Read anuak Jeremaya 9 Bible Online

Jeremaya 9 - anuak bible

Jeremaya 9

¹Wui, aperŋø ni ba tïm wïïa na iith en, na aperŋø ni ba tïm pï nyeŋŋa na jøøro en, naa jwöŋa ki yi cäŋ ki yi wäär bäre kiper jø powa na ŋalli!

²Wui, aŋø ni ba tïme ni da abïla jïra mo bëëda yie dï paap en, mo caala kany wø but jø wääthi yie, naa paanya raa buut jø powa ni wiia geni! Kiper gena jø lugi bëët, ni gena lwaa jiy mo tïïö ki gïï mo reyø ki piny.

³Ni kö Wuuö Jwøki, ni «Jiya rege ege jiiŋŋö ki man caange luup tööt, ni paac marge käärge ka jöör cwøk, ni patha jöör adïëri. Kiper ge wø løøŋŋa bäät gïïa reyø, ni kweerge ki man ŋäcge aani, a na Wuuö Jwøk.

⁴Beerra man ö ŋati man nø ni gwøk ree ki wati; kär dee ŋat mo ŋääth coki, kiper cöögö man nø bëëdö ni cøøga coki, ni wat man nø wïïrö jaak ni waya nyeŋ wati.

⁵Ni ö ŋati man nø ni bëëde ni cøøga wati, ni bäŋe ŋat mo cäänö ka adïëri. Lëëpge aŋiicge ki car tööt, ni öölge dëëtge ki tïïc gïï mo reyø.

⁶'Ba ï na Jeremaya, kar bëëtö marï ena dï jø cwøk, ni geno kweer ki man ŋäcge aani ki køør cwøk moge.» Luummögø caana Wuuö Jwøki.

⁷Kiper manøgønø, luumma caan Wuuö Jwøki, eni na wïth jammi bëët, beeye en, ena köö, ni «Ennø, ge päära päärö ki gïï mo leth kaamar ŋat wø päär nywïënyö ki maac, ?kiper gïn mør mo daa tïïö kiper jiya agïnaŋø?

⁸Lëëpge caala atheerø mo 'näk mare raac døc, ni ge wø cara cwøk. ŋati man nø wø cäänö ki dhee ki wati kee cäänö ka mëër, 'ba ki yi cwïnye eni wø cädö ki gïï mo reyø mo tïïe dëër gø.

⁹?Aŋø, ge ba jääla gø nidïï kiper teeŋ gïïögø? ?Aŋø, gïnögø ba coola gø nidïï dëër paac mo temma teeŋ gïïögø?» Luummögø caana Wuuö Jwøki.

¹⁰Aani, a jwöŋö ni kïmma kiper powa bäre, këël kïte moa en yie, ni gööa ko oduuru kiper kwör kwaath na en dï paap, kiper gena ränynyö, ni bäŋe ŋat mo ci yïthge, ni bäŋe dwør dhieŋ mo wïnyi. Ni ö wenynyi ki lääy bëët ni bwøkge ni aacge.

¹¹Ni kö Wuuö Jwøki, ni «Jerucalem otïïa nee neeruuth, ni tïme na kar bëëtö mar othööe; ni tïïa päänye mo Juuda nee ränyge, nee bäŋe jiy mo bëëdö yïthge.»

¹²?Aŋa nø ni wïïe leer, ni ŋäc tier gïnögø? ?Na aŋa nø na cään Wuuö Jwøki ki gø, nee luum Wuuö Jwøk købe? ?Na aperŋø na räny ŋöömö ni tïme kaamar paap mo bäŋ dhaanhø mo ci yie en?

¹³Ni løgi ya Wuuö Jwøki, ni «Beeye kiper mana wecge ciik 'moa na cïba jïge, ni kärge dwøra wïnynyö, ni kärge cäädhö ki køør ciik 'moa,

¹⁴'ba ge caatha køør teek wïc marge, ni caathge køør juuga cøøri ni Baalli thuwø, na ö wëëkge na pwönyge geni ki ge.»

¹⁵Kiper manøgønø, luumma caan Wuuö Jwøki, eni na wïth jammi bëët, eni na Jwø Icriel, beeye en, ena köö, ni «Ennø, jøøi tïïa tïïö nee gïï mo leth mo caala lweet jenni mo keec, ki pïï mo rege da cïm belge.

¹⁶Ni keetha geni dï wïth juurre mo kucge, mo kuc wëëkge thuwø. Ni jääŋŋa tøŋ køørge këël mano thööra geni.»

¹⁷Mana caan Wuuö Jwøki, eni na wïth jammi bëët, beeye en, ena köö, ni «Cädu kiper gïno tägi, ni cwøllu mään moa näk ŋäc jwøk thøø, ni beege määra nyeŋge reegø ki jwøk thøø, nee öge.»

¹⁸Ni kö jiyi, ni «Beerra man laarge rwänhnhö, ni jwöŋge kiperø, ni ø jwöŋö thuwø ni pï nyeŋŋø øøya piny.

¹⁹Kiper dööt jiy mo göö ko oduuru wïnyö ki Dhayan, ni ge köö, ni ‹Øøna ränynyö na bäre, ni lää wïthø døc; kiper ŋöömö marø awiiø, ki køør mana nyaage kwör bëëte 'moø piny.› »

²⁰Wui, u na mään en, wïnynyu dwør Wuuö Jwøk, ni cegu ïthu ki luubö man wø ö wøk ki dhee. Pwönynyu nyïïu ki jwøk thøø, ni ö ŋati man nø ni pwöny wati ko oduuc thøø.

²¹Kiper thøø kare anø cäännö, ni nø pïïe dhøk awëërnyeŋŋi moø, ni døny kwöra näk ogeerø ni teek, ni thöör obwöre dï paac, ni thöör cwøw moa teek kwör acooŋe.

²²Mana caan Wuuö Jwøki nee caana beeye en, ena köö, ni «Rïk dëët jiy moa näk othøw obëëdö kaamar wär piny jaak dï pwöla, ni bëëtge kaamar oraae mo odööŋ piny køør ŋat kac, ni bäŋ ŋat mo cooŋa geni.»

²³Mana caan Wuuö Jwøki beeye en, ena köö, ni «Ŋat mo wïïe leer kär töödö kiper leec wïc mare, ni ŋat mo oteeø kär töödö kiper teek mare, ni ŋat mo okwär kär töödö kiper kwär mare;

²⁴'ba ŋat mo töödö, wär tööde kiper mana näk mo wïïe da acaara ki man ŋäc aani, a na Wuuö Jwøk, ni ŋäc gø ni beeye aani ni wø nyooth mëër man wø ba jøøl, ka adïëri ki bëënynyö bäät piny, kiper yia wø met ka teeŋ gïïögø.» Luummögø caana Wuuö Jwøki.

²⁵'Ba Wuuö Jwøk aköö, ni «Ennø, da cääŋŋe moo ööi kanyo jääla jøøa näk odaŋø, na näk cwïnyge kärge cïbö jïra,

²⁶ni beege jø Ijep, ki jø Juuda, ki jø Ëdöm, ki jø Amön, ki jø Möap, ki jiy bëët mo wø bëëdö dï paap ni wø køc jïëc wïthge kiper juu moge. Kiper wïth juurre moøgø bëët bëëdö kaamar jiy mo kär daŋø, ni jø Icriel thuwø bëëdö kaamar jiy mo kär daŋø, kiper cwïnyge kärge cïbö jïra.»