Read anuak Edhikiel 21 Bible Online

Edhikiel 21 - anuak bible

Edhikiel 21

¹Kanyøgø dwør Wuuö Jwøk aö bääta ni kööe,

²ni «Wär dhaanhø, løø nyïmï baŋ Jerucalem ki kwör lam moe. Caan luummi jï ŋööm Icriel niï jääla gø,

³ni kööï ni man beeye luumma caan Wuuö Jwøki, ena köö, ni ‹Aana gootø ki ïïni. Aani opëëllö mara wödha wøk ki yi køp mare ni puta jiy moa bëëtge beyø ki moa bëëtge reyø 'näk.

⁴'Ba jøøa bëëtge beyø ki jøøa bëëtge reyø kiper nee ge nääa, opëëllö mara owödha wøk ki yi køp mare bäät jiy bëët, ki mano tägi ki jï løø tier-piny këël mano këët wï-piny.

⁵Køøre jiy bëët putge ka ŋäc ki man näk mo a na Wuuö Jwøk opëëllö mara yaa wöth wøk ki yi køp mare ni ba cäŋ dwøk yie këët.›

⁶«Kiper manøgønø, ï na wär dhaanhø, guyï nyïmge, ni cwïnyï opädhö ni yiï iï keeyø døc.

⁷'Ba kanyo pëënyge ïïni ni köge, na ‹?Aperŋø ni guyï en?› wärï kööï jïge, na ‹A guyi kaper gïn ni nyään ni ööi en. Eni dïcäŋeca cwïnynyi bëët bwøk, ni ö bäät jiy bëët ni nigelway; jwïëy bëët ööl, ni ö nyeŋ cøŋŋi bëët ni øcge piny kaamar pïï. Ka adïëri møn, cäŋece öö; öö ni ba kääŋi.› Luummögø caana Kwäärö Wuuö Jwøki.»

⁸'Ba dwør Wuuö Jwøk aö bääta ni kööe,

⁹ni «Wär dhaanhø, caan luubö man ni kööï ni luumma caan Kwäärö Wuuö Jwøki bee en, ena köö: «Opëëllö anø paak ni nø thoodhi;

¹⁰ena paak kiper 'näk; ena thooth ni put tïmö ni paŋŋi kaamar agaackøth. «?Aŋø, løny ki man mïn yïthø ka athøc kwär mar dhaanhnha ma Juuda ni näk opëëllö onø männö ki gø?

¹¹«Opëëllö anø jiiŋŋi ni thoodhi, ena jiiŋŋi kiper nee täge ki tïïc; ena paak ni thoodhi, kiper nee cïp cer dïnääy.

¹²Wui, ï na wär dhaanhø, jwöŋï ni gööï ko oduuru, kiper opëëllö manøgø jääla jiy 'moa, ki jø kööre mo Icriel. Jiy moøgø yaa cïp dho opëëllö, ge ki jiya bëët. Kiper manøgønø, jwöŋï niï pööta köörï.

¹³«'Ba päärö öö møn na adïëri. ?'Ba ni näk mo opëëllö onø männö ka athøc kwär mar Juuda, løny ki man cäŋ bëëte këët? Luummögø caana aani, a na Kwäärö Wuuö Jwøk.

¹⁴«Kiper manøgønø, ï na wär dhaanhø, caan luup 'moa, ni putï ceŋŋï paŋ. Beerra man ö opëëllö ni nääe ki kwöre ariiø wala adäk. Opëëllö manøgø, ena mar 'näk; eni tïïc kaper 'näk mo dwøŋ, ni put geni rum dïër ki deŋge bäre,

¹⁵kiper nee cwïny jiy put bwøk, ni ö mo thööthi ni thøwge. Opëëllö manøgø atïïa kiper 'näk, ni cïba gø dhøk käälle moge bëët. Wui, eno tïïö ni malli døc kaamar agaackøth, eno paaø ni beth døc kiper 'näk.

¹⁶Wui, opëëllö! Ŋädï ki bäät cwïïï ki bäät caamï, wala kanyo løøï riï yie jaak!

¹⁷Køøre nø, aani thuwø ceŋŋa puta ka paŋ, ni ö wëërri mara ni døø piny. Luummögø caana aani, a na Wuuö Jwøk.»

¹⁸'Ba dwør Wuuö Jwøk aö bääta ni kööe,

¹⁹ni «Wär dhaanhø, tïïï ki uutjïëthe ariiø kiper opëëllö mar nyeny Babiløn kanyo ööe, ni ge käla yi paac aciel. Ni cööthï piny ki nyuudhi yïth agääk jïëthe yi waŋjöö mano gaa Jerucalem.

²⁰Kïth øtjöö aciel ki nyuudhi kiper opëëllö mano ööi ni cøøa Raaba, pääny jø Amön, ni kïthï øtjöö maya ki nyuudhi mo nyootha Juuda ki Jerucalem na näk ogeerø ni teek.

²¹Kiper nyeny Babiløn kanyo ööe, eno cuŋŋi yïth agääk jïëthe moa na ariiø, ni tïïe ki nyuuthe ka athëëre, ni pëëny kït gïï wø lame, ni tïïe ki jap adïëda mo tïïc ka cwïny lääy.

²²'Ba nyuudhi mano päth cer cwïïe otïmö na mar Jerucalem, kiper nee jenni mo thiel kiir ki ge cïp karge, ni cïpe ki dwøl nee jiy 'näk, nee jiy twäätge ri leny, nee jenni mo thiel dhi kiir ki ge cïpge karge, nee kany eth bäät kiir ki yie thørge, nee kwör leny mo tuk pääny ki yie jiiŋge.

²³'Ba nyuudhi manøgø otïmö kaamar gïr tööt ki jï jø Jerucalem na tudö ki luubö ki eni ni kööŋge bääte. 'Ba wïthge opare ki bääyö marge, ni put ge mak ki tøŋ.

²⁴«Kiper manøgønø, luumma caan Kwäärö Wuuö Jwøki bee en, ena köö, ‹Kiper uuni bääyö maru atïïyu nee wïc par ki gø, ki køør mana ö raay mou ni nyoothge rege, ni tïïe mou bëët mo wø tïïyu nyootha raay mou, kiper mana tïïyu gïnögø, u di maaø ki tøŋ.

²⁵« ‹Wui, ï na dïbwödhi mana raac mar Icriel, ni wø tïïö ki gïï mo reyø, ï na caa marï oløny ni öö, ni caa mar ajäla marï mana näk aŋuudi opïï,

²⁶Kwäärö Wuuö Jwøk aköö, na «Abïï nyec man wø meen wïc käl wøk, ni kälï aduda wøk. Jammi ba tïmö këët kaawat mana bëëde dïkwøŋ. Jøøa kwörge therø geno tïŋ maal, ni ö jøøa kwörge døøŋŋø ni dwøk ge piny.

²⁷Pääny ränynyö! Eni ränynyö! Eni raanynya raanynyø! Eni ba døø kare këët këël kanyo ö wänni; 'ba aani, eno cïba cere.» ›

²⁸«'Ba ï na wär dhaanhø, caan gïn ni kööï ni man bee luumma caan Kwäärö Wuuö Jwøki kiper jø Amön ka ajøøŋ mana tïïcge, ena köö, «no ‹Opëëllö anø wöth wøk kiper 'näk, ni bëëdö no othoodhø nee räänye, ni eni malli døc kaamar agaackøth.

²⁹Kiper gïï wø kööu no onyoodhø jïïu, ki gïï wø caru beege luup tööt; 'ba opëëllö ocïp ŋut jø raay ni 'näk geni. Cäŋ maneca apïï; caa mar ajäla mana näk aŋuudi aöö.

³⁰Opëëllö dwøk yi køp. Uuni, uuno jääla yi ŋöömö mana cwääc uuni yie, ni bee kanya nywøl uuni yie.

³¹Gootø käla bäätu, ni ö wëërri mara ni wø liel kaamar maac ni kønynya gø bäätu; aani u cïba ceŋ jiy mo reyø døc mo geno kwänynyö døc ka aranya.

³²Uuno tïmö kaamar jer maac, ni ö remø maru ni øc piny yi ŋöömö maru, ni ba par wïc këët ki uuni; kiper luummögø caana aani, a na Wuuö Jwøk.› »