ba man beeye luumma caan Wuuö Jwøki kiper Damacka, ena köö, ni «Jø Amath ki jø Arpat wïthge otïmö ni laay, kiper noo wïnyge waac mo reyø. Cwïnyge opädhi ni bëët cwïnyge ni ba pï piny kaamar naam mo yie da athaga.

²⁴Jø Damacka bäätge opädhi, ni løkge ŋäthge ni reŋge. Cwïnyge obwøk, ni ö lwärri mo dwøŋ ni mak geni, ki rääm mo caala rääm dhaagø mo ree da mäc lwaar.

²⁵Päänyögø, këël na bëëde ni nyeŋŋe owïnyö, ni ec met ki gø, ränynyö.

²⁶Kiper manøgønø, wøpe moe opäänhnhi dï uutjïëthe moe, ni dït wïth jø lenynyi moe bëët dïcäŋöce;

²⁷ni nyeba kiir mar Damacka ki maac, ni ö uut paan dwøŋŋi mo Ben-Adat ni thööri ya maaci.» Luummögø caana Wuuö Jwøki, eni na wïth jammi bëët.

²⁸'Ba man beeye luumma caan Wuuö Jwøki kiper Këdar ki mïëri moa en ya Adhör moa dïïm Nabukedenecörri nyeny Babiløn, ena köö, ni «U ööa maal, ni cou kuna tugu Këdar, nou raanynya jø wø bëëdö jï løø kur tuul-cäŋ.

²⁹Oduŋkaare ki dïëk moge okäl, ni käl gïïa en yïth oduŋkaare moge, ki jammi, ka athïrööle moge. Jiy okwöŋŋi bäätge ni köge, ni ‹Lwär mo dwøŋ piny apääŋe bäre.›

³⁰«Wui, u ni jø Adhör, uuni, u bwøk, ni reŋŋu kany mo bäär, ni bëëdu yïth buri, kiper Nabukedenecör nyeny Babiløn anø cädö nee tïïe dëëtu ki gïn mo leth, ni beeye acaay aranya kiperu.

³¹«'Ba ï na Nabukedenecör en, ï ööa maal, ni ciï baŋ jø wø bëëdö noo nikwak karge, jø wø bëëdö ni bäŋ gïn tägi rege. Geni, bäŋ kiir jïge mo dhøkge da dïdëëdi, ni ge bëëdö kur keerge.

³²Athïrööle moge otwier, ni käl pïïth dhäk moge. 'Ba aani na Wuuö Jwøk, geni ni wø køc jïëc wïthge, ge keetha keethø kwör mo bäyö, ni känna bäätge ki gïï mo leth ki løøi ki løøi.

³³Adhör otïmö na kar bëëtö mar othööe, ni bëëde noo ränynyö na bäre bäre, ni bäŋ ŋat mo bëëdö yie, ni bäŋ ŋat mo joot kaace.»

³⁴'Ba kanya ö Cëdëkiya na täge ki man bëëde ni ena nyeny Juuda, dwør Wuuö Jwøk aö bäät nyikuŋ Jwøk ma Jeremaya kiper Ilam.

³⁵Ni man beeye luumma caan Wuuö Jwøki, eni na wïth jammi bëët, ena köö, ni «Ka adïëri møn, jø Ilam ni wø këëdi ka athëëre oraanynya, jø wø teek dï jø leny moge.

³⁶Aani, a kännö ki jø leny ma dhøgi aŋween mo tuga Ilam, mo ge öö kaamar atuunna, ni ge käla yïth akïï piny karge ŋweeni, ni keetha geni yïth kwörögø bëët. Ni tïme ni bäŋ po wï jur mo jøøa riem wøk ki Ilam ba ci yie.

³⁷Aani na Wuuö Jwøk, jø Ilam cwïnyge owëëga bwøk nyïm nyïïmän moge, nyïm jø wø many jwïëcge; aano kän bäätge ki gïn mo leth ki køør wëër mara ni wø liel kaamar maac. Tøŋ ojääŋŋa køørge këël mano thööra geni.

³⁸Køøre aani na Wuuö Jwøk, wälu mara okëëlla piny Ilam, ni raanynya nyeya mare ki jøøa kwörge døøŋŋø moe.

³⁹'Ba kanyo tïme na aŋuun nïne, bëët jø Ilam ocäŋa dwøk kare.» Luummögø caana Wuuö Jwøki.