Read anuak Edhikiel 23 Bible Online

Edhikiel 23 - anuak bible

Edhikiel 23

²ni «Wär dhaanhø, da mään ariiø mo gena nyïïmëëe,

³mo geno tïmö ni gena kääpe Ijep, ni ge bëëdö ni ge gatha dëëtge ki käp ki mana täge ni ge therø. Gena bëëdö ni thurge di maaŋŋø ni ge di gämmö ki mëër yi ŋöömmögø.

⁴'Ba nyïgögø, mana dwøŋ nyeŋŋe cwøl ni Ööla, ni beeye nyeŋ mo nyootha Cameria; ni ö nyeŋ maya ni näk beeye Ööliba, ni beeye nyeŋ mana näk nyootha Jerucalem. 'Ba nyïgögø gena nywøma ni jïta ko obwöre ki geni, ni beege cwøw ki mään.

⁵«'Ba Ööla ena cäŋ bëëtö ni gatha dëëre ki käp kanya nø tïme na cïïa, ni eni bëëdö ni rïïŋö køør omëërri moe, ni beege jø leny mo jø Aciria,

⁶na näk geno ruyö ka abïïe mo kïtge caala kït abïcøle, ni beege kwääri ki dïbwöthe, ni ge bëët geno obwöre mo nëëni ni mïërö, ni gena jø leny mo wø këëdi ki bäät okwëëc lääy.

⁷Nyaanøgø dëëre agadhe ki käp baŋ jøøgø bëët, ni beege jø Aciria moa no ojierø. Ena rïïŋö køør jøøgø bëët ni päät ree ki kït gïï wø lam bëët mo jøøgø.

⁸'Ba eni, bëët käp mare mana tääe kanya bëëde Ijep käre wiiø; ki mana käl thïnhö cwøw bëëdö ni buut ki gø. Ni thure na näk poot cuŋŋö maaŋ cwøwi maaŋŋø, ni cwïny cwøw puta pääŋö ki met ec ki eni.

⁹«Kiper manøgønø, ena cïba ceŋ omëërri moe, ni beege jø Aciria na rïïŋe køørge.

¹⁰Ni ö jøøgø ni pwöthge abïïe wøk dëëre, ni kälge wääte ki nyïïe, ni putge gø 'näk ko opëëllö. Ni put tïmö ni beeye ŋat gïre waac dï mään ki køør ajäla mana pïï dëëre.

¹¹«'Ba coki mo Ööliba gïnögø ajoode, 'ba ena cäŋ rïïŋö køør käp ni kaala coki, ni tïm gath dëëlli mare no okaadhø ki mar coki.

¹²Eni ena rïïŋö døc køør jø Aciria, ni beege kwääri ki dïbwöthe, jøøa bëëdö na jø leny mo dëëtge ege runynyö ka abïïe mo beyø, ni ge këëdi ka bäät okwëëc lääy, ni geno obwöre mo nëëni ni mïërö.

¹³'Ba nyaanøgø ajooda ni dëëre ee päädö døc; ge ki coki bëët gena cør jöö aciel.

¹⁴«'Ba nyaanøgø käp mare aput kaath. 'Ba ena jïtö ri kiir ki kït jiy mo ogöörö ki booya mo kwaar, ni beege kït jø Babiløn;

¹⁵ni geno göörö ni pëëtge otöönynyö ki kaae, ni wïthge omëënnö ka abïïe mo wø meen wïc; 'ba ge bëët ge nëëni kaamar kwääc leny mo Babiløn moa nywøl yi Kaldia.

¹⁶'Ba kanya jooti ya nyaanøgø jaak, ena put tïmö ni cwïnye pärö kiperge, ni put jääk baŋ jø Babiløn yi ŋööm Kaldia ki jiy.

¹⁷Køøre jø Babiløn gena put ö baŋ gø nee butge ki gø ki mëër, ni putge gø päät ki käp marge. 'Ba kanya nø lønyge ki niine ki gø, nyaanøgø nyïme aput løø wøk ki geni ni männe ki geni.

¹⁸'Ba kanya bëët nyaanøgø ni käp mare ee täärö nyeŋ jiy ni dëëre ee wii wøk, nyïma aløøa wøk ki gø ki gootø kaawat mana løøa nyïma wøk ki coki.

¹⁹'Ba ena cäŋ bëëtö ni käp mare poot kaadhe kaadhø jaak, ni paaya wïïe ki nïr thïnhö moe kanya bëëde ni käbö Ijep.

²⁰Ena bëëdö ni rïïŋö køør omëërri moe kaace, jøøa näk jap gääbö moge caala mo arëëni, ni pïï mo wø ö wøk ki yïthge caala mo okwëëc lääy.

²¹'Ba ï na Ööliba, ïïna bëëdö ni cwïnyï pärö køør käp mana tïïyï niï thiinh, ni beeye kanya bëët jø Ijepi ni ge maaŋŋa thurï kanya poot thurï ni poot cuŋŋö.

²²«Kiper manøgønø, ï na Ööliba, luubö mana caan Kwäärö Wuuö Jwøki kiperï bee en, ena köö, ni ‹Aani, omëërri moï tïïa tïïö nee öge maal bäätï, jøøa løøï nyïmï wøk ki geni na männï ki geni; geni, ge tïïa tïïö nee öge maal bäätï ki kwöra enge yïthge bëët,

²³ni beege jø Babiløn, ki jø Kaldia bëët, ki jø Peköt, ki jø Cöa, ki jø Køa, ni jø Aciria bëët ena dïge, ni beege obwöre moa dëëtge mïërö, ni ge bëët gena kwääri ki dïbwöthe, ki dïbwöthe mo jïëth okwëënyi, ki jiy ma kwääri mo døøŋŋø, ni ge bëët ge cäädhi ka bäät okwëëc lääy.

²⁴Jøøgø ge ööa baŋï ni ge käädö ki jap leny, ki jïëth okwëënyi, ki jø møøk mo cwaga geni; geni, ge ööa baŋï kuna tukge ïïni ki deŋŋï bäre, ni ge käädö ki kööt leny mo wø gëëŋ dëël ki ge ki mo wø rïëp wïc. Aani ï cïba ceŋge niï jäälge, ni ö geni ni jäälge ïïni ki køør kööŋŋö marge.

²⁵Aani cwïnya këënynyö ki ïïni, ni tïïa geni nee tïïge dëërï ki gïn mo raac ni geno wëër døc. Geni umï ki ïdhi moï ŋulge wøk, ni ö jiyï moo bøth ni nääi ko opëëllö. Geni wäätï ki nyïïï kälge kälö, ni ö moo bøth rege ni waaŋi ki maac ni puti ya maaci thöör.

²⁶Geni thuwø abïïgï pwöthge wøk dëërï, ni ö jap mïërö moa en dëërï ni kälge ge.

²⁷Kanyøgønø käp mana wara gathï dëërï ki gø na tägi yi ŋööm Ijep ŋøla ŋølø. Waŋï paanya paanyø bäät japøgø ni ba parï wïïï këët ki Ijep.›

²⁸«Kiper man beeye luumma caan Kwäärö Wuuö Jwøki kiperï, ena köö, na ‹A ena bäät man cïba ïïni ceŋ jøøa mänï ki ge na løøï nyïmï wøk ki geni na männï ki geni.

²⁹'Ba geno tïïö dëërï ki gïn mo raac ni marge männö ki ïïni, ni kälge jammi moï bëët na öölï kiperge, ni putge ïïni wec niï bëëdö ka dëërï ni bäŋ abïï; ni ö dëërï man wø käbï ki gø ni dööŋe wøk, ni tïm käpi marï man wø gathï dëërï ki gø ni ŋäc.

³⁰Japøgø di tïïö dëërï, kiper ïïna käbö ki wïth juurre, ni päätï riï keerï ki kït gïï wø lamge.

³¹Ïïna tïmö niï cäädhi ka jöör coku; kiper manøgønø, athöönh gïna leth mare owëëga ïïni nee maathï.›

³²«'Ba man beeye luumma caan Kwäärö Wuuö Jwøki kiperï, ena köö, «na ‹Athöönh gïna leth mar coku maathï maadhø, ni beeye athöödhi mo dwøŋ mo yie laac; jiy oŋeethi bäätï ni buuge ïïni, kiper mana näk mo opääŋö døc.

³³Ïïno meer døc ki gïna en yie ni kïmmï, kiper beeye athöödhi mo kännö ki lwär mo dwøŋ ki ränynyö, ni beeye athöödhi mar coku ma Cameria.

³⁴'Ba athöönhnhögø omaathï ni taalï tiere; ni putï gø 'näk ni keethe na thäŋi, ni ö thunhnhi moï ni putï ge teellø; kiper luummögø caana aani, a na Kwäärö Wuuö Jwøk.›

³⁵«Kiper manøgønø, man beeye luumma caan Kwäärö Wuuö Jwøki kiperï, ena köö, ni ‹Kiper mana wïl wïïï ki aani ni leeŋï aani ŋääï, ajäla mar bëët käp marï mana gathï dëërï ki gø jwørï jwørø.› »

³⁶Køøre Wuuö Jwøk aköö jïra, ni «?Wär dhaanhø, Ööla ko Ööliba luumge ba ŋølï? Japa reyø na tïïcge caanï jïge nee ŋäcge.

³⁷Kiper gena bëëdö na jø luuï ni kunyge piny ki rem jiy. Gena buut ki kït gïï wø lamge, ni ŋarge nyïïge ni cïpge ge no olämme, ni kïthge ge yi maac ni tïme na cam kiperge, ni beege obwöre moa nywølge jïra.

³⁸Geni thuwø, gïna cäŋge tïïyö dëëra ni poot na yïth nïrögø, kar bëëtö mara na en kur keere, ki cääŋŋe 'moa mo jwöm apäätge.

³⁹Kiper kany wø ŋarge nyïïge nee cïpge no olämme jï kït gïï wø lamge, dïcäŋöca thuwø ge puta døny kar bëëtö mara na en kur keere kuna päätge gø; manøgø beeye gïn wø tïïcge yi øtø mara.

⁴⁰«Geni thuwø ge jääga baŋ jiy mo kwörge bäyö nee öge. 'Ba kanyo ö jøøgø, dëëtge putge ka lwøk kiper jøøgø, ni rwøthge nyeŋge, ni kïthge dëëtge ki jap mïërö.

⁴¹Ni pïge piny bäät køøm mo mïërö mo nyïme okïthö ki tharabëëta mo bääte ocïpö ki gïn wø jïye ŋwääi ni met, ki maar wïïr, ni beege japa näk 'moa.

⁴²'Ba geni dwør lwaak bëëdö ni lweelli deŋge, ni dïmäthe ege kälö ki kuna näk da paap, ki jøøa näk bäŋ kwörge, ni kïthge ceŋ mään moøgø ko oguudi, ni kïthge wïth mään ka adude mo mïërö.

⁴³Køøre aana cäänö kiper dhaaŋŋa näk onø raany bëët käpi ni kööa, ni ‹Jøøgø ge butö ki kääbi manøgø kawaane ni näk mo eni poot bëëdö ka bëëtö manaca.›

⁴⁴Køøre gena put butö ki gø møn kaawat man wø butö ki dhaagø ma kääbi. Køøre gena put butö ki mään moøgø bëët na kääpe yøø, ni beege Ööla ko Ööliba.

⁴⁵'Ba jiy mo bëëtö marge tiir, mään moøgø jäälge jäälö kaawat man wø jääl dhaagø mo okännö ki luk, ki dhaagø mo okuny piny ki rem dhaanhø, kiper gena mään ma jø luuy, mo geno kuny piny ki rem jiy.

⁴⁶«'Ba man beeye luumma caan Kwäärö Wuuö Jwøki, ena köö: Jääŋŋu lwaak baŋge ni wëëgu ge lwär ni twierru ge.

⁴⁷Geno këër lwaaki ki kïte, ni ŋarge geni ko opëëlle moge, ni ö wäätge ki nyïïge ni puti ya lwaaki 'näk ni put uudi moge waaŋ ki maac.

⁴⁸Kanyøgønø bëët käp oraanynya yi ŋööm paayø, ni ö määnni bëët ni kwänyge ki køør gïno tägi dëëtu, ni tïme ni bäŋ dhaagø mo ŋwaal bëëtö maru këët.

⁴⁹Uuni gïï mo leth ojwørru ki køør käp maru ki wödö man wø wøørru kït gïï wø lam. Køøre nø, ŋäyu ŋääö ni bee aani na Kwäärö Wuuö Jwøk.»