Read anuak Wëël Kïmmö 5 Bible Online

Wëël Kïmmö 5 - anuak bible

Wëël Kïmmö 5

¹Wui Wuuö Jwøk, par wïïï ki gïna pänh bäätwa; raŋï, ni neenï ajøøŋ mana jøøŋ wa ki gø!

²ŋøøm moa cïpï jïwa akäl jø møøki, ni ö mïëri mowa ni tïmge na mo wëëlle.

³Waana tïmö kaamar kïïe mo bäŋ wääge, ni ö mëëkwa ni tïmge kaamar määr thuunhnhi.

⁴Pïï mo maathwa atïmö ni ŋeewa ŋeeø, ni tïm jer thaalli ni jootwa ka ŋïëw.

⁵Jiy moa ŋwiec køørwa gena pïï røk opuny tietwa; waana ööl døc, ni bäŋ jwöm mo ewa joodø.

⁶Ceŋwa acïpwa jï jø Ijep ki jï jø Aciria, nee wa jïtwa ki cam man koorwa jwïëcwa ki gø.

⁷Kwäcwa atïïö ki raay ni pööthge, ni dööŋwa karge ni wa jøøya ajäl raay moa tïïcge.

⁸Laaŋe waana dïïmge, ni bäŋ ŋat mo käl wa wøk ceŋge.

⁹Cam marwa jootwa ni wa wiila jwïëcwa, kiper dïnäge moa en dï paap.

¹⁰Dëëtwa atïmö ni lïëth kaamar këënnö, ki køør diwaŋ dëël mar käc mana tägö dëëtwa.

¹¹Mään moa en yi Dhayan, ki nyïïakuue moa näk dëët cwøw poot kucge na en yïth päänye mo Juuda, gena gøyi ki piny.

¹²Kwääri gena lïër ki ceŋge, ni jø døøŋŋø bëëdö ni ba wøør.

¹³Obwöc cwøw atïïc na jø guur caammi, ni ö obwöre moa therø ni tïï na jø møøt jenni ki tëër mo leth døc ni ge bøømmø.

¹⁴Jø døøŋŋø gena tïmö ni ge tøør dhi kiir pääny kar acooŋa, ni ö dööt jap meeŋ mo obwöre ni lïŋge.

¹⁵Met cwïny marwa aränynyö, ni ö meeŋŋi marwa ni løø ree baŋ kïmmö.

¹⁶Aduda apäth piny ki wïthwa. Wui, atïmö ni leth jïwa, kiper raay moa tïïcwa!

¹⁷Kiper manøgønø, cwïnywa apädhö, ni ö nyeŋwa ni nigejïïm,

¹⁸kiper Dhayan na näk Jerucalem aniruuth piny, ni tïme na kar bëëtö mar othööe.

¹⁹Wui, ï na Wuuö Jwøk, bura marï bëëdö na bäre bäre, ni ö wälu marï ni këët røk beenhnhe moo ööi bëët.

²⁰?Aŋø ni wïl wïïï ki waani cooth en? ?Aŋø ni weyï waani ki kany mo bäär en?

²¹Wui Wuuö Jwøk, duu waani baŋï, nee wa døøwa karwa; dwøk bëëtö marwa kare ni caala mana dïkwøŋ.

²²Kiper ka adïëri møn, waana kwierï, ni gootï ki wa døc.