Read anuak Jeremaya 7 Bible Online

Jeremaya 7 - anuak bible

Jeremaya 7

¹Man beeye dwøl mana ö baŋa, a na Jeremaya, na käl baŋ Wuuö Jwøk,

²na kööm aani kiper naa cuŋŋa dhi kal mar øtø mare, e na Wuuö Jwøk, ni køba luummi en kaace, ni kööa, ni «Wïnynyu luum Wuuö Jwøk, u na jø Juuda bëët mo wø dønyi ki dhøk kal moi nee Wuuö Jwøk wøørru.

³Mana caan Wuuö Jwøki, eni na wïth jammi bëët, eni na Jwø Icriel, beeye en, ena köö, ni ‹Tiirru jöör bëëtö maru ki tïïe mou; køøre aani, u wëëga bëëtö kany.

⁴Käru ŋäädhö ki luup cwøk nou cäänö, ni «Bäŋ gïn mo tägi dëëtø, kiper kany beeye kanya en Øt Wuuö Jwøki yie.»

⁵'Ba ni näk jöör bëëtö maru ki tïïe mou you tiirø møn, ni ŋøllu luup na karge yïthakic jiy,

⁶ni juurre mo wø bëëdö dïïu ki kïïe ki määr thuunhnhi ba caaru, ni rem jiy mo bäŋ gïn mo ege baaø ba kønynyu piny kany jaak, ni ba cäädhu køør juu møøk mo käla ränynyö bäätu,

⁷aani, u wëëga bëëtö kany yi ŋöömö mana cïba jï kwäyu cøøn nee bëëde na marge na bäre bäre.

⁸« ‹'Ba ennø, u poot bëëdö nou ŋäätha luup cwøk mo bäŋ gïn kønyge dëëtu.

⁹Uuni, u wø kwädö, ni nääu ki jiy, ni kännu ki lugi, ni kööŋŋu ki tööt, ni waaŋŋu gïn wø jïye ŋwääi ni met jï jwøa cwøl ni Baal, ni cäädhu køør juu møøk mo käru kwøŋ ŋäc dïkwøŋ.

¹⁰'Ba u wø öö ni cuŋŋu nyïma yi øtø man ni wø cwøl ri nyeŋŋa en, ni kööu, ni «Waani, wa piem Jwøki piemø.» ?Aŋø, u piem kaper nou bëëdö nou tïïya gïï mo yia raac ki ge?

¹¹?Aŋø, øtø man ni wø cwøl ri nyeŋŋa en bëëdö na kar dïmute ki jïïu? Ennø, aani, a na Wuuö Jwøk ni cäänö en, gïïa tïïyu ajooda.

¹²« ‹'Ba ennø, cou kar lam na en Cëëlö, na näk yaa kwøŋ jier nee nyeŋŋa bëëde ni ŋäc yie, ni neennu gïna tïïa kaace ki køør rääö mar jiya ma jø Icriel.

¹³'Ba uuni, gïïögø bëët atïïyu, ni käru dwøra wïnynyö kanya köömma uuni kwöre mo thööth, ni bäŋe dwøl mo you løø jïra kanya cøøra uuni.

¹⁴Kiper manøgønø, teeŋ gïna tïïa dëër Cëëlö otïïa dëër øtø man ni wø cwøl ri nyeŋŋa, ni ŋääthu en, ki dëër paani en na cïba jïïu ki jï kwäyu.

¹⁵Ni riemma uuni buuta kaawat mana riemma nyïïmëëgu ma nyïïkwaac Ipariem.› » Luummögø caana Wuuö Jwøki.

¹⁶'Ba Wuuö Jwøk aköö jïra, ni «Ï na Jeremaya en, kärï lämö kiper jøøi ii, ni ba tïŋï dwørï maal niï jwöŋö niï lämö kiperge; kär a kwaayï kiperge, kiper lam marï ba wïnynya.

¹⁷?Aŋø, gïï wø tïïcge dï päänye mo Juuda ki dï uutjïëthe mo Jerucalem kärï joodø?

¹⁸Obwöre wø möödö ki jenni, ni ö wëëe ni äpge mäc, ni ö määnni ni cuutge ki muunni nee tïïge ki dääpe[5] jï jwøa cwøl ni Gwanynyø Mar Maal, ni kunyge piny ki køøŋø jï juu møøk, ni ge raanynya cwïnya.

¹⁹?Aŋø, ki jïge ni ge raanynya cwïnya? ?Aŋø, ge ba raany dëëtge keerge ni ge käla lään wïc bäätge?

²⁰«Kiper manøgønø, mana ŋøla, a na Kwäärö Wuuö Jwøk, beeye en: Wëër mara ki räny cwïny mara öö bäät paani en, ki bäät jiy ki lääy, ki bäät jer paap ki caammi mo wø ciek yi ŋöömö; ni tïm wëërri mara ni wääŋö ni liel bäätge kaamar maac mo ba løny ki bïp këët.»

²¹Luumma caan Wuuö Jwøki, eni na wïth jammi bëët, eni na Jwø Icriel, na caane ki räny cwïny, beeye en, ena köö, ni «U na jiya, rïk olämme mou moa dou waaŋø bäre jïra, dwallu gø ko olämme møga wäne, ni cammu geni jaak!

²²Aani, kanya käla kwäyu wøk ki Ijep, a kär laar cäänö ki geni ki man köömma geni kiper luum olämme mo wø waaŋ bäre ki luum olämme møga.

²³'Ba gïna köömma geni ki gø beeye en, aana köö, ni ‹Wïnynyu dwøra, 'ba aani, aano bëëdö ni aana Jwøk maru, ni bëëdu ni uuna jiya, ni cäädhu ki uutjïëthe bëët moa köömma uuni ki ge, nee bëëtö maru tïme ni beer.›

²⁴'Ba mara kärge wïnynyö, ni ïthge kärge ciiø ki dwøra, 'ba gena tïmö ni ge cäädhi ka køør acaare moge, ki køør teek wïc marge na öö ki køør rääö mana en cwïnyge; ni bëëtö marge ba cääth maal, 'ba døøa piny.

²⁵'Ba ki mana täge ki kanya ö kwäyu wøk ki Ijep këël mana këët dïcäŋi en, aana bëëdö ni jiya ma nyïïkuk Jwøk 'moa bëët, jääŋŋa jääŋŋö baŋu cooth.

²⁶'Ba uuni, mara käru wïnynyö, ni ïthu käru ciiø ki dwøra, 'ba wïthu adøøyu mo teek, ni tïïu ki gïï mo reyø mo kaala moa tïïc kwäyu.

²⁷«'Ba ï na Jeremaya en, luupögø bëët caanï caanø jïge, 'ba marï ba wïnyge. Ge cwølï cwølø, 'ba bäŋ dwøl mo duuge baŋï.

²⁸Køøre ï köö jïge, ni ‹Paac man beeye paac mo luum Wuuö Jwøk, Jwøk mare, ba wïnynye, ni käre pwöc mare na leth wïnynyö thuwø; ni ö adïëri ni rwäänye, ni tïme ni bäŋ ŋat mo cäänö ka adïëri.

²⁹U na jø Jerucalem, gwääru wïthu wøk ni wetu ge, ni jwöŋu bäät thuuri moa leer, kiper Wuuö Jwøk beenhnhø maru man na wëëre ki gø anø kwiere ni wec gø.› »

³⁰Ni kö Wuuö Jwøki, ni «Jø Juuda atïïö ki gïï mo neeni ni reyø ki jïra; gïïa näk ec raac ki ge acïpge yi øtø mana cwøl ri nyeŋŋa, ni ge tïïya gø ni ba waany.

³¹Gena gëëdö ki kwör lam kanya cwøl ni Töpeth, na en ya agäm-kïdi mana cwøl ni Ben-Inöm, kiper nee wäätge ki nyïïge waaŋge no olämme kaace, ni gïnögø beeye gïn mo ge kära köömmö ki man tïïcge gø, na acaac gïnögø bäŋgø mo oö wïïa thuwø.

³²Kiper manøgønø, da cääŋŋe mo ööi, mo kaace ba cwøl këët ni Töpeth wala Agäm Kïn Ben-Inöm; 'ba ocwøl na Agäm Kïn Kar Ŋaal Jiy, kiper jiy okoony Töpeth këël kanyo pääŋe ni bäŋ kany kuny yie.

³³Ni tïm dëët jøw othøw na cam jï wec maal ki lääc paap, ni bäŋ ŋat mo riem geni.

³⁴'Ba kar kaace dïlweel mar met ec, ki dwør met ec, ki kanynyø mar nywöm oraanynya dï Jerucalem ki yïth päänye mo Juuda møga bëët, kiper paac bäre oränynyi.» Luummögø caana Wuuö Jwøki.