Read anuak Edhikiel 10 Bible Online

Edhikiel 10 - anuak bible

Edhikiel 10

¹Køøre aana lwïthö ni jooda gïna dwøŋ na näk ree ee peerø bäät nyïïatwiet maal mo wø cwøl ni kirubëlli,[3] ki gïn mo kede kïdi mo kïte caala caaro mo nëëni kaamar wälu mo ena wïth kirubëlli moøgø.

²Køøre Wuuö Jwøk aköö jï ŋata no oruyö ka abïï ma lïïna, ni «Ci yïthakic tiet jïëthe na en tiet kirubëlli, ni pääŋï ceŋŋï ki cuk maac na en yïthakic kirubëlli, ni ciï ni kerï ge dï pääny.» 'Ba ŋatøgø aput cøø naa raŋŋa gø.

³'Ba kanya ci ŋatøgø, kirubëlli ge bëëdö ni ge cuŋŋö ki jï løø tier-piny ki øt Jwøk, ni yi kal mana en dïër bëëdö ni päŋ ki pöölö.

⁴Køøre ajiem mar Wuuö Jwøk aput nirwöc bäät kirubëlli ni put pïï bäät thudhi mar dhi øt Jwøk. Ni ö øt Jwøki ni put pääŋö ki pöölö, ni yi kal päŋ ki tar mar ajiem mar Wuuö Jwøk.

⁵'Ba dööt bwöm mo kirubëlli lwör ni wïnyö yi kal mana en wøk, ni wïnyi kaamar dwør Wuuö Jwøk, eni na en teeki jïre, kany wø cääne.

⁶'Ba kanya ö Wuuö Jwøki na kööm ŋata näk oruyö ka abïï ma lïïna, ni «Kädï ki maac yïthakic kirubëlli tiet jïëthe,» ŋatøgø aput aay ni cuŋŋe deŋ tier jääy.

⁷Kanyøgø kirubël aciel cere arwaak baŋ maac mana en yïthakicge ni lwöte ki maac ni cïp gø cer ŋata näk oruyö ka abïï ma lïïna; ni ö ŋatøgø ni lwør gø ni put aay ki gø.

⁸'Ba tiet bwöp kirubëlli moøgø da gïn mo nëëni kede cer dhaanhø.

⁹'Ba na lwïtha, aana put jïtö ki tiet jïëthe aŋween deŋ kirubëlli, ni tier jääy man nø ena deŋ kirubël man nø; 'ba tiet jïëthe moøgø ŋwaŋŋi kaamar waŋ kïdi.

¹⁰'Ba tiet jïëthe moø na aŋween yøø rege caalø, ni man nø nëëni kede da tier jääy mør mo ena yie ni rege gänö.

¹¹'Ba kany wø näk mo ge aay, ge puta aay ki løøk aciel mo nyïm moa na aŋween, ni ge puta aay ni ge caatha nyïmge ni rege ba løkge kany wø näk mo geno tïŋŋö.

¹²'Ba kirubëlli dëëtge bäre, ni beege dïŋäthge, ki ceŋge, ki bwöpge, këël tiet jïëthe moa na aŋween na en buutge, bëëdö no ogääbö ki nyeŋ mo raŋ bëët.

¹³'Ba da dwøl ma awïnynya mo cwøla nyeŋ tiet jïëthe, ni «Tiet jïëthe mo wø løøŋ rege.»

¹⁴'Ba kirubël man nø jïre da täärnyïmmi ma aŋween. Täärnyïm mana dïkwøŋ nëëni na täärnyïm kirubël; 'ba rietge caala täärnyïm dhaanhø, ni dääge caala täärnyïm ŋuu, ni ö ŋweerge ni caal täärnyïm olwiith mana näk agweec.

¹⁵'Ba kirubëlli moøgø gena määt maal. 'Ba geni beege gïïa kwøw moa nyooth jïra bäät naam Kebar.

¹⁶'Ba kany wø cääth kirubëlli, tiet jïëthe moa en deŋge ge puta cääthö thuwø; ni kany wø ö kirubëlli noo peerge bwöpge ni marge määtö, tiet jïëthe moøgø thuwø deŋ kirubëlli ba wecge.

¹⁷'Ba kany wø ö kirubëlli noo cuŋge, ge cuŋŋö thuwø; ni kany wø määt kirubëlli, ge määtö ki ge bëët, kiper tiet jïëthe ge bwøtha jwïëc gïïa kwøw na näk beege kirubëlli.

¹⁸Køøre ajiem mar Wuuö Jwøk bäät thudhi mar dhi øt Jwøk awiie ni cuŋŋe bäät kirubëlli.

¹⁹'Ba kanya lwïtha, kirubëlli aputa joot ni bwöpge ege peerø ni marge määtö. 'Ba kanya määtge, gena put määtö na aciel ki tiet jïëthe. 'Ba na aacge, gena cuŋŋö dhi kal mana en jï løø kur tuul-cäŋ ki Øt Jwøk, na ajiem Jwø Icriel ena bäätge.

²⁰'Ba gïïögøøni beege gïïa kwøw na jooda tiet Jwø Icriel bäät Naam Kebar, ni puta ge ŋec ni beege kirubëlli.

²¹'Ba gïïögøøni man nø jïre da täärnyïmmi aŋween, ki bwöm aŋween, ni tiet bwöpge ki jï piny da gïï mo nëëni kede ceŋ dhaanhø.

²²'Ba täärnyïmge nëëni keda mana jooda ge bäät naam Kebar; ni man nø cäätha nyïme ni tiir.