Read anuak Edhikiel 13 Bible Online

Edhikiel 13 - anuak bible

Edhikiel 13

¹Kanyøgø dwør Wuuö Jwøk aö baŋa ni kööe jïra,

²ni «Wär dhaanhø, kööm jø Icriel moa tïïc rege na nyïïkuk Jwøk ni wø køp luup moge keerge. Caanï jïge, ni ‹Cegu ïthu ki dwør Wuuö Jwøk!

³Kwäärö Wuuö Jwøk aköö: Noo tïmö ni raac jï jøøa bäŋ wïdhi, jøøa tïïc rege na nyïïkuk Jwøk ni wø caath køør acaare moge keerge, jø wø köö ni da gïï mo ege neenø, 'ba bäŋgø.

⁴Wui, Icriel, jiyï moa tïïc rege na nyïïkuk Jwøk ge bëëdö kaamar othööe mo bëëdö wï paac mo oränynyö.

⁵Ge kär ci kuna koorge kwöra ŋaam dëër kiir, ni bäŋe gïn mo ege tïïö ki man cäŋge kiir geerrø deŋ Icriel, nee jø Icriel cuŋge ri leny mar cäŋ Wuuö Jwøk.

⁶Ge cäänö ki luup tööt ni da gïï mo onyoodhø jïge, ni marge adïëda jaak, ni ge köö, ni «Wuuö Jwøk aköö na ennø nø,» ni ge kär jääŋ Wuuö Jwøki. 'Ba ge poot ŋäädhö jaak ni luup moge thura karge.

⁷'Ba Wuuö Jwøk aköö jïge: ?Na aŋø, patha u ni wø cäänö ki luup tööt ni da gïï mo onyoodhø jïïu, ni maru adïëda jaak kany wø kööu, ni «Wuuö Jwøk aköö na ennø nø», ni bäŋ gïn mo yaa caanø?›

⁸« ‹Kiper manøgø nø, Kwäärö Wuuö Jwøk aköö: Kiper mana cäänu ki gïï mo patha adïëri nou cara luup tööt ni da gïï mo onyoodhø jïïu, u jääla jäälö. Luummögø caana aani, a na Kwäärö Wuuö Jwøk.

⁹Aani cera tïŋa maal bäät jø wø tïïc rege na nyïïkuk Jwøk ni jääla geni, jø wø cäänö ki luup tööt ni da gïï mo onyoodhø jïge, ni marge adïëda jaak. Geni, ge tïïa tïïö ni bäŋ karge yïthakic jaae 'moa, ni ba göör nyeŋge piny yi wëël nyeŋ mar jø dhi øt Icriel, ni ba døøge yi ŋööm Icriel na bäre bäre. Køøre nø, ŋäyu ŋääö ni beeye aani na Kwäärö Wuuö Jwøk.

¹⁰« ‹Kiper geni wïth jiya wø maaŋge maaŋŋø ni ge köö, ni «Paac beer jaak,» këël na bëëde ni bëët paac raac. Kany wø näk da dhaanhø mo tïïö ki kiir mo ba teek, rwøthge rwødhø ki booya.

¹¹Kiper manøgø nø, caanï jï jøøa röödhö ki booya manøgø ki man näk mo kiir manøgø pädhö. Kiper køth mo dwøŋ mo muta piny mo ree da pey pätha bääte, ka atuunna mo kwödö ni teek døc.

¹²?Aŋø, kanyo päth kiirri, u ba pëënynyi, ni «Booya mana rwøthu kiir ki gø age?»

¹³« ‹Kiper manøgø nø, Kwäärö Wuuö Jwøk aköö: Na atuunna mo kwödö ni teek døc tïïa tïïö nee kwönne ki køør wëër mara ni wø liel kaamar maac. Aani, a wëër ni jääŋŋa køth mo dwøŋ mo muta piny mo ree da pey, ni raanynya kiir manøgø na bäre ki wëër mara.

¹⁴Kiir mana rwøthu ki booya manøgø raanynya raanynyø ni neeruuth piny, ni tïm tiere ni nëënö wøk. 'Ba kanyo pädhe, uuno maae yie ni put ränynyö na aciel ki uuni bëët. Køøre nø, ŋäyu ŋääö ni bee aani na Wuuö Jwøk.

¹⁵Kar kanyøgø nø, aani wëër mara othööra bäät kiir ki bäät jøøa rwøth gø ki booya; ni caana gø jïïu, ni «Kiir ki jøøa rwøth gø aränynyö,

¹⁶ni beege jø Icriel moa tïïc rege na nyïïkuk Jwøk, mo wø cään Jerucalem ni wø köö ni da jammi mo onyoodhø jïge ni paac beer jaak, këël na bëëde ni bëët paac raac.» Luummögø caana Wuuö Jwøki.›

¹⁷«'Ba ennø, ï na wär dhaanhø, këël wïïï ri nyïïakuue mo jø pou moø ni wø cäänö ni da luup mo onyoodhø jïge yøø ki køør adïëda marge keerge. Cään geni,

¹⁸ni kööï ni luumma caan Kwäärö Wuuö Jwøki bee en, ena köö, no ‹Otïmö ni leth jï määr wø kwöny ceŋge bëët ki jap ajuuk, ni wø kwöö ka abïïk wø loop wïc mo ceŋge owiiø ni bäyö kiper nee loopge wïthge na jap maaŋge wïth jiy ki ge. ?Aŋø, løny ki man maaŋŋu wïth jiya ni wëëgu jwïëyu kwøw?

¹⁹Uuni, aana päätu yïthakic jiya kiper beek wø cwøl ni gäbci[4] mo ena yi thäny cenø ki thääŋ kwön. Ki køør mana cäänu ki luup tööt jï jiya mo wø cek ïthge ki jap tööt, jiy moa ba doo rømø ki thøø anägu, ni ö jiyi moa ba doo rømø ki man bëëtge ni kwøw ni wëëgu ge kwøw.› »

²⁰Kiper manøgønø, man beeye luumma caan Kwäärö Wuuö Jwøki, ena köö, ni «Aani, a män ki jap ajuuk mou mo wø maaŋŋu wïth jiy ki ge kaaman wø cek weny. Aani gïïöge cööda wøk ceŋŋu ni päda jiy mo wø cegu kaamar weny.

²¹Abïïe mou mo wø loop wïc cööda wøk wïthu ni piema jiya ceŋŋu, ni put tïmö ni bäŋ teek maru bäätge këët ki man päthge ceŋŋu. Køøre nø ŋäyu ŋääö ni bee aani na Wuuö Jwøk.

²²Kiper cwïny jøøa beyø awëëgu pädhö ki luup tööt mou; ni beege jøøa näk kära tïïö nee kïmge. 'Ba uuna tïmö nou cøømma cwïny jøøa reyø ki man ba wecge uutjïëthe moge na reyø, nee ge ba jïtge ki pïëm mana dege piemø ki gø.

²³Kiper manøgønø, jap tööt mou mo wø caru no onyoodhø jïïu, ba jootu këët, ni bäŋ jap adïëde mo tïïyu këët. 'Ba aani jiya piema piemø ceŋŋu, ni putu gø ŋäc ni bee aani na Wuuö Jwøk.»