Read anuak Edhikiel 20 Bible Online

Edhikiel 20 - anuak bible

Edhikiel 20

¹'Ba na tïme na ri bïriet cwiiri mo mäk marwa ki tøŋ, ni nïr dwää abïïc apaar, jø døøk Icriel møøk gena ö kuna pëënyge Wuuö Jwøk, ni pïge piny nyïma.

²Køøre dwør Wuuö Jwøk aput ö bääta, ni kööe,

³ni «Wär dhaanhø, cään jø døøk Icriel ni kööï jïge ni man beeye luumma caan Kwäärö Wuuö Jwøki, ena köö, no ‹?U ööa kuna pëënynyu aani? Ka adïëri møn, aani, a na Kwäärö Wuuö Jwøk, kaawat man bëëda naa kwøw en, a caana gø jïïu, u ba jïëa ki man pëënynyu aani.›

⁴«?Wui, wär dhaanhø, luumge ba ŋøli? Ŋøl luumge ni jäälï geni! Gïïa raac yia ki ge na tïïc kwäcge tïïyï nee ŋäcge;

⁵ni caanï gø jïge ni man beeye luumma caan Kwäärö Wuuö Jwøki, ena köö, ni ‹Dïcäŋa jiera Icriel aana kööŋ jï nyïïkwaac Jeekap ni nyoodha raa jïge Ijep, ni kööa jïge, ni «Aani, aana Wuuö Jwøk, Jwøk maru.»

⁶'Ba dïcäŋa kööŋa nyïmge, beeye kiper nee ge käla wøk ki yi ŋööm Ijep nee cige yi ŋöömma jiera kiperge, ni beeye ŋöömma näk caak ki maar kïc päl yie, na näk beerra eni døc ki ŋøøm møga bëët.

⁷Ni kööa jïge, ni «Ŋati man nø dëëtu wet japa reyø nyïme ni wø wøøre, ni ba tïïyu dëëtu ni ba waany ki kït gïï wø lam mo jø Ijep; kiper bee aani na Wuuö Jwøk, Jwøk maru.»

⁸« ‹'Ba gena tïmö ni marge ageem ki aani ni kweerge ki man cekge ïthge ki luumma. Japa reyø ni wø wøørge kärge wetø, ni kärge kït gïï wø lam mo jø Ijep wiiø. Kanyøgø aana köö ni wëër mara ni wø liel kaamar maac kønynya bäätge nø, nee wëër mara put røm dëëtge dï ŋööm Ijep.

⁹'Ba gïnögø kära tïïö kiper nee nyeŋŋa ba ränynye nyïm wïth juurre moa enge dïge, ni beege wïth juurre moa nyoodha raa jï jø Icriel nyïmge ki køør mana käla jø Icriel wøk ki yi ŋööm Ijep.

¹⁰Kiper manøgønø, gena bwødha wøk ki yi ŋööm Ijep ni kïtha ge dï paap.

¹¹Ni pwönynya geni ki luup 'moa, ni tïïa geni nee ciik 'moa ŋäcge, ni beege gïïa doo cïpö ki kwøw jï ŋato kïth ge bäät tïïc.

¹²Ni pwönynya geni thuwø ki man gwøkge cääŋŋe 'moa mo jwöm, nee bëëtge ni caala ŋïï yïthakicwa ki geni, nee ŋäcge ni bee aani na Wuuö Jwøk na tïïc geni na jiy mo ena kur keerge.

¹³« ‹'Ba jø Icriel gena cäŋ gëëmö ki aani dï paap. Gena kweer ki man cääthge ki køør luup 'moa, ni wecge ciik 'moa, ni beege gïïa doo cïpö ki kwøw jï ŋato kïth ge bäät tïïc, ni ö geni ni putge cääŋŋe 'moa mo jwöm päät døc. Kanyøgø aana köö ni wëër mara kønynya bäätge nee wïthge puta dïïr dï paap.

¹⁴'Ba gïnögø kära tïïö kiper nee nyeŋŋa ba ränynye nyïm wïth juurre moa käla geni wøk ki dïge ni nëënö jïge.

¹⁵Ni cäŋa kööŋ thuwø dï paap, nee ge ba kïtha yi ŋöömma cïba jïge, ni beeye ŋöömma näk caak ki maar kïc päl yie, na näk beerra eni døc ki ŋøøm møga bëët.

¹⁶Kiper ciik 'moa awecge ni kweerge ki man cääthge ki køør luup 'moa, ni päätge cääŋŋe 'moa mo jwöm. Kiper cwïnyge ena køør kït gïï wø lamge.

¹⁷'Ba aani, yia acäŋa warrø ki geni, ni kära geni raanynyø këët wala ki man dïïra wïthge dï paap.

¹⁸'Ba aana köö jï obwöre moge dï paap, ni «Käru cäädhö ki køør luup mo wëëgu wala man gwøgu ciik moge wala man päätu dëëtu ki kït gïï wø lamge.

¹⁹Aani, aana Wuuö Jwøk, Jwøk maru; caathu køør luup 'moa ni caarru wïthu ki ciik 'moa ni kïthu ge bäät tïïc.

²⁰Tïïyu cääŋŋe 'moa mo jwöm ni ena kur keerge, ni tïmge kaamar ŋïï mo ena yïthakiyø, kiper nee ŋäyu ni bee aani na Wuuö Jwøk, Jwøk maru.»

²¹« ‹'Ba obwöre moge gena gëëmö ki aani thuwø. Ge kär cäädhö ki køør luup 'moa, ni kärge wïthge caarø ki man kïthge ciik 'moa bäät tïïc, ni beege gïïa doo cïpö ki kwøw jï ŋato kïth ge bäät tïïc; ni ö geni ni putge cääŋŋe 'moa mo jwöm päät. Kanyøgø aana köö ni wëër mara ni wø liel kaamar maac kønynya bäätge nee wëër mara put røm dëëtge dï paap.

²²'Ba cera ajooa ki man tïïa gïnögø kiper nee nyeŋŋa ba ränynye nyïm wïth juurre moa käla geni wøk ki dïge ni nëënö jïge.

²³'Ba aana cäŋ kööŋ thuwø dï paap ki man keetha geni dï wïth juurre ki yïth mïëri,

²⁴kiper ciik 'moa kärge jïëö; gena kweer ki luup 'moa, ni päätge cääŋŋe 'moa mo jwöm, ni ge bëëdö ni nyeŋge ena køør kït gïïa lam kwäcge.

²⁵'Ba gena wëëga gwøk luup mo ba beyø, ki ciik mo ba cïpi ki kwøw jïge;

²⁶gena tïïa nee tïmge ni ge ba waany ki køør mana ö obwöre moge bëët moa näk kaai ni waaŋge ge ki maac ni ge cïpa ge no olämme. Ni manøgø a wëëga ge ränynyö, kiper nee ŋäcge ni bee aani na Wuuö Jwøk.›

²⁷«Kiper manøgønø, ï na wär dhaanhø, caanï jï jø Icriel ni man beeye luumma caan Kwäärö Wuuö Jwøki, ena köö, ni ‹Jöö maya mana ö kwäyu na päätge aani ki gø ki køør japa reyø na tïïcge dëëra bee en:

²⁸Kanya kïtha ge yi ŋöömö mana kööŋa kipere ni cïba cïbö jïge, thuuri moa bäyö bëët ki jenni bëët moa no onigïït piny aneenge, ni ö geni ni cïpge ko olämme kaace ge bëët, ni wëëkge aani gootø ko olämme moge. Ni öge thuwø ni wääŋge ki gïï wø jïcge ŋwääi ni met kaace, ni kunyge piny ki kwøŋ na muuce.

²⁹Køøre gena pëënynya, ni «?Kar lam man no ogeerø ni ena maal ni cou yie en aŋøøni?» 'Ba nyeŋ kaace këël dïcäŋi cwøl ni Baama.›

³⁰«Kiper manøgønø, caanï jï jø Icriel ni man beeye luumma caan Kwäärö Wuuö Jwøki, ena köö, na ‹?Aŋø, dëëtu tïïyu tïïö ni ba waany kaawat mana tïïc kwäyu, ni dëëtu gathu gadhø ki käp ni nyeŋŋu ena køør kït gïïa wara lamge?

³¹Kany wø cïpu muuce mou, ki kany wø kïthu wäätu yi maac nou waaŋa geni no olämme, u tïïya dëëtu ni ba waany ki kït gïï wø lammu bëët këël dïcäŋi. ?Wui, u na jø Icriel, u jïëa jïëö këët ki man pëënynyu aani? 'Ba ka adïëri møn, kaawat man bëëda naa kwøw en, aani, a na Kwäärö Wuuö Jwøk, a caana gø jïïu, a ba pëënynyu këët.

³²« ‹Uuni, u wø köö, ni «Wa manynya gø nee wa tïmwa ni wa caala wïth juurre møga, ni wa bëëdö kaamar jø bäät piny mo wø lam jenni ki kïte.» 'Ba gïnögø ni caarru enø ba tägi na bäre bäre.

³³'Ba ka adïëri møn, kaawat man bëëda naa kwøw en, aani, a na Kwäärö Wuuö Jwøk, a caana gø jïïu, aani, aano tïmö na nyeya bäätu, ni käära uuni ki teek ni cera yaa rwieø bäätu, ni wëër mara ena bäätu.

³⁴Aani, u duua duuö ki baŋ wïth juurre ni cuuŋa uuni ki yïth mïëri moa näk uuno keethø yïthge ki teek ni cera yaa rwieø bäätu ni wëër mara ena bäätu.

³⁵Aani, u kïtha dïtëën mar wïth juurre, ni puta u jääl kaace ni ø neeta nyeŋŋø.

³⁶Uuni, u jääla jäälö kaawat mana jääla kwäyu dïtëën mar ŋööm Ijep. Luummögø caana aani, a na Kwäärö Wuuö Jwøk.

³⁷Aani, u tïïa tïïö nou pöödhu ki tier athøra mara, ni kïtha uuni yi luumma tuuda ki kwäyu.

³⁸Jiy mo wø tïïö ki raay ki jiy mo wø gëëmö ki aani daa daa buutu. Ge käla wøk yi ŋöömö man ni bëëtge yie en, 'ba ge ba døny yi ŋööm Icriel këët. Køøre nø ŋäyu ŋääö ni bee aani na Wuuö Jwøk.›

³⁹«'Ba kiperu, u na jø dhi øt Icriel, luumma caan Kwäärö Wuuö Jwøki jïïu bee en, ena köö, ni ‹Cou, ni ö ŋati man nø ni tïny kït gïï wø lame! 'Ba ki køør gïïögø, uuni ïthu cegu ciiø na adïëri ki luumma, ni tïme ni nyeŋŋa na en kur keere ba päätu këët ki muuce mou ki kït gïï wø lämmu.

⁴⁰'Ba aani, a na Kwäärö Wuuö Jwøk, a caana gø, ni bäät kïdi mara na en kur keere, ni beeye kïnna bäär mar Icriel, u na jø dhi øt Icriel u bëët, aano tïnynyu bääte kaace yi ŋöömmece, ni jïëa uuni yie. Køøre uuno pëënynya kaace ki muuce mou moa beyø ki japu bëët moa en kur keerge.

⁴¹Uuni, u pänhnha pänhnhö kaamar gïn mo ŋwäänynye met, kanyo duua uuni wøk ki baŋ wïth juurre noo cuuŋa uuni ki yïth mïëri moa näk uuno keethø yïthge; køøre dëëra nyoodha nyoodhø jïïu ni nëënö jï wïth juurre ki man näk maa ena kur keera.

⁴²Køøre nø, ŋäyu ŋääö ni bee aani na Wuuö Jwøk, kanyo duua uuni yi ŋööm Icriel, ni beeye ŋöömma kööŋa kipere ni cïba cïbö jï kwäyu.

⁴³Uuni, wïthu parru parø kaace ki bëëtö maru mana bëëdu ki gø ki japa reyø bëët na raanynyu dëëtu ki ge, ni putu dëëtu jääl ki køør japa reyø bëët na tïïyu.

⁴⁴Kanyøgønø u na jø Icriel oŋäyu ni bee aani na Wuuö Jwøk, kanyo nyoodha bäth ec mara jïïu kiper nyeŋŋa, këël na bëëdu ni uutjïëthe mou reyø nou temma gïï mo reyø.› Luummögø caana Kwäärö Wuuö Jwøki.»

⁴⁵Køøre dwør Wuuö Jwøk aö bääta ni kööe,

⁴⁶ni «Wär dhaanhø, løø nyïmï jï løø tier-piny ni køpï luubö jï jø ŋöömma en jï løø tier-piny ni wø bëëdö na lul.

⁴⁷Caanï jï jø ŋöömma en jï løø tier-piny ni wø bëëdö na lul, ni kööï jïge, ni ‹Wïnynyu dwør Wuuö Jwøk. Man beeye luumma caan Kwäärö Wuuö Jwøki, ena köö, Ni ka adïëri møn, aani, a ena bäät man nyeba pou ki maac, nee jenni mou put maaci thöör bëët, ni beege jenni mou moa thec bëët ki moa no otal. 'Ba maac manøgø obëëdö ni ba løny ki bïp, ni ö jammi bëët moa en yi ŋöömö mar jï løø tier-piny këël jï løø wï-piny ni putge waaŋ ki maac.

⁴⁸Kanyøgønø ojoot jiyi bëët ni bee aani na Wuuö Jwøk na tïïc maac manøgø; 'ba maaøgø oput bëëtö ni ba løny ki bïp.› »

⁴⁹Køøre aana köö, «Wui, Kwäärö Wuuö Jwøk! Geni, ge cäänö kipera ni ge köö, ni ‹?Moøgø paa leere jaak ni car nyenøgø enø?› »