Read anuak Wëël Kïmmö 3 Bible Online

Wëël Kïmmö 3 - anuak bible

Wëël Kïmmö 3

¹Beeye aani na joot gïna leth, ki køør ajäl wëër mar Jwøk.

²Eni, aana køøle, ni tïïc aani naa cäädha yi muudhö ni patha yi tar.

³Ka adïëri møn, cer ajäl Jwøk abëëdö ni ena bääta, ni nøøya aani ki yïth nïne bëët.

⁴Eni rïŋ dëëra ki buny dëëra awëëk ränynyö, ni tøc cuu 'moa.

⁵Eni, aana ciele ki gïï mo tïïya bëëtö mara ni teek, ni rum a dïër ki gïï mo tïïya bëëtö mara ni leth.

⁶Eni kany mo cøl atïïe na kar bëëtö mara, ni tïma naa caala jøøa thøw kany mo bäär.

⁷Eni aana cïëk yi øtø mo ogeerø ni teek naa ba løny ki man päära wøk, naa ee twöö ki tiimme mo peek.

⁸'Ba këël kany wø jwöŋa ni dwøra yaa tïŋ maal kiper køny, eni kweer ki man wïny lam mara.

⁹Eni uutjïëthe 'moa acïëge ki kïte mo døøŋŋø, ni tïïc waŋjöö mara no oköömmö.

¹⁰Ena tïmö kaamar cwieny mo omøør piny kipera, ni tïme kaamar ŋuu mo ree ee kanø kany mo ba joot.

¹¹Aana cöör wøk uutjïëthe 'moa, ni ŋør aani na thäŋi ni leeŋ a piny, ni tïme ni bäŋ køny kipera këët.

¹²Eni atheerø mare aniit baŋa, ni tïïc aani na gïr alääwa mare.

¹³Eni athëëre moe moa en yi køp athöör dëëra, ni dønyge yi dëëra kuya.

¹⁴Aana tïmö na gïr ŋeethø ki jï jø powa bëët, ni bëëtge ni ge jala aani ki dudi yïth nïne bëët.

¹⁵Aana maadhe ki jaath mo keec, ni wëëk a jäŋö ki gø.

¹⁶Eni laga acääny wøk ki kïdi, ni gøø aani piny yi tør.

¹⁷Kara atïmö ni bäär ki bëët-mëër, ni wïl wïïa ki met ec.

¹⁸Køøre aana köö, na «Ajiem mara aränynyö, ki gïïa ŋäädha bëët baŋ Wuuö Jwøk.»

¹⁹Wïïa apara ki caarø mara ki thääyö mara na caal cïm ki jaadha keec.

²⁰Kany wø para wïïa ki geni, cwïnya puta pädhö.

²¹'Ba da gïn mo kany wø caara wïïa ki gø, ŋäädhe mara puta duuö,

²²ni beeye mëër mar Wuuö Jwøk ni wø ba jøøl na kärø ränynyö en, kiper bäth ec mare bëëdö na bäre bäre ni ba ränynyi.

²³Ni ge bëëdö ni ge nyärö cooth ka amöölla, na adïëri mare päl.

²⁴'Ba jwïëya aköö, ni «Wuuö Jwøk beeye na kura; kiper manøgønø, a bëëdö naa ŋäätha gø.»

²⁵Wuuö Jwøk beer ki jï jø wø bëëdö ni koora gø, ni eni beer jï ŋat wø bëëdö ni manynya eni.

²⁶Beeye gïn mo beer jï dhaanhø ki man koor pïëm mar Wuuö Jwøk man piem jiy ki gø, ni cwïnye ee cïp piny.

²⁷Ni beerra eni jï dhaanhø ki man jïëny gïï mo leth ni eni poot thiinh.

²⁸Beerra man ö eni ni bëëde keere ni lïŋö, kiper beeye Wuuö Jwøk na kïth gïïögø bääte.

²⁹Beerra man bëëde ni täärnyïme ee këël yi tør; kanymør poot da ŋäädhe mo joode joodø.

³⁰Beerra man cïp thääŋŋe jï ŋat wø many man dhööŋ eni, ni bëëde no orøm ka ajøøŋ.

³¹Kiper Jwøk jiye ba kwiere na bäre bäre.

³²Këël doo kännö ki pänh cwïny bäät dhaanhø, cwïnye poot di bäädhö ki køør mëër mare na päl ni wø ba jøøl.

³³Kiper eni yie ba met ki man tïïc gïn mo leth dëër dhaanhø, wala ki man wëëk jiy kïmmö.

³⁴'Ba kanyo tïm jø paaci bëët moa en øt twöc ni geno nyøøn piny,

³⁵ki kany wø tïm bëët dhaanhø ni kär koorø ki nyïm Jwøa Dwøŋ ni en Maal,

³⁶ki kany wø kaat luup bäät dhaanhø kar løøk, ?iï caarø ni Jwøk gïïögø ba neete?

³⁷?Aŋa ni løny jïre ki man cääne, ni thur gïna caane kare, ni näk mo kär caan Wuuö Jwøki?

³⁸?Paa dhi Jwøa Dwøŋ ni en Maal ni wø ö gïn mo beerri ki gïn mo raac ki yie?

³⁹?Na aperŋø ni ö dhaanhe man ni kwøw en ni bëëde ni ŋurö kiper ajäla mana ö bääte ki køør raay moe?

⁴⁰Beerra man neenø bëëtö marø ki uutjïëthe moa caadhø, ni duuø baŋ Wuuö Jwøk.

⁴¹Beerra man løø cwïnynyø ni tïŋø ceŋŋø maal jï Jwøa en maal, ni lämø ni kööø,

⁴²ni «Waana tïïö ki raay ni gëëmwa, 'ba wa kärï wëënnö.

⁴³«Ïïni, ïïna gootø døc, ni bëëdï niï løpa køørwa, ni 'nägï wa ni cwïnyï kärï warø.

⁴⁴Ïïni dëërï agëëŋï ki pøøl, nee bäŋe lam mo pöönh baŋï.

⁴⁵Waana tïïyï kaamar gïï mo owetø mo reyø yïthakic wïth juurre.

⁴⁶«Nyïïmänni mowa bëët dhøkge aŋaamge bäätwa, ni ge buua wa.

⁴⁷Ni ö bööki ki buri mo pätha yïthge ki ränynyö mo dwøŋ døc ni put ö bäätwa.»

⁴⁸Pï nyeŋŋa acwïër piny ni tïme kaamar jwïïö mo pänhnhö, kiper ränynyö mar jø powa.

⁴⁹Pï nyeŋŋa puta bëëtö ni cwïëra piny ni ba cöök,

⁵⁰këël kanyo ö Wuuö Jwøki no nëënne ki maal noo raŋ gø.

⁵¹Gïna neena ki waŋa akännö ki pänh cwïny jïra, ni beeye gïna ö bäät nyïïakuue mo pääny mara.

⁵²'Ba jøøa männö ki aani ki gïn mo bäŋ tiere, aana cekge ka akupa kaamar wenyø.

⁵³Aana leeŋge yi buur naa kwøw, ni cïëkge dhi buur ki kïdi.

⁵⁴Pïï aana mwønyge, ni kööa, ni «Aana thøw nø.»

⁵⁵Wui ï na Wuuö Jwøk, nyeŋŋï acwøla naa ena yi buur mo bäär.

⁵⁶Kwac mara awïnynyï kanya kööa, ni «Kär ïthï cïëgï ko oduuru mara kiper køny.»

⁵⁷'Ba kanya cwøla ïïni, ïïna nyänh kany mo cään, ni kööï, ni «Kärï lwäyö!»

⁵⁸Wui Wuuö Jwøk, aana cwagï, ni piemï jwïëya.

⁵⁹Wui Wuuö Jwøk, gïïa leth na tïïc dëëra ajootï; beerra man ŋølï luumma.

⁶⁰Män mana mänge ki aani ki gø, ki gïïa tuutge bëët na kïthge bääta ajootï.

⁶¹Wui Wuuö Jwøk, ajøøŋ marge awïnynyï, ki gïïa tuutge bëët na kïthge bääta.

⁶²Nyïïmän 'moa ge bëëdö ni ge cøŋŋa gïra, ki man raanyge aani ki yïth nïne bëët.

⁶³Neenï, kany wø pïge piny ki kany wø öge maal, ge bëëdö ni ge jaalla aani ki dudi.

⁶⁴Wui Wuuö Jwøk, cool kwör dëëtge ki køør gïïa tïïcge.

⁶⁵Døøc cwïnyge mo teek, ni ö acïëni marï ni en bäätge.

⁶⁶Jøn wëër marï bäätge ni raanynyï geni bäät ŋøøm moï, ï na Wuuö Jwøk.