Read anuak Edhikiel 22 Bible Online

Edhikiel 22 - anuak bible

Edhikiel 22

¹Køøre dwør Wuuö Jwøk aö bääta ni kööe,

²ni «?Wär dhaanhø, luum pääny man ŋølï ŋølø? ?Pääny man ni kuny piny ki rem jiy en, luumme ŋølï ŋølø? Japa näk yia raac ki ge bëët na tïïe caanï jïre nee ŋääe,

³ni caanï gø ni man beeye luumma caan Kwäärö Wuuö Jwøki, ena köö, ‹Wui, ï na pääny man käl ränynyö bäätï keerï en ki køør rem jiy moa kønynyï piny dïërï, ki mana tïïyï riï niï ba waany ki køør kït gïï wø lam moa tïïyï!

⁴Ïïna päth yïth raay ki køør rem jiy moa kønynyï piny, ni tïmï niï ba waany ki kït gïï wø lam moa tïïyï. Nïne mo ränynyö marï alaarï tïïc nee laarge öö; aŋuun cwiic kwøw moï aløny ni öö. Kiper manøgønø, ï tïïa tïïö ni ïïna gïr ajøøŋ jï wïth juurre, ni tïïa ïïni na gïr abuua jï mïëri bëët.

⁵Jiy mo wø en buutï ki moa kwörge bäyö ki ïïni ï buuge buuö. Ïïni, ïïna pääny mo päŋ ki jammi mo reyø ko okiera.

⁶« ‹Raŋï mø, dïbwöthe mo Icriel moø ni moï yøø, man nø bëëdö ni dëëre ee kønyø ki teek mare ki man køny rem jiy piny.

⁷Jiy moï bäŋ wödö mo tïïcge kiper wëëe ki mëëe yi paayø; ge bëëdö ni wëëlle caarge caarø, ni ge tïïö ki gïï mo reyø dëët kïïe ki määr thuunhnhi.

⁸Ïïni, japa na en kur keerge ataagï, ni päätï cääŋŋe 'moa mo jwöm.

⁹Ïïni, da jiy moï ma tööte mo ge bëënna waac nyeŋ kiper køny rem jiy piny; ni da jiy moï thuwø mo ge cämö ko olämme mo wø cïp jï juuga reyø yïth uut lam moa en bäät kïte, ni ge bëëdö ni marge käp.

¹⁰Da jiy moï mo ge buut ki määr wëëkge, ki jiy møøk mo mään makge maa ki teek nee butge ki ge kany wø bëët määnni ni ge ba waany ni kar pïïn piny marge opäŋ.

¹¹Ni ŋat mør kännö ki luk ki cï ŋat atut mare, ni ŋat mør butö ki cï nyaare, ni ŋat mør buti ka nyiwänni kiree mana nywøl wänni.

¹²Ni da jiy moï mo cïpö ki gwel ki piny kiper køny rem jiy piny. Ni ïïni gwel mo wø mac baŋï tïïyï tïïö nee duui jïrï ni da wïthge, ni gwet jø møøk kälï kälö ni marï twëër, niï bëëdö ni wïïï owïl ki aani.› Luummögø caana Kwäärö Wuuö Jwøki.»

¹³Wuuö Jwøk aköö, ni «Aani, cera rwääa rwääö ki maal ni jääla ïïni kiper gwetï moa jootï ki jöör møt, ki mana kønynyï rem jiy piny dï paac.

¹⁴?Aŋø, kanyo jääla ïïni yie, løny ki man magï cwïnyï wala ki man cwiitï ceŋŋï? Luummögø caana aani, a na Wuuö Jwøk, 'ba puta ka tïïc.

¹⁵Aani, u keetha keethø dï wïth juurre ki yïth mïëri; ni ö japa näk ba waany mou ni puta ge ŋuudö.

¹⁶'Ba kanyo bëëdu ni uuno nipäät dï wïth juurre, putu ka ŋäc ni bee aani na Wuuö Jwøk.»

¹⁷Køøre dwør Wuuö Jwøk aö bääta ni kööe,

¹⁸ni «Wär dhaanhø, jø dhi øt Icriel gena tïmö kaamar gïn mo ba kunynyi ki baŋa; geni bëët gena tïmö kaamar nyal man wø ö wøk ki røk nywïëny ki køør man wø leeny geni ki maac. Gena tïmö kaamar nyal mar gwel-bïrö.

¹⁹Kiper manøgønø, man beeye luumma caan Kwäärö Wuuö Jwøki, ena köö, ni ‹Kiper mana tïmu bëët kaamar nyal, aani u cooŋa yi Jerucalem.

²⁰Kaawat man wø ö gwel-bïrö ki nywïëny møøk ma teeŋi wø kïthi ya dhaanhe yi maac ni leenya ge, aani thuwø u cooŋa cooŋø ki wëër mara, ni beeye wëër mara ni wø liel kaamar maac, ni kïtha u dï pääny ni jääla uuni ka ajäla mo caala man wø leeny nywïënyö.

²¹Aani u cooŋa cooŋø ni koodha maa wëër mara bäätu, ni putu leenyø dï pääny.

²²Kaawat man wø leeny gwel-bïrö yi këën thääth, aani u leenya leenyø dï pääny, ni putu gø ŋäc ni bee aani na Wuuö Jwøk na køny wëër mare bäätu.› »

²³Køøre dwør Wuuö Jwøk acäŋ ö bääta ni kööe,

²⁴ni «Wär dhaanhø, caanï jï ŋööm Icriel, ni ‹Ïïna ŋöömö mo kär tïïö ni tøŋ, kiper bäŋ køth mo opädhö bäätï yi cäŋ wëër mara.›

²⁵Dïbwöthe moe moa en yie ge bëëdö kaamar ŋuuwe mo märö bäät lääy mo bakge bagø; jwïëc jiy araanyge ni kälge jammi mo jiy ki gïï møøk mo perge leth. 'Ba ki køør 'näk mana tïïcge, mään mo thööth awëëkge dööŋŋe na määr thuunhnhi.

²⁶Dïlämme moe, ciik 'moa araanyge, ni päätge japa na en kur keerge; gïn mo waany mo ena kur keere ki gïn mo ba waany ba pääŋge. Jiy kärge pwönynyö ki man ŋäcge gïn mo ba waany ki gïn mo waany; ni ge bëëdö ni nyïmge ege løø wøk ki man gwøkge cääŋŋe 'moa mo jwöm, naa bëëdö naa ege päädö yïthakicge.

²⁷Kwääri moe moa en yie, ge bëëdö kaamar orude mo ge baga lääy, ki køør mana bëëtge ni rem jiy kønyge piny, ni jwïëc jiy raanyge raanynyø kiper joot jammi ki jöör møt.

²⁸Nyikuk Jwøk moe, tïïe moøgø ege uumö ki luup tööt mo wø carge no onyoodhø jïge, ka adïëde mo patha karge. Ge köö jaak, ni ‹Luumma caan Wuuö Jwøki bee en,› ni gïnaca kär caan Wuuö Jwøki.

²⁹Jiy moa en yi ŋööm paac, jø møøk caarge caarø ni ge twëëdö; ni ge tïïö ki gïï mo reyø dëët kïïe ki jiy moa can, ni jøøa path moa en dïge caarge caarø ki jöö mo patha kare.

³⁰«'Ba aana määnyö dïge ki dhaanhø mo geer kiir, mo cuŋŋö nyïma kanya no opädhö ri kiir, kiper nee paac ba raanynya; 'ba bäŋ dhaanhø mo yaa joodø.

³¹Kiper manøgønø, wëër mara kønynya bäätge ni puta ge thöör ki wëër mara ni wø liel kaamar maac, ni ö japa tïïcge bëët ni dwøga ge wïthge.» Luummögø caana Kwäärö Wuuö Jwøki.