Read anuak Edhikiel 11 Bible Online

Edhikiel 11 - anuak bible

Edhikiel 11

¹Køøre Jwïëc Jwøk aana tïŋ maal ni kïth aani dhi kal mana dïët ki dhi øt Wuuö Jwøk mana en jï løø kur tuul-cäŋ. 'Ba dhi kal kaace da jiy yie ma pïërariiø ka abïïc. 'Ba Jaadhania wär Adhur ki Pelathiya o Benaya, ge na bëëdö na dïbwöthe mo jiy, gena jooda dï jøøgø.

²Kanyøgø Wuuö Jwøk aköö jïra, ni «Wär dhaanhø, moøgø beege jøøa tudö ki luup mo reyø na cïpö ka acaare mo reyø yi pääny man,

³na köö, na ‹?Aŋø, man paa caa man geer uudi yie nø? Pääny man wa di gwøø kaamar athaa wø gwøk rïŋö ki maac.›

⁴Kiper manøgønø, ï na wär dhaanhø, cään geni niï jääla ge, cään geni!»

⁵Køøre Jwïëc Wuuö Jwøk aö bääta ni kööe jïra, ni «Caanï jïge ni man beeye luumma caan Wuuö Jwøki jïïu, ena köö, ni ‹U na jø dhi øt Icriel, moøgø beege gïï wø caru, 'ba aani, acaara maru ŋääa.

⁶Uuni jiy mo thööth anägu yi pääny man, ni pääŋŋu nyeŋ jïëthe moe ki dëët jiy moa 'nägu.›

⁷«Kiper manøgønø, luumma caan Kwäärö Wuuö Jwøki bee en, ena köö, ni ‹Jiy moa 'nägu na dëëtge leeŋu piny dï pääny beege rïŋö, ni ö päänynyi man ni näk athaa mar thaal. 'Ba uuni, u käla wøk yie.

⁸Uuni, u lwäär ko opëëllö; kiper manøgønø, opëëllö 'käla bäätu ni jääla u ki gø.› Manøgø beeye luumma caan Kwäärö Wuuö Jwøki. Ni cäŋ köö,

⁹no ‹U käla wøk yi pääny man, ni cïba u ceŋ jøøa path ni wëëga u jääl ki rege.

¹⁰Uuni, u di nääö ko opëëllö; aani u jääla jäälö dï ŋööm Icriel bäre. Kanyøgønø ŋäyu ŋääö ni bee aani na Wuuö Jwøk.

¹¹Pääny man u ba gwøe kaamar athaa wø gwøk rïŋö ki maac, 'ba aani u jäälä jäälö dï ŋööm Icriel bäre.

¹²Køøre nø, ŋäyu ŋääö ni bee aani na Wuuö Jwøk; kiper u ba cäädhi ka køør ciik 'moa; ciik 'moa käru kïth bäät tïïc; 'ba u cäädhi ka køør ciik mo wïth juurre moa en buutu.› »

¹³'Ba kanya bëëda naa cara luupögøøni, Pelathiya o Benaya aput thøø. Kanyøgø dëëra aputa gøø piny ki bäp yia ni puta köö ki dwøl mo dwøŋ døc, ni «Wui, Kwäärö Wuuö Jwøk! ?Jø Icriel moa no odööŋ ni kwøw wïthge poot dïïrï dïïrö na bäre møn?»

¹⁴'Ba dwør Wuuö Jwøk aput ö bääta ni kööe,

¹⁵ni «Wär dhaanhø, nyïïmeru, ni beege tuuŋu moa näk rem dëërï, na mak u ki tøŋ ki ge na aciel, ki jø dhi øt Icriel bëët, beege jøøa cään jø Jerucalemmi kiperge na köge, ni ‹Gena jiy mo karge bäär ki Wuuö Jwøk; ŋöömö man cïpa jïwa na marwa.›

¹⁶Kiper manøgønø, caanï jïge ni man beeye luumma caan Kwäärö Wuuö Jwøki kiper jøøa mak ki tøŋ, ena köö, ni ‹Këël na bëëtge ni ge yaa riem kwör mo bäyö dï wïth juurre, ni ge yaa keethø dï mïëri, a poot bëëdö ki geni ki kany mo orømø yïth mïëri moa cige yïthge.›

¹⁷«Kiper manøgønø, caanï jïge ni man beeye luumma caan Kwäärö Wuuö Jwøki, ena köö, ni ‹Ge lïma wøk dï wïth juurre, ni käla geni wøk ki yïth mïëri moa näk geno keethø yïthge, ni cäŋa ŋööm Icriel cïpö jïge.

¹⁸'Ba noo duuge yi gø, kït gïï wø lam bëët na määnö na näk yia raac ki ge raanyge raanynyø.

¹⁹Aani ge mooa mooø ki cwïny aciel ni mooa dëëtge ki jwïëy mo nyään; cwïnynyi moge na caal kïte käla wøk dëëtge ni mooa geni ki cwïnynyi mo jööm kaamar rïŋö.

²⁰Køøre nø, geno cäädhi køør ciik 'moa ni gwøkge luup 'moa, ni kïthge gø bäät tïïc. Geno bëëdö na jiy 'moa, ni bëëda ni aana Jwøk marge.

²¹'Ba jøøa näk cwïnyge onieŋ køør kït gïï wø lam na määnö na näk yia raac ki ge, japøgøøni dwøga wïthge.› » Luummögø caana Kwäärö Wuuö Jwøki.

²²Køøre kirubëlli bwöpge apeerge ni tiet jïëthe ena deŋge, na ajiem mar Jwø Icriel bëëdö ni ena bäätge.

²³'Ba ajiem Wuuö Jwøk aput ö maal ki dï pääny ni put cuŋŋö bäät kïdi na en jï løø kur tuul-cäŋ ki pääny.

²⁴'Ba Jwïëc Jwøk aana tïŋ maal ni kïth aani yi Babiløn baŋ jiy moa no omaa ki tøŋ; ni manøgø tïïc ni di nyoodhø jïra ki køør Jwïëc Jwøk. Køøre gïna nyooth jïra na neena, aay bääta,

²⁵ni puta luup bëët moa nyooth Wuuö Jwøki jïra caan jï jiy moa no omaa ki tøŋ.