Read anuak Edhikiel 12 Bible Online

Edhikiel 12 - anuak bible

Edhikiel 12

¹'Ba dwør Wuuö Jwøk aö bääta ni kööe,

²ni «Wär dhaanhø, ï ena dï jiy ma jø ageem. Gena jiy mo da nyeŋ jïge mo raŋ, 'ba ge ba rääŋö; ni da ïdhi jïge mo wïnynyö, 'ba ge ba wïnyö; kiper gena jø ageem.

³«Kiper manøgønø, ï na wär dhaanhø, twöc jammi moï kede man wø täk bööki paac; ni putï tïŋŋö ki dïcäŋ ni nëënö jïge ni kede täga böök. Beerra man tïŋŋï paac marï ni ciï paac mør niï nëënö jïge. Kanymør tier gïnögø kwanyge kwanyø, këël na bëëtge ni gena jø ageem.

⁴'Käl jammi moï wøk ki dïcäŋ ni nëënö jïge kede man wø täk bööki paac; ni putï tïŋŋö ka abøøya ni nëënö jïge ni kede täga böök ni jøw reŋŋa paac mør.

⁵Ni koonyï kiir ni nëënö jïge ni tuyï gø ni dønynyï wøk ki yie.

⁶Ni putï jammi moï tïŋ göönnï ni nëënö jïge, ni putï aay ki wäär ni käärï käärö. 'Ba täärnyïmï wär uumï nee ŋöömö ba jootï, kiper a tïïya ïïni na nyuudhi kiper jø dhi øt Icriel.»

⁷'Ba aani japøgø atïïa kaawat mana kööm aani. Aani jammi 'moa akäla wøk ki dïcäŋ ni twöa ge kaaman wø tïïc cäŋ böök. Køøre ka abøøya kiir akoonya ki ceŋŋa ni tuya wøk; ni puta aay ki wäär ni jammi 'moa käära käärö ki göönna ni nëënö jïge.

⁸'Ba na tïme na amöölla dwør Wuuö Jwøk aö bääta ni kööe,

⁹ni «?Wär dhaanhø, jø dhi øt Icriel moø na jø ageem yøø, ï kärge pëënynyö, na ‹?Agïne ni tïïyï en?›

¹⁰Wär caanï jïge ni man beeye luumma caan Kwäärö Wuuö Jwøki, ena köö, ni ‹Tier gïn beeye kiper dïbwöthe mo Jerucalem ki jø dhi øt Icriel bëët mo wø bëëdö yi Jerucalem.›

¹¹Caanï jïge, ni ‹Aana nyuudhi kiperu, ni gïna tïïya enø beeye gïno tägi dëët jø Jerucalem. Geno kïth paac mør ni geno maa ki tøŋ.›

¹²«Dïbwödhi marge jammi moe jiee göönne ki wäär ni døny wøk. Kiir di koonyø kipere ni pööth wøk ki kany mo ŋaam. Eni wïïe uume uumö nee ŋööm poge ba joode.

¹³'Ba aani, ajääp mara peera peerø bääte ni puta eni mak ka ajääp mara. Eni kïtha yi Babiløn, yi ŋööm jø Kaldia, 'ba ŋöömmögø ba joode. 'Ba eno put thøø kunece.

¹⁴Eni ki jiy mo wø en buute bëët, ki jø kööre moe, ki jø leny moe bëët, ge keetha keethø yïth tuk piny; ni puta køørge ŋwiec no opëëllö mara yaa wöth wøk.

¹⁵«Kanyøgønø ŋäcge ŋääö ni bee aani na Wuuö Jwøk ki køør mano keetha geni dï wïth juurre ki yïth mïëri.

¹⁶'Ba aani jiy mo nøk dëëtge wiia wiiø ni kwøw ni ba nääa ko opëëllö, ki käc, ki täw. Kanyøgø nø, japa näk yia raac ki ge bëët na tïïcge caange caanø jï wïth juurre kwöra kïth geni yïthge, ni putge gø ŋäc ni bee aani na Wuuö Jwøk.»

¹⁷Køøre dwør Wuuö Jwøk aö bääta, ni kööe,

¹⁸ni «Wär dhaanhø, wärï lwäyï kanyo enï bäät cam ki kwön, ni tïm dëërï ni kwanynyi ki lwär kanyo mäthï ki pïï.

¹⁹Caanï jï jiy moa en yi ŋöömö maru ni luumma caan Kwäärö Wuuö Jwøki kiper jø wø bëëdö yi Jerucalem na en yi ŋööm Icriel bee en, ena köö, ni ‹Kwatge camge camø ni ge ena yi lwär, ni maathge pïï moge ni dëëtge kwanynyi ki lwär, kiper ŋöömö marge ränynyö ki jammi moa en yie bëët ki køør ageem man wø tïïc jiyi bëët mo wø en yie.

²⁰Päänye moa näk jiy thööth yïthge ränynyö, ni ö ŋöömö ni dööŋe ni bäŋ gïrpiny yie. Køøre nø ŋäyu ŋääö ni bee aani na Wuuö Jwøk.› »

²¹Køøre dwør Wuuö Jwøk aö bääta, ni kööe,

²²ni «Wär dhaanhø, ?Aperŋø ni ö jø Icrielli ni wara carge luubö man na leer, ni ‹Nïne apöödhö jaak ni luup moa nyooth bëët kär thur karge.›?

²³Ennø, caanï jïge ni man beeye luumma caan Kwäärö Wuuö Jwøki, ena köö, ni ‹Nïne mo wëëk luup moa nyooth bëët thur karge aløny ni öö. 'Ba luum leer manøgø oputa raanynyø nee ba cari këët dï Icriel.

²⁴Kiper otïmö ni bäŋ luup tööt këët mo di nyoodhø wala luup adïëda mo tïïca ec ni met ki ge mo di nyoodhø dï jø Icriel.

²⁵'Ba a na Wuuö Jwøk, aano cäänö, ni ö luupi moo cara ni laarge thur karge ni ba ruu. Wui, u na jø ageem! Yïth nïne mou moo beetu nou kwøw, a cäänö ki uuni, ni ö luupi moo cara ni wëëga ge thur karge.› Luummögø caana Kwäärö Wuuö Jwøki.»

²⁶'Ba dwør Wuuö Jwøk acäŋ ö bääta ni kööe,

²⁷ni «Wär dhaanhø, jø Icriel aköö, ni ‹Jammi mo wø nyooth jïrï ruu ki cwiiri mo thööth ni ba laar thur karge, ni luup mo wø carï beege luup mo kwörge poot bäyö.›

²⁸Kiper manøgønø, caanï jïge ni luumma caan Kwäärö Wuuö Jwøki bee en, ena köö, ni ‹Bäŋ luup 'moa mo ruu këët ni ba laar thur karge; gïno wäro caana jaak thura kare.› Luummögø caana Kwäärö Wuuö Jwøki.»