Read anuak Edhikiel 19 Bible Online

Edhikiel 19 - anuak bible

Edhikiel 19

¹'Ba Wuuö Jwøk aköö, ni «Ïïni, wärï ki duut kïmmö kiper kwääri mo Icriel,

²ni kööï, «ni ‹?Meru ee, caal ŋø na bëëde? Meru bee ŋuu mo bëëdö yïthakic ŋuuwe; eno but piny yïthakic ŋuuwe moa näk poot na wøpe, ni eni bëëdö ni pïïdhö ki nyïïe.

³Ni lwør nyaare aciel ni pwöny gø, ni tïme na ŋuu mo teek døc, ni kwany dwaar, ni put tïmö ni cämö ki jiy.

⁴'Ba luumme awïny wïth juurre, ni cekge gø ki buur ni päth yi gø, ni gänge gø ko obïth, ni peege gø Ijep.

⁵« ‹'Ba menni kanya joot gø ni gïna ŋäädhe oränynyö, ni gïna manynye kär thur kare, ena cäŋ lwötö ki nyaare aciel ni pwöny gø, ni tïïc gø na ŋuu mo teek døc.

⁶Ni put tïmö ni cäädhö yïthakic ŋuuwe, kiper eno løny ni teek. Ni kwany dwaar, ni put tïmö ni cämö ki jiy.

⁷Ni tøc kwör gwøk røk moge moa teek, ni raany päänye moge; ni ö jiyi bëët moa en yi ŋööm paac ni lwäcge ki löörö mare.

⁸Køøre wïth juurre gena put öö ki yïth mïëri moa en deŋŋe ni këëtge ki eni. Ni peerge ajääp marge bääte, ni putge gø maa yi buur marge.

⁹Ni gänge gø ko obïth ni kïthge gø yi dhwöŋŋö, ni kïthge gø Babiløn baŋ nyeya, ni kïthge gø øt twöc, ni ö löörö mare ni tïme ni ba wïnyi këët bäät kïte mo Icriel.

¹⁰« ‹'Ba meru na bëëde, bëëdö kaamar omøk mo opiith deŋ naam yi pwöth omøki marï, ni eni bëëdö ni nywøl ki nyïëdi ni bäädi moe olaak jaak kiper pïï na thööthge.

¹¹Ni bäädi moe teek, no orømø ki man tïïi na athøc kwär mo cuumme; ni wïïe opööth maal ki bäät lul mana no odhïŋ, ni put tïmö ni nëënö wøk døc kiper bäädi moe na thööth.

¹²'Ba lweete acööt wøk ki køør wëër, ni leeŋi yïth ŋøøm, ni ö nyïïe ni taali ya jamø man wø ööi ki kur tuul-cäŋ; bat mare na teek døc acööt wøk ni tale ni put waaŋ ki maac.

¹³'Ba ennø, ena piith dïtëën, yi ŋöömö mo otal mo bäŋ pïï yie.

¹⁴'Ba maac aö wøk ki ri bat mare mana pere leth, ni put lwinh jaath ki nyïï gø thöör ki waaŋ, ni put tïmö ni bäŋ bat aciel mo odööŋ mo rømø ki man tïme na athøny kwär mar cuumme.› Manøgø bee luum kïmmö man wø wär na duut kiper kïmmö.»