Read anuak Edhikiel 1 Bible Online

Edhikiel 1 - anuak bible

Edhikiel 1

¹'Ba na tïme na cwiiri ma pïëradäk,[1] ni dwää aŋween nïre abïïc, naa ena bäät naam Kebar yïthakic jø Juuth moa no omaa ki tøŋ, maal ree ajabe, ni ö Jwøki ni nyuunh aani ki ŋïï ki yi wïïa.

²'Ba dïcäŋögø ri bïï nïne mo dwäänögø, ni beeye kanya ö cwiic nyeya ma Jöakin thuwø na pääŋe na abïïc ki mana maai ki tøŋ,

³dwør Wuuö Jwøk aö bääta, a na dïlämi, ni bee a Edhikiel o Buci, bäät naam Kebar manøgø na en yi ŋööm jø Kaldia. Ni ö cer Wuuö Jwøki ni ö bääta kaace.

⁴'Ba ka adïëri møn, ni nëënna, atuunna aputa joot ni kwönnö ki wï piny, mo nëëni kaamar pöölö mo dwøŋ mo maac nigaaŋ yie, ni tar orieny deŋŋe, ni maac mana en ya atuunna manøgø, dïëre wärri kaamar nywïënyö mo di leenyø.

⁵Ni yi maaøgø da gïï ma aŋween mo caala gïï mo kwøw. 'Ba gïïögø kït moge nëëni na ennø nø: Geni, geno cwääö kaamar jiy.

⁶'Ba man nø jïre da täärnyïmmi aŋween ki bwöm aŋween.

⁷Ni tietge bëëdö ni thïïŋ, ni cääthe mo tietge otïïö kaamar cääthe mo tiet nyirøøa, ni ge bëëdö ni paŋŋi kaamar nywïënyö ma jwïël mo othoodhø.

⁸'Ba tiet bwöpge moø na aŋween yøø ki jï piny da ceŋ mo kede ceŋ dhaanhø. 'Ba gïïö na aŋween bëët yøø, man nø jïre da täärnyïmmi aŋween ki bwöm aŋween,

⁹ni bwöpge bëëdö ni man nø rege gudö ki mo watge maya. 'Ba geni, ge bëëdö ni man nø cäätha nyïme ni ba løny ki man lwïthge kany wø aacge.

¹⁰'Ba gïïö na aŋween yøø yi cwääc mana cwääc täärnyïmge ki gø bee en: Täärnyïm mana en løø nyïm otïïö kaamar täärnyïm dhaanhø, ni ö mana en bäät cwïïc ni tïï kaamar täärnyïm ŋuu, ni ö mana en bäät caam ni tïï kaamar täärnyïm rwaath, ni ö mana en ŋäc ni tïï kaamar täärnyïm olwiith mana näk agweec.

¹¹Manøgø beeye bëëtö mar täärnyïmmi moge. 'Ba bwöpge bëëdö ni ege peerø; ni man nø bwöpe ariiø bëëdö ni rege gudö ki mo wati maya. Ni ö bwöpge ariiø møga ni bëëtge ni dëëtge ege uumö ki ge.

¹²'Ba gïïögø man nø bëëdö ni cäätha nyïme; ni kany wø ci jwïëyi yie jaak, ge puta ci yie, ni kany wø näk mo geno aay, dëëtge ba løkge.

¹³'Ba dï gïïögø ni kwøw yøø, da gïï mo nëëni kaamar cuk mo wärri, mo bëëdö kaamar ameethi mo ge jöödö yïthakic gïïögø, ni ge cøøa ŋäc ki nyïm. 'Ba beege gïï mo orieny ni tar ni maac nigaaŋ dïge.

¹⁴'Ba gïïögø ni kwøw yøø ge bëëdö ni ge rïïŋö døc ni ge jööta cään ki maal kaawat man wø ö agaackøthi wø neegaaŋ.

¹⁵'Ba aani kanya lwïtha baŋ gïïö ni kwøw yøø, ka adïëri møn, aana put jïtö piny deŋ man nø ki gïn mo caala tier jääy.

¹⁶'Ba gïïö ni caal tiet jïëthe yøø yi cwääc mana cwääc ge ki gø otïïö na ennø nø: Ge bëëdö ni ge ŋwaŋŋi kaamar waŋ kïdi, ni ge na aŋween bëët yøø, geno cwääö na teeŋ aciel. Ni geno tïïö ni man nø nëëni kede da tier jääy mør mo ena yie ni rege gänö.

¹⁷'Ba kany wø aacge, ge puta aay ki løøk aciel ki røk løøk mo nyïmge moa na aŋween, ni dëëtge ba løkge këët kany wø näk mo geno aay.

¹⁸'Ba tiet jïëthe moøgø bäyö ni di lwäyö ki ge; ni ge na aŋween bëët yøø bëëdö ni dëëtge ogääbö ki nyeŋ mo raŋ ki deŋge bäre.

¹⁹'Ba gïïö ni kwøw yøø kany wø cääthge, gïïa caal tiet jïëthe na en buutge ge puta cääthö na aciel ki geni; ni kany wø määt gïïögø ni kwøw yøø, ge määtö thuwø.

²⁰Kany wø ci jwïëyi yie jaak, gïïö ni kwøw yøø ge puta aay ki løøk maneca, ni ö tiet jïëthe ni putge aa maal ki geni na aciel, kiper jwïëc gïïögø ni kwøw yøø ena yïth gïïö ni caal tiet jïëthe yøø.

²¹Kany wø ö gïïa kwøwi noo cääthge, ge cääthö thuwø; ni kany wø ö gïïa kwøwi noo cuŋge, ge cuŋŋö thuwø; ni kany wø ö gïïa kwøwi noo määtge, ge määtö na aciel ki geni thuwø; kiper jwïëc gïïö ni kwøw yøø ena yïth gïïögø ni caal tiet jïëthe yøø.

²²'Ba bäät gïïö ni kwøw yøø da gïrpiny mo ree ee peerø bäätge mo nëëni kaamar maal, ni tøŋ ni caala piiø.

²³'Ba gïïö ni kwøw yøø bwöpge ege peerø tier gïnögø ni caal maal enø, ni man nø bwöpe ogääbö ki mo wati maya, ni man nø bwöpe ariiø møga bëëdö ni dëëre ee uumö ki ge.

²⁴'Ba gïïö ni kwøw yøø kanya määtge, dööt bwöm moge awïnynya ni lwör kaamar naam mo pänhnhö, ni caala dwør Wuuö Jwøk, eni na en teeki jïre, ni wïnyi kaamar dööt jø leny. 'Ba kany wø cuŋge, bwöpge dwøkge piny.

²⁵'Ba dwøl wïnyi ka maal bäät gïna näk ree ee peerø bäätge kaamar maal. 'Ba kany wø cuŋge, bwöpge dwøkge piny.

²⁶'Ba bäät gïna näk ree ee peerø bäätge kaamar maal, da gïrpiny yie mo nëëni kaamar wälu mo otïïö ki kïdi mo kïte caala caaro. 'Ba bäät wälu manøgø da gïrpiny mo nëëni kaamar dhaanhø mo opï piny bääte maal.

²⁷'Ba na raŋa gø, ki mana täge ki kun da piere këël wïïe aputa joot ni caala nywïënyö ma jwïël mo wärri kaamar maac. 'Ba ki mana täge ki piere këël piny, ajooda na gïn mo caala maac, ni tar bëëdö no orieny ki deŋŋe manø bäre.

²⁸'Ba tar mana no orieny deŋŋe, nëëni kaamar daanø kany wø cööde maal ri køth. Ni manøgø beeye bëëtö mar ajiem mar Wuuö Jwøk. 'Ba kanya jooda gø, aana pädhö ki bäp yia, ni puta dwøl wïnynyö ni cäänö.