Read anuak Edhikiel 17 Bible Online

Edhikiel 17 - anuak bible

Edhikiel 17

¹Kanyøgø dwør Wuuö Jwøk aö bääta ni kööe,

²ni «Wär dhaanhø, caan luummi na leer jï jø Icriel.

³Ni kööï jïge ni man bee gïna caan Kwäärö Wuuö Jwøki, ena köö, ni ‹Da odhuuth mo dwøŋ, mo bwöm moe teek døc no okwöre moe bäyö, mo dëëre da kït ma teeŋi, mo öö lur Libaanø, ni käl wï jaath mana pere leth na näk wïïe opööth maal.

⁴Eni wï jaath mana näk opööth maal atuur wøk ni aae ki gø ni kïth gø yi ŋöömma näk kar gath, ni piith gø yi pääny jø gath.

⁵« ‹Eni thuwø, ena kän wøk ki kunhnhö ki yi ŋöömmögø ni piith gø yi ŋöömö mo beer, ni piith gø kaamar ageeta kany mo pïï thööth yie.

⁶Ni put døøŋŋø, ni tïme no omøk mo dwøŋ ni bääte olaak, ni ö bäädi moe ni løø gø baŋ olwiith; 'ba lweete odøny piny døc kanya en yie. Ni put tïmö no omøk mo dwøŋ, ni jïte ki bäädi ni lødhe.

⁷« ‹'Ba da odhuuth mør thuwø mo dwøŋ, mo bwöm moe teek, mo dëëre päŋ ko okwöre. Kanyøgø omøk lweete aløø baŋ gø ki kanya näk eno piidhø yie, ni peer bäädi moe baŋ gø kiper nee jïte ki pïï.

⁸'Ba omøk manøgø ena piith yi ŋöömö mo beer, mo yie da pïï mo thööth, 'ba eni doo løny jïre ki man jïte ki bäädi ni nywøle ki nyïëdi ni tïme na jaath omøk mo mïërö.›

⁹«Caanï jïge ni man bee gïna caan Kwäärö Wuuö Jwøki, ena köö, no ‹?Omøk manøgø, løny ki man lødhe ni døøŋŋe? ?Eni ee, lweete ba puth wøk ni ö nyïïe ni pøni piny ni tale? Eni bäädi moe mo løth tal. 'Ba ki man pudhi wøk, eni ba many cenø mo teek wala jiy mo thööth.

¹⁰?Aŋø, këël na cäŋi piithø, eni poot løth këët? ?Eni ba tal na bäre bäre kanyo näk mo eno gøøc jam wø ööi ki kur tuul-cäŋ? ?Eni ba tal kanya näk eno piith yie?› »

¹¹Køøre dwør Wuuö Jwøk aö bääta ni kööe,

¹²ni «Caanï jï jø ageem moøgø, ni ‹?Gïï ni cari ii, tietge kuyu?› Caanï jïge ni tiet gïïögø bee en: Nyeya mar Babiløn aci Jerucalem, ni käl nyeya ki jø kööre moe ni kïth geni yi Babiløn.

¹³Ni lwöte ki dhaanhø ri tuuŋ nyeya ni tude ki gø ki luubö, ni tïïc gø nee kööŋe. Eni thuwø dïbwöthe mo paac amaae ki tøŋ ni käl ge,

¹⁴kiper nee buc nyec dwøk piny ni ba duu maal këët; 'ba nee bëëde ni nut ki køør mano koor gïna näk ee tuudö.

¹⁵'Ba nyeya agëëmö ki ŋata cuum gø, ni jääk Ijep ki jiye nee känge ko okwëënyi ki jø leny mo thööth. ?A ennø, gïnögø thura kare jïre? ?Ŋat wø tïïc teeŋ gïïögø bøth ka ajäla? ?A eni, løny jïre ki man raany luubö mana näk ee tuudö ni bødhe ka ajäla?

¹⁶«'Ba aani, a na Kwäärö Wuuö Jwøk, a caana gø ni kaawat man bëëda naa kwøw en, ŋatøgø thøw yi Babiløn, yi ŋööm nyeya mana cïp gø bäät wälu, ni beeye ŋata taak kööŋ na raany luumma tuude.

¹⁷'Ba Peerø ki jø leny moe na thööth na teek døc ki lwaae moe, ŋatøgø ba cwakge ri leny, këël na bëëtge ni ge thøra ŋøøm ni ge tïïö ki gïï wø cielge kiir ki ge, nee jiy mo thööth 'näkge.

¹⁸Eni luumma kööŋe kipere ataae, ni raany luumma tuude; 'ba kiper mana tïïc gïïögø bëët ni cere ee nø cïp, eni ba bøth ka ajäla.

¹⁹«Kiper manøgønø, Kwäärö Wuuö Jwøk aköö, ni ‹Kaawat man bëëda naa kwøw en, eni ataa mare mana taak kööŋ mara ki gø, ki luumma tuuda na raanynye, odwøga wïïe.

²⁰Aani ajääp mara opeera bääte, ni maa gø ka abïëp mara. Eno kïtha yi Babiløn ni ŋøla luubö bääte kiper gïna tïïe dëëra na näk patha kare.

²¹Jø leny moe moo päär wøk, ge di nääö ko opëëllö, ni ö moo dööŋ ni keethge yïth tuk piny. Køøre nø, putu ka ŋäc ni bee aani na Wuuö Jwøk na cäänö.› »

²²'Ba man bee gïna caan Kwäärö Wuuö Jwøki, ena köö, ni «Aani lwinh jaath mana pere leth na näk wïïe opööth maal okäla ni piidha gø kany mo ena maal wï kïdi mana bäär døc.

²³Eni piidha bäät kïdi mana bäär døc ni beeye kïdi mar Icriel. Eno jïti ki bäädi ni nywøle ki nyïëdi ni tïme na jaath mo mïërö mo pere leth. Teeŋ weny bëët geno gëët bääte ki uudi, ni tïm bäädi moe na tïpö jïge.

²⁴Kanyøgønø jenni bëët moa en yi pwöla oputge ŋäc ni bee aani na Wuuö Jwøk ni wø dwøk jaath mana bäär piny, ni wø tïïc jaath mo ciek nee piidhe ni bäär; ni wø tïïc jaath mo onigïït piny nee näre, ni wø tïïc jaath mo otal nee lødhe. Bee aani na Wuuö Jwøk na caan luummögø; puta ka tïïc nee thur kare.»