Read anuak Wëël Kïmmö 1 Bible Online

Wëël Kïmmö 1 - anuak bible

Wëël Kïmmö 1

¹Wui, pääny Jerucalem adööŋ keere nø, eni na bëëdö ni yie päŋ ki jiy! Ena dööŋ keere kaamar cï thøø, eni na bëëdö na pääny mo dwøŋŋa eni dï wïth juurre! Eni na bëëdö ni kare dwøŋ dï mïëri, ena tïmö na laŋ tïïc!

²Eni jwöŋi ni keeya yie ki wäär cooth, ni bëët pï nyeŋŋe ni muulö ki pïte. Eni bäŋ cøm cwïny mo joode baŋ mïëri moa mëëre ki ge, ena nøøn mïëri bëët moa näk ee døøc nyïïawääte, ni tïmge na nyïïmän moe.

³Juuda amak ki tøŋ ni bëëde ki bëëtö mo leth ki tïïc mo teek, ni bëëde yïthakic wïth juurre, ni bäŋ kany jwöm ree yie. Ena mak jøøa ŋwiec køøre bëët, kanya bëëde ni bäŋ jöö mo cøre.

⁴Nyeŋ jïëthe mo Dhayan[1] bëëdö ni kïmmö, kiper bäŋ jiy mo cur yïthge mo wönnö ka ajwöm. Dhøk kiir moe bëët oränynyö, ni bëët dïlämme moe ni ge jwöŋö, ni ö nyïïakuue moe ni bëëtge ni ge kïmmö, ni ö eni ni bëëde ni keeya yie.

⁵Nyïïmän moe atïmö na kwääri bääte, ni tïm nyïïmänni moøgø ni bëëtö marge jööt jaak. Kiper Wuuö Jwøk beeye na tïïc caarø mar gø kiper raay moe na thööth. Obwöre moe amak ki tøŋ, ni bëëtge na laaŋe jï nyïïmän.

⁶Ajiem kwär mar Dhayan bäre aränynyö. Kwääri moe atïmö kaamar röönne mo kär jïtö ki kany cämge yie ki luum. Gena rïïŋö ni bäŋ teek dëëtge nyïm jøøa ŋwiec køørge.

⁷Jerucalem yïth nïr beede na nïr caarø ii ki nïr thääyö wïïe di parø ki bëëtö mare na beer na beede yïth nïra dïkwøŋ. Kanya päth jiye cer nyimän, bäŋ ŋat mo køny eni. Ena raŋ nyïïmänni moe, ni ŋeethge ki gïr ränynyö mare.

⁸Jerucalem atïïö ki raay mo døøŋŋø døc ni put tïmö ni ba waany. Ena jar jøøa wøør eni bëët, kiper mana jootge gø ni bëëdö ka dëëre. Këël eni ki dëëre, ena cooyø ni wïïe ee løø wøk.

⁹Gïna tïïc gø ni ba waany nëënö dëër abïïne, 'ba eni kär cädö kiper yi nyïme. Ena pädhö ki pädhö mo thääŋa ec, ni bäŋ ŋat moo cøm cwïnye. Ni kööe, ni «Wui Wuuö Jwøk, neen caarø mara, kiper nyimän mara böödö eni.»

¹⁰Nyimän cere akïth baŋ jammi mo Jerucalem moa perge leth. Eni na Jerucalem wïth juurre ajoode ni dønynya kuna tukge øt lam mare na en kur keere, jøøa kööm Wuuö Jwøki ni kärge døny ya acooŋ jiye.

¹¹Jiy moe bëët cooyø ni ge manynya cam, ni wiilge japge moa perge leth ki cam, nee bëëtge ni ge kwøw. Ni köge, ni «Wui, Wuuö Jwøk, neenï, ni raŋï gø, kiper waano jarø jaak.»

¹²«?Aŋø, u ni wø pöödhi ki buuta en, ki jïïu ni man beeye gïn mo bäŋ tiere jaak? Neennu, ni raŋŋu gø, ?aŋø, da teeŋ caarø mo otïïö mo caala mara man no otïïö dëëra en, ni beeye mana tïïc Wuuö Jwøki dëëra yi cäŋ wëër mare ni wø liel kaamar maac?

¹³«Eni maac ajääŋŋe ki maal, ni jääŋ gø yïth cuu 'moa. Eni thøøl aciie kwör tieta, ni tïïc aani naa duua ŋääa, ni tïïc aani naa ränynya, naa tuu ki yïth nïne bëët.

¹⁴«Raay 'moa na peek kaamar jaath puur man wø jøøny ŋut rwaath ee kut piny, ni ee twöö na aciel. Ge bëëdö ni geno pïï ŋuta, ni ö eni ni raany teek dëël mara. Kwäärö Wuuö Jwøk aana cïp ceŋ jiy maa a ba løny ki cuŋŋö nyïmge.

¹⁵«Kwäärö Wuuö Jwøk, jø leny moa teek yi paac man akwiere; ni cwøl jø leny møøk kipera, nee jø leny 'moa moa dëëtge teek nyathge. Kwäärö Wuuö Jwøk jø Juuda atïïe nee cwöth kaawat man wø cwöth nyïïomøki kar biic.

¹⁶«Kiper gïïögø bëët, a bëëdö naa jwöŋö, ni nyeŋŋa kwödö ki pïï, kiper bäŋ ŋat mo cøma cwïnya mo kare cään, mo dwøga jwïëy 'moa kare. Obwöre 'moa ŋäädhe marge aränynyö, kiper nyïïmän gena böödö.»

¹⁷Dhayan ceŋŋe athaaŋ maal, 'ba bäŋ ŋat moo cøm cwïnye. Wuuö Jwøk dwøre acïbe kipere, eni na po Jeekap, ki man tïm jøøa en deŋŋe na nyïïmän moe. Jerucalem atïmö na pääny mo ba waany yïthakicge.

¹⁸«Wuuö Jwøk mare beeye adïëri, kiper aana bëëdö naa gëëmö ki ciik moe. U na wïth jiy bëët, ennø, wïnynyu, ni neennu gïïa leth na jwøra. Jø leny 'moa moa dëëtge teek ki nyïïakuue 'moa, amak ki tøŋ.

¹⁹«Aani, mïëri moa mëëra ki ge acwøla, 'ba gena tïmö ni marge nøøn aani. Dïlämme 'moa ki jäle 'moa gena thum yi pääny, kanya bëëtge ni ge määnyö ki cam man bëëtge ni ge kwøw ki gø.

²⁰«Wui Wuuö Jwøk, neenï, a ena yïth gïï mo leth. Jwïëya bëëdö ni kïmmö døc, ni bëët cwïnya no opädhö, kiper aana bëëdö naa gëëmö døc. Opëëllö bëëdö ni nääö wøk nyeŋ jïëthe, ni bëët yïth uudi na thøø keere.

²¹«Jiy awïnyge naa cooyø, 'ba bäŋ ŋat moo cøm cwïnya. Nyïïmän 'moa bëët gïr gïïa leth na jwøra awïnyge, ni kanyge kiper mana tïïyï gø. Wui, beerra man kälï cäŋ gïïa leth na näk iï caanø, nee ge tïmge kaamar mara.

²²«Beerra man ö raayi moge bëët ni ö nyïmï, ni tïïï dëëtge ki gïrpiny kaawat mana tïïyï dëëra ki køør raay bëët moa tïïa. Gïï mo thööth cara naa ŋurö, ni cwïnya bëëdö no opädhö.»