Read anuak Edhikiel 24 Bible Online

Edhikiel 24 - anuak bible

Edhikiel 24

¹'Ba kanya tïme na ri bïŋweer cwiiri mo mäk marwa ki tøŋ, ni nïr dwää apaar, apaar, dwør Wuuö Jwøk aö bääta ni kööe,

²ni «Wär dhaanhø, göör nïne mo dïcäŋi piny, ni beeye cäŋ man kiree. Kiper dïcäŋ man kiree nyeny Babiløn Jerucalem aciel dïër.

³Ïïni, caan leer man jï jøø na jø ageem yøø, ni kööï jïge ni man beeye luumma caan Kwäärö Wuuö Jwøki, ena köö, «ni ‹Thäänh dhiithi maac; thäänh maac ni kunynyï yie ki pïï.

⁴Kïth yie ki rïŋö mo othemø, ni beege thäk rïŋ bëët moa perge leth, rïŋ ääm ki rïŋ bat. Ni ö cuu mo rïŋ moøgø ni kïthï gø yie thuwø;

⁵ni rïŋö manøgø beeye rïŋö mana met mar diel. Kïth tier dhiithi ki jenni mo thööth, nee laar twaaø, nee cuu moa en yie ciekge.›

⁶«Kiper man beeye luumma caan Kwäärö Wuuö Jwøki, ena köö, « ‹Wui, otïmö ni leth jï pääny man wø kuny piny ki rem jiy, ki jï dhiithi mana näk gïïa reyø na en dëëre poot kär ö wøk. Rïŋö mana no othemø na en yie kwäny wøk na aciel aciel, ni bäŋgø mo jier.

⁷Kiper rem jiy moa køny piny dï pääny poot nutö dïëre, ni ee køny bäät kïte jaak, ni käre koony yïth ŋøøm nee uum ŋøømmi.

⁸'Ba aani, remø mare awiia wøk thuwø bäät kïte, ni put bëëte kaace ni kär uumö, naa coola kwör ki køør wëër mara.›

⁹«Kiper manøgønø, man beeye luumma caan Kwäärö Wuuö Jwøki, ena köö, « ‹Wui, otïmö ni leth jï pääny man wø kuny piny ki rem jiy! Eni ruba rubö ki maac mo päl.

¹⁰Rup maac ki jenni mo thööth nee liele, ni wëëgï rïŋö twaaø na kare ni kunyï cwege wøk, ni ö cuuwi ni waaŋge.

¹¹Køøre dhiithi wär thäänh maac ni yie bäŋ gïrpiny, ni weyï gø nee lëënhnhe këël kanyo tïm dëëre ni wärri ni kwaar. Kanyøgønø gïïa näk ba tøŋ na en yie oleeny, ni ö gïïa reyø na en yie ni waaŋ ge.

¹²'Ba eni, aana ööle ki tïïc jaak, ni gïïa reyø na en yie kär ö wøk. Ennø, kïtha yi maac.

¹³« ‹'Ba ennø, ï na Jerucalem, japa reyø na tïïyï, ïïna tïïcge niï ba waany. Kiper ïïna päänynya ki man penya ïïni, 'ba ï kär tïmö niï waany yïth japa reyø na enï yïthge. 'Ba ïïni, ï ba tïmö niï tøŋ këët këël kanyo ö wëërri mara noo røm riï.

¹⁴A na Wuuö Jwøk, luubö mara anø caana. Cäŋ man tïïa yie aløny ni öö. Aani cwïnya ba wara, ni bäŋ bäth ec mo nyoodha jïrï, wala ki man päth cwïnya ki gïrï. Aani ï jääla jäälö ki køør uutjïëthe moï ki japa reyø na tïïyï.› Luummögø caana aani, a na Kwäärö Wuuö Jwøk.»

¹⁵'Ba dwør Wuuö Jwøk aö bääta ni kööe,

¹⁶ni «Wär dhaanhø, ŋat wø neetï ni wø pär cwïnyï kipere daa daa buutï ni cwöba riï; 'ba ïïni, kärï kïmmö, ni ba jwöŋï, ni ba øc pï nyeŋŋï piny.

¹⁷Ŋurï ki yi cwïnyï ni ba jwöŋï kiper ŋata thøw. Abïï wïc marï bëëde ni iï meen wïïï, ni kïthï war moï tietï; kär täärnyïmï uumï, ni ba cämï ki caammi mo wø jiiŋŋi kiper jø wø kïmmi.»

¹⁸Kanyøgø luummögø acaana jï jiy ka amöölla, 'ba na tïme na abøøya cïïa aput thøø. 'Ba na tïme na amöölla maya gïna kööm aani ki gø aputa tïïc keda mana caani jïra.

¹⁹Køøre jiy aana pëënyge, na «?Aŋø, tiet japi ni tïïyï ii ba caanï jïwa?»

²⁰Kanyøgø aana köö jïge, ni «Dwør Wuuö Jwøk aö bääta ni kööe,

²¹ni ‹Caanï jï jø Icriel ni man beeye luumma caan Kwäärö Wuuö Jwøki, ena köö, Ni aani øt lam mara na en kur keere wëëga päät; ni beeye kanya teek ni wø ŋwöu kipere, nou töödö ni yïthu met ki man raŋŋu gø, ni cwïnynyu ee tïïö ni met. Ni ö wäätu ki nyïïu moa wiiu ŋäthu Jerucalem ni 'näk geni ko opëëllö.

²²Køøre nø, tïïyu tïïö kaamana tïïa gø; uuno tïmö ni täärnyïmmu ba loopu, nou ba cämö ki caammi mo wø jiiŋŋi kiper jø wø kïmmi.

²³Nou bëëdö na abïïk wïc mou you meen wïthu, ni war mou ena tietu. Nou ba kïmmi wala u jwöŋö, 'ba uuno bëëdö ni uuno dwaalø, nou ŋurö yïthakiyu keeru.

²⁴'Ba Edhikiel otïmö na nyuudhi kiperu; gïna tïïe otïïyu kaawat mana tïïc gø. 'Ba kanyo täk gïnögø oŋäyu ni bee aani na Kwäärö Wuuö Jwøk.›

²⁵«'Ba ï na wär dhaanhø en, kanyo raanynya øt lam marge na teek, ni beeye kar met ec marge ka ajiem marge, ni wø raŋge ni yïthge met ni cwïnyge pärö kipere, ni raanynya wäätge ki nyïïge thuwø,

²⁶dïcäŋöca ki røk jiy moo bwøk kiper ränynyö manøgø, dhaanhø mør oööi ni waac gø jïrï.

²⁷'Ba dïcäŋöca dhiï ojap ni cäänï ki eni, ni ba bëëdï këët niï lïŋö. Kanyøgønø ïïno tïmö ni ïïna nyuudhi kiperge, ni ö geni ni ŋäcge gø ni bee aani na Wuuö Jwøk.»