Read anuak Jeremaya 8 Bible Online

Jeremaya 8 - anuak bible

Jeremaya 8

¹Ni kö Wuuö Jwøki, ni «Kar kaace cuu nyeye mo Juuda, ki cuu jø kööre moge, ki cuu dïlämme, ki cuu nyïïkuk Jwøk, ki cuu jø Jerucalem okuuny nyïïmänni moge wøk ki yïth bwör moa näk geno koony yïthge.

²Ni keethge cuu piny, ni nëënö jï cäŋ ki dwääy ki ceer, ni beege gïïa en cwïnyge køørge na lamge, na caathge køørge, na manyge, na wøørge. Cuu moøgø ba cooŋ kanya ciel ni ba koony piny; 'ba geno tïmö kaamar wär mo oker piny jaak.

³Jiy mo odööŋ røk jøøi na reyø ii, ni beege mo odööŋ kwöro riema geni yïthge bëët, otïmö ni ge para thøø buut kwøw.» Luummögø caana Wuuö Jwøki, eni na wïth jammi bëët.

⁴'Ba Wuuö Jwøk aköö jïra, ni «Ï na Jeremaya en, caanï jïge ni luumma caan Wuuö Jwøki beeye en, ena köö, «na ‹?Aŋø, kany wø päth jiyi, ge bäŋ wø duu maal? ?A ni näk mo dhaanhø ogaa wøk, eni bäŋ wø duu diër?

⁵?'Ba aperŋø nø na ö jøøi na jø Jerucalem ii ni gaage wøk ki gaan wøk mo bäŋ cuŋŋe en? Geni cwïnyge onieŋ køør cwøk døc, ni kweerge ki man duuge baŋa.

⁶Aani, ïtha aciia ni wïnynya luup moge, 'ba ge cara luup mo patha adïëri. Bäŋ ŋat mo cwïnye opädhö ki bääyö mare, mo wïïe ee parø ki gïna raac na tïïe. ŋati man nø atïmö ni lääta køør gïï wø manynye kaamar okweeny mo lääta baŋ leny.

⁷Këël ajaak ni wø määdö maal kany wø duue yie ki yi cwiir ŋääe, ni ö oluua ka agwëëi ko ojwägi ni gwøkge kar wääth marge; 'ba jiya ciik 'moa, a na Wuuö Jwøk, ba gwøkge.

⁸« ‹?Aŋø, u kööu nidïï ni wïthu leer, ni ciik Wuuö Jwøk nut jïïu? Kiper ennø, luup moa göör jø wø caan tiet ciik Jwøk, ciik awiilge ni tïïcge gø na luum tööt.

⁹Jøøa köö ni wïthge leer, wïthge olääy; cwïnyge obwøk ni mak geni. Neenï, gena kweer ki luum Wuuö Jwøk. ?'Ba a teeŋ leec wïc mo nyïëdi nø ni en jïge?

¹⁰Kiper manøgønø, määrge omëëga jø møøk, ni cïba pwöth moge jï jøw oööi noo mac paac. Kiper ki mana täge ki jiy moa kwörge bäŋgø, këël mana pïïe ri jøøa kwörge døøŋŋø, ŋati man nø cwïnye atïmö ni päl ki jammi mo wø joot ki jïëth atade. Këël nyïïkuk Jwøk ki dïlämme bëët, ŋati man nø atïmö ni tïïya tïï cwøk.

¹¹Gïï wø raany paac ataakge na gïn mo jööt jaak, kaawat man wø taak ŋwellø dëër dhaanhø, ni ge wø köö, ni «Paac beer jaak,» këël na bëëde ni bëët paac raac.

¹²?Aŋø, wïthge alääö ki gïna tïïcge na raac eci ki gø? Jïre bäär, wïthge kär lääö na bäre, ni nyeŋge kär tïmö ni law. Kiper manøgønø, kanyo jääla geni, ge puta ränynyö, ni thøwge ki jiy na aciel.

¹³Geni, ge raanynya raanynyø na bäre, ni tïmge kaamar omøk mo bäŋ nyïëdi bääte, ni tïmge thuwø kaamar olaam mo bäŋ nyïëdi bääte, mo bøøkge onär, ni ö gïna cïba jïge ni käli wøk ceŋge.› » Luummögø caana Wuuö Jwøki.

¹⁴'Ba jø paac aköö, na «?Aperŋø ni poodø nøø bëëdö jaak en? Cooŋø røø kanya ciel, nee ø cøø yïth päänye moa no ogeerø ni teek, nøø thumø ki thøø kaace. Kiper Wuuö Jwøk, Jwøk marø, marø anø ŋøl yi thøø, ni eni cïpa pïï mo rege da cïm jïïø nee maadhø, kiper mana bääyø dëëre.

¹⁵Øøna bëëdö ni ø koora bëët-mëër, 'ba bäŋ gïn mo beer mo oöö; ni koorø døøn paac kare, 'ba ennø, atïmö ni nuta lwär keere.

¹⁶Da dööt okwëënyi mo jø leny mo nyïïmän mo wïnyö ki Daan; ni piny bëëdö ni miel ki dööt okwëënyi moge. Ni ö nyïïmänni ni raanyge piny ki japa en yie bëët, këël päänye ki jø wø bëëdö yïthge bëët.»

¹⁷«'Ba ennø, dëëci jääŋŋa jääŋŋö dïïu kaamar thwöre, ni ge caala thwöre mo cïm marge raac døc mo ba løny ki geeŋ, ni öge baŋu kaamar thwöre mo kääö.» Luummögø caana Wuuö Jwøki.

¹⁸Aani, kïmmö mara ba løny ki jook, ni cwïnya bëëdö ni peek bäre!

¹⁹Ennø, kwac mar jø powa awïnyö ki paac mo kare bäär, ni ge köö, na «?Aŋø, Wuuö Jwøk ba en pøø Dhayan? ?Aŋø, eni na nyeny Dhayan tøør paare?» 'Ba aløk Wuuö Jwøki, na «?Aŋø, aperŋø ni bëëtge ni ge raanynya cwïnya ki køør juuga näk otieŋø na näk oballe na kälge ki baŋ juurre?»

²⁰Ni ŋur jiyi, ni «Kar kac ki beel anø pöödhö, këël ki kar caammi møga bëët, 'ba wa kär piemø.»

²¹Aani, cwïnya aränynyö kiper ränynyö mar jø powa. Aana tïmö naa kïmmö, ni bëëda ni yia othäŋŋö.

²²?Aŋø, bäŋ jaath yi Gelät man wø rwøth ŋwellø ki gø? ?Aŋø, bäŋ rëëm ŋwellø kaace? ?Aperŋø nø ni bëët jø powa ni ŋwiili moge ba caŋŋi en?