Read anuak Jeremaya 50 Bible Online

Jeremaya 50 - anuak bible

Jeremaya 50

¹'Ba man beeye dwøl mana caan Wuuö Jwøki ki dhi nyikuŋ Jwøk ma Jeremaya kiper Babiløn, ni beeye ŋööm jø Kaldia, ena köö,

²ni «Gøøu piny ni køpu gø jï wïth juurre bëët; køpu, ni tïŋu ŋïï maal; kär dee gïn kannu, kööu, ni ‹Babiløn omak ki tøŋ; jwøge ma Bël ni wø cwøl ni Merödak oränynyi ni tïme na gïn mo duua lään wïc, ni ö gïïa tieŋge ni wø lamge ni ränyge ni tïmge na gïï mo duua lään wïc.›

³Kiper wï jur mo käla jï løø wï-piny öö ni tuk Babiløn, ni raany ŋöömö mare bäre, ni bäŋ ŋat mo bëëdö yie. Jiy ki lääy bëët obwøk ni aacge.

⁴«'Ba noo tïme na yïth nïröke, yi kar kaace, jø Icriel oööi, geni ki jø Juuda bëët, ni ge cäädhi ni ge jwöŋö, ni beeye aani na Wuuö Jwøk, Jwøk marge, noo manyge.

⁵Geni, jöör Dhayan opëënyge, ni løøge nyïmge yie, ni öge ni cïpge dëëtge jï Wuuö Jwøk ki køør luubö mano tuutge mo bëëdö na bäre bäre, mo wïc ba wïl ki gø.

⁶«Jiya atïmö kaamar dïëk moo rwäänyö. Gena bwøth dïkwääye moge ki jöö moo gaa wøk, ni tïïcge geni nee wïïrge bäät kïte; ni thääcge bäät kïte ki bäät thuuri, ni wïl wïthge ki kar jwöm marge.

⁷Geni, gena thöör nyïïmänni moge bëët moa joot geni, ni kö nyïïmänni, ni ‹Wa kär bääyö kanya raanywa geni, kiper gena bääyö dëër Wuuö Jwøk ni wø joot adïëri baŋe, eni na Wuuö Jwøk na ŋääth kwäcge.›

⁸«Uuni, u reŋŋa wøk dï Babiløn, ni weyu ŋöömmögø mar jø Kaldia; ni bwödhu maal kaamar nyöök atëëe ni wø kwøŋ bwödhö nyïm dïëk.

⁹Kiper ka adïëri møn, lwaa wïth juurre mo teek døc moa en wï-piny, yïthge otheŋa ni käla geni nee Babiløn tukge. Ni cïïmge rege na dhøgi nee këëtge ki paanøgø, ni makge jiy kaace ki tøŋ ni kälge geni. Gena jiy mo nyeŋge reegø ki thöör ka athëëre, ni ge ba duui ki ceŋge jaak.

¹⁰ŋööm jø Kaldia otwier, ni ö jøw twier gø bëët ni rømge ki jammi. Luummögø caana Wuuö Jwøki.

¹¹«Wui, u na jø Babiløn na twier jap jiya, u bëëdö ni yïthu met nou kanynyø; nou pärö kaamar nyirøøa mo bïëdö yi pwöla, nou kwöŋŋö kaamar thwønh okweeny mo teek.

¹²'Ba kiper gïïa tïïyu yøø, pou ma Babiløn ni caal miiu na nywøl uuni, eno bëëdö ni wïïe laay ni bëët waŋe ni law. Ka adïëri møn, kare otïmö ni thiinh døc dï wïth juurre, ni tïme na paap ma tëën mo bäŋ gïn mo tuy yie.

¹³Ki køør wëër mar Wuuö Jwøk eni ba beet këët, 'ba eni ränynyö na bäre. Ni ö jø wø pöödhi ki buute ni thäŋ yïthge, ni buuge gø kiper gïïa leth bëët noo pïï bääte.

¹⁴«U bëët ni wø thöödhö ka athëëre, dëëtu wär cïïmmu na dhøgi deŋ Babiløn bäre; ni thööyu jiye ka athëëre, ni bäŋe athëëre mo wiiyu, kiper jø Babiløn, gena bääyö dëër Wuuö Jwøk.

¹⁵Uuno twäädu bääte kiper leny ni deŋŋe you wïrö bäre. Babiløn cere ocïbe, ni ö kwör koorri moe ni päthge, ni ö kiirri mare ni nyaai piny. Kiper manøgø beeye cuut kwör mar Wuuö Jwøk. Kwör wär coollu dëëre, ni tïïyu kaawat mana tïïe dëët jiy møøk.

¹⁶Jø Babiløn wär raanynyu, nee bäŋe ŋat mo pïïdhö ki beel, ni bäŋ ŋat mo kääö ki beel. Jøøa path moo bëëdö kaace odøø baŋ jø poge, ni ŋati man nø reŋŋa yi ŋöömme, ni ge ŋwieya jø leny mo wø caan jiy.

¹⁷«Jø Icriel akeeth nyïïmänni, kaamar dïëk moo keeth ŋuuwi. Ŋata kwøŋ geni raanynyø beeye nyeny Aciria, ni ŋata näk aŋuudi na tøc cuuge beeye Nabukedenecör nyeny Babiløn.

¹⁸Kiper manøgønø, luumma caan Wuuö Jwøki, Jwø Icriel, eni na wïth jammi bëët, beeye en: Ka adïëri møn, aani, nyeny Babiløn ki paac mare bäre jääla jäälö, kaawat mana jääla nyeny Aciria.

¹⁹'Ba aani, jø Icriel oduua yi ŋöömö marge, ni bëëtge ni ge cama cam mano ciek bäät Kïn Karmël ki bäät Kïn Baacan, ki caammi moo ciek yi ŋööm Ipariem ki Gelät, mïëya en bäät thuuri.

²⁰'Ba noo tïme ni yïth nïröke, yi kar kaace, gïïa bac jø Icrielli ki raay mo jø Juuda omanynyi, 'ba bäŋgø mo joot; kiper a na Wuuö Jwøk, geni noo wiia na moo dööŋ wëënna wëënnö.

²¹«U cøø ni tugu jø wø bëëdö Merathayim, ni cou ni tugu jø wø bëëdö Peköt. Geni wär 'nägu ni raanynyu geni na bäre, ni tïïyu ka køør gïïa köömma uuni ki ge bëët.

²²Oduuc leny owïnyi dï paac bäre, ki ränynyö mo dwøŋ døc.

²³Babiløn na bëëdö kaamar guduum na raany piny bäre, a teeŋ keethø mo nyïëdi nø noo keethe ki gø! Na a teeŋ ränynyö mo nyïëdi nø mano böö cwïny wïth juurre ki gø!

²⁴Wui, ï na Babiløn, kanya bëëdï ni kuyï, a na Wuuö Jwøk, abïëp aciia kiperï, ni put ï mak. Ïïna joot ni mak ïïni, kiper ïïna bëëdö niï këëdö ki aani.

²⁵Wuuö Jwøk øt tøøk leny mare ajabe, ni käl tøøŋi wøk ni beeye wëër mare, kiper Wuuö Jwøk, eni na wïth jammi bëët, da gïn mo tïïe tïïö dëët jø Babiløn.

²⁶U ni wø bëëdö kwöra bäyö, u cøøa kuna tugu Babiløn; odïï moe wär jaammu, ni cooŋŋu jape na athwöe, ni raanynyu eni na bäre. Kär dee gïn mo weyu jïre.

²⁷Jø leny moe bëët wär 'nägu; geni wär 'nägu kiree! Otïmö ni raac jïge, kiper cäŋ marge aöö, ni beeye cäŋ ajäla mana wäŋŋi kiperge.»

²⁸Dwøl owïnyi, ni beeye dööt jiy moo rïŋŋi noo päny wøk ki Babiløn, ni caange cuut kwör mar Wuuö Jwøk, Jwøk marø, yi Dhayan, ni beeye cuut kwör mar øtø mare.

²⁹Wuuö Jwøk aköö, ni «Jø wø këëdi ka athëëre bëët wär cwøllu, nee öge ni ge thööth kuna tukge Babiløn. Twëëre mou wär tïïyu deŋ kiir mare bäre; kär dee ŋat mo päär wøk. Teeŋ gïna tïïe, coollu dëëre, ni tïïyu ka køør gïïa tïïe bëët; kiper dëëre atïïe ni dwøŋ bäät Wuuö Jwøk, Jwø Icriel na en kur keere.

³⁰Kiper manøgønø, wøpe moe opäänhnhi dï uutjïëthe moe, ni dït wïth jø lenynyi moe bëët dïcäŋöce.

³¹«Wui, Babiløn, ï na paana bëëdö niï töödö, Ka adïëri møn, Kwäärö Wuuö Jwøk, eni na wïth jammi bëët, mare caane caanø dëërï, kiper cäŋ marï aöö, ni beeye kanya wäŋŋi noo jääl ïïni yie.

³²Ï na paac mo töödö en, tierï ocwanyï ni pädhï, ni bäŋ ŋat mo tïŋ ïïni maal; aani, päänye moï nyeba nyebø ki maac, ni ö maaci ni thöör gïïa en deŋge bëët thuwø.»

³³Man beeye luumma caan Wuuö Jwøki, eni na wïth jammi bëët, ena köö, «Jø Icriel ki jø Juuda, gena bëëdö ni geno caarø, ni ge bëëdö ni geno koor jøøa mak geni ki tøŋ, ni kweer jøøgø ki man wecge geni nee aacge.

³⁴'Ba dïkunyi marge teek, ni nyeŋŋe beeye Wuuö Jwøk, eni na wïth jammi bëët. eno pïëmö døc kiperge, nee piny mooe ki jwöm; 'ba wïth jø Babiløn omooe ko okiera.

³⁵«Ajäl thøw tøŋ oen bäät jø Babiløn, jø wø bëëdö dï Kaldia bäre, ki jøøa kwörge døøŋŋø ki jøøa nyeŋge reegø moe bëët!

³⁶Ajäl thøw tøŋ oen bäät ajuuk mo wø køp luup tööt, ojoot møn ni gena bøøre! Ajäl thøw tøŋ oen bäät jø leny moe moa teek, geni, cwïnyge obwøk!

³⁷Ajäl thøw tøŋ oen bäät okwëëc leny moe, ni räny jïëth lenynyi moe mo wø tut okwëënyi! Ajäl thøw tøŋ oen bäät jø leny moa path moa en yie, geno tïmö kaamar mään! Ajäl tøŋ oen bäät jape moa perge leth, ge di twierø!

³⁸Ajäl meel opïï yi ŋöömö mare bäre, pï näm moe otal! Kiper beeye paac mo bëënna juu mo otieŋø, ni wø bøøl ri juu mo otieŋø ni wø duu lwär.

³⁹«Kiper manøgønø, cwëënyi ko odïï bëët obëëdö kaace, ni ö ude thuwø ni bëëtge yie. Ni eni ba beet këët na bäre bäre, ni bäŋ ŋat mo bëëdö yie këël yïth beenhnhe bëët.

⁴⁰Teeŋ gïna tïïc Wuuö Jwøki dëër Cødam ki Gømöra, ni ränyge ki mïëri moa kwörge cärö ki geni, tägö dëër Babiløn; ni bäŋ ŋat mo bëëdö yie, ni bäŋ ŋat mo joot kaace. Luummögø caana Wuuö Jwøki.

⁴¹Ka adïëri møn, da wï jur mo öö ki wï-piny, ni beeye wï jur mo teek ki nyeye mo thööth mo yïthge otheŋø mo käla kany mo bäär.

⁴²'Ba ceŋge da athëëre ki tøøŋi. Gena jiy mo 'näk marge raac døc, ni cwïnyge ba pädhi ki 'näk dhaanhø, ni döötge lwör ni caala pï naama dwøŋ. Ge cäädhi ka bäät okwëënyi, ni dëëtge ege täärö kiper leny, ni ge ööa kuna tukge ïïni, ï na Babiløn.

⁴³Nyeny Babiløn gïna caan kiper jø leny moøgø awïnynye, ni ö bääte ni pädhe; ni ö lwärri mo dwøŋ ni mak eni, ki rääm mo caala rääm dhaagø mo ree da mäc lwaar.

⁴⁴«Ka adïëri møn, da jø leny mo öö kaamar ŋuu mo ö wøk ka yi lur Jördan, mo ööa yi ciel mo teek baŋ dïëk, ni ge ööa kuna tukge Babiløn. Ki nyi kany mo thiinh, jø Babiløn 'riema wøk ki køør gïno tïïc jøøgø, ni jëëta ki ŋato manynya jaak, ni røønya gø kaace. ?Kiper aŋa ni röömi ki aani? ?Na aŋa ni kïth aani kar løøk? ?Na a kwääye mane ni løny jïre ki man pïëme ki aani?

⁴⁵Kiper manøgønø, wïnynyu gïno tïïc Wuuö Jwøki, ni beeye acaara mare kiper gïno tïïe dëët jø Babiløn, yi ŋööm Kaldia bäre. Ka adïëri møn, obwöre moa therø na en dïge otuut wøk, ni tïm cwïny jiy ni böö ki gïno tägi dëëtge.

⁴⁶Kanyo kwöŋ jiyi, ni ‹Babiløn amak ki tøŋ,› piny puta tïmö ni kwanynyi, no oduuru mano gøøcge puta wïnyö yïth mïëc wïth juurre.»