Read anuak Edhikiel 25 Bible Online

Edhikiel 25 - anuak bible

Edhikiel 25

¹'Ba dwør Wuuö Jwøk aö bääta ni kööe,

²«Wär Dhaanhø, løø nyïmï po jø Amön ni caanï luum ajäla man jïge,

³ni kööï jïge, ni ‹Wïnynyu dwør Kwäärö Wuuö Jwøk.› Man beeye luumma caan Kwäärö Wuuö Jwøk, ena köö, ni ‹Kiper mana ŋeethu bäät øt lam mara na en kur keere kanya päädi, ki mana ŋeethu bäät ŋööm Icriel na dööŋe no oränynyö, ki mana ŋeethu bäät mäk mar jø Juuda kanya mak geni ki tøŋ,

⁴kiper manøgønø, ka adïëri møn, aani, u cïba ceŋ jiy mo wø bëëdö kur tuul-cäŋ ni tïmu ni uuna moge. Geno tïïö dïïu ki kwör bëëte moge, ni cwöthge oduŋkaare moge yïthakiyu, ni camge nyïïjenni mou, ni maathge caak mou.

⁵Aani, pääny Raaba otïïa na kar kwaath mar athïrööle, ni tïïa ŋööm jø Amön na kar jwöm jï dïëk. Køøre putu ka ŋäc ni bee aani na Wuuö Jwøk.›

⁶Kiper man beeye luumma caan Kwäärö Wuuö Jwøk, ena köö, ni ‹Kiper na paŋŋu ceŋŋu ni päru ki tietu ni yïthu omïnnö nou taaga ŋööm Icriel ki cwïnynyu bäre,

⁷kiper manøgønø, ka adïëri møn, aani, cera otïŋa maal bäätu ni jääla uuni. Ni cïba uuni jï wïth juurre ni twierge uuni. Aani, u raanynya raanynyø dï wïth juurre, ni puta wïthu dïïr dïge. U puta ka raanynyø møn, ni putu gø ŋäc ni bee aani na Wuuö Jwøk.› »

⁸«Man beeye luumma caan Kwäärö Wuuö Jwøki, ena köö, ni ‹Kiper mana kö jø Möapi ki jø Cëër, ni «Neenï, dhi øt Juuda atïmö kaamar wïth juurre møøk jaak,»

⁹kiper manøgønø, ka adïëri møn, aani, nyeŋ keee mo jø Möap owëëga dööŋŋe ni ŋaam, ni beeye ki mano täge ki päänye moa en keew, ni beege Bëëth-Jecimöt ki Baal-Miyön ki Kiriatayim na näk ajiem ŋöömmögø.

¹⁰Aani jø Möap ki jø Amön ge cïba ceŋ jø kur tuul-cäŋ ni tïmge na moge, ni raanynya geni, ni put tïmö ni wïc ba par ki jø Amön ki yïthakic wïth juurre.

¹¹Aani, ajäla okïtha bäät jø Möap; køøre putge ka ŋäc ni bee aani na Wuuö Jwøk.› »

¹²«Man beeye luumma caan Kwäärö Wuuö Jwøki, ena köö, ni ‹Kiper mana ö jø Ëdömmi na tïïge ki gïn mo raac dëër dhi øt Juuda ki køør män marge na dwøŋ, ni tïm gïnögø na bääyö bäätge,›

¹³Kwäärö Wuuö Jwøk luumma caane kiperge bee en, ena köö, ni ‹Aani cera tïŋa maal bäät ŋööm Ëdöm ni jääla gø, ni nääa jiy moe ki lääc paac moe, ni wëëga gø ränynyö. Geni, ge di nääö ko opëëllö, ni beeye ki mano täge ki pääny Tëman këël mano këët pääny Didan.

¹⁴Kwör coola coolø dëët jø Ëdöm ki ri jiya ma jø Icriel, ni tïïcge gïnögø dëët jø Ëdöm ki køør wëër mara ki gootø mara. Køøre nø, putge ka ŋäc ni manøgø bee cool kwör mara. Luummögø caana aani, a na Kwäärö Wuuö Jwøk.› »

¹⁵«Man beeye luumma caan Kwäärö Wuuö Jwøki, ena köö, ni ‹Kiper mana ö jø Pilitinni na tïïge ki gïn mo raac ki køør ataa marge na dwøŋ, ni cätge ki yïth cwïnyge ki man raanyge Juuda ki køør män marge mana käl ya acääŋŋe,›

¹⁶kiper manøgønø, Kwäärö Wuuö Jwøk aköö, ni ‹Ka adïëri møn, aani, a ena bäät man tïŋa cera maal bäät jø Pilitin ki man jääla geni, ni ö jø Kelita ni raanynya geni, ni raanynya thäkge moo dööŋ deŋ naama dwøŋ.

¹⁷Aani, kwör coola coolø dëëtge, ni jääla geni ki køør wëër mara ni wø liel kaamar maac. 'Ba kanyo coola kwör dëëtge, oputge ŋäc ni bee aani na Wuuö Jwøk.› »