Read anuak Edhikiel 26 Bible Online

Edhikiel 26 - anuak bible

Edhikiel 26

¹'Ba kanya tïm cwiic mäk marwa ki tøŋ na apaar kurciel, ni nïr dwääy aciel, dwør Wuuö Jwøk aö bääta ni kööe,

²«Wär Dhaanhø, pääny Tayar aŋeethø bäät Jerucalem ni kööe, ni ‹Dhøk kiir mo wø duny wïth juurre yi Jerucalem ki yïthge atoor piny, ni dööŋge ni ŋaam jïra. Ennø, ena ränynyö, 'ba aani, a kwär nø.›

³Kiper manøgønø, Kwäärö Wuuö Jwøk aköö, ni ‹Ï na pääny Tayar en, aani, ï jääla jäälö. Kaawat man wø kän naama dwøŋŋi ka athaga mo dwøŋ, aani, a kännö ki wïth juurre mo thööth ni tukge ïïni.

⁴Geni kiiri mo Tayar oraanyge, ni nyaage kwör koor moe piny moa no ogeerø ni teek. Aani, ŋøøm moe ojwiea, ni dööŋe na kïdi jaak.

⁵Ni dööŋ kare dï naama dwøŋ na kar määc ka ajääpi; kiper luummögø anø caana. Eno tïmö ni beeye kany twier wïth juurre. Luummögø caana aani, a na Kwäärö Wuuö Jwøk.

⁶Jic Tayar moa en mïëri moa en wøk di nääö ko opëëllö; køøre nø, putge ka ŋäc ni bee aani na Wuuö Jwøk.›

⁷«Kiper man beeye luumma caan Kwäärö Wuuö Jwøki, ena köö, ni ‹Aani, Nabukedenecör nyeny Babiløn na näk nyeny nyeye, käla kälö ki wï-piny, ni käädö ko okwëënyi, ki jïëth okwëëc leny, ki jø wø këëdi ki bäät okwëënyi, ki jø leny mo thööth nee öge kuna raanyge Tayar.

⁸Ï na pääny Tayar, mïëri moï moa en wøk oraanynye ko opëëllö. Deŋŋï othøre ki ŋøøm, ni tïïe ki kwör leny mo tuk pääny ki yie, ni tïŋ kwöt leny mare maal bäätï ni raany ïïni.

⁹Eni jenni mo wø thiel kiir ki gø ogøø røk kiiri, ni ö kwör gwøk røk moï ni toor geni piny ki jap leny moe.

¹⁰'Ba kiper okwëënyi moe na thööth, tør tietge uuno rïëpge piny. Ni ö kiiri moï ni tïmge ni kwanynyi ki dööt tiet okwëëc leny, ki jap leny, ki jïëth okwëëc leny kanyo duny Nabukedenecörri yi kiir. Eno tïmö kaawat man wø ö jø lenynyi wø dønyge yi kiir mo bëëdö no opädhö.

¹¹Okiei mo okwëënyi moe uutjïëthe moï bëët onyørge. Jiy moï onääe ko opëëllö, ni ö kïte moa no otieŋø na no ocwöth piny na gïï lam ni päthge piny yïth ŋøøm.

¹²Jø leny jap kwär moï ki jap gath moï otwierge, ni ö kiiri moï ni toorge geni piny, ni raanyge uudi moï moa beyø, ni ö kïte ki jenni ki ŋøøm ni putge gø leeŋ yi naama dwøŋ.

¹³Dudi moï moa wara wär tïïa tïïö nee cuŋge, ni ö dööt thøme moï ni ba wïnynyi këët.

¹⁴Ïïni, ï tïïa tïïö kaamar kïdi ma caanynya, ni putï tïmö na kar määc ka ajääpi. Ni ba geer ïïni këët na bäre bäre; kiper luummögø anø caana, a na Wuuö Jwøk.› Luummögø caana Kwäärö Wuuö Jwøk.

¹⁵«Man beeye luumma caan Kwäärö Wuuö Jwøk jï pääny Tayar, ena köö: Mïëri moa en bäät naama dwøŋ, dëëtge otïmö ni kwanynyi ki lwär ki dwør pädhö marï kanyo tïm jøøa näk dëëtge da ŋwiili ni cooyø ki 'näk mano tägi iï.

¹⁶Køøre kwääri moa en bäät naama dwøŋ geno ö piny ki bäät wäle moge, ni kälge abïïk kwär moge wøk, ni ö abïïe moge moa no okwøø ni mïërö ni göönyge ge wøk. Ni ö lwärri ni boony geni kaamar abïï, ni pïge piny yïth ŋøøm, ni bëëtge ni dëëtge kwanynyi ni yïthge othäŋŋö ki gïna tägö dëërï.

¹⁷Køøre geno kïmmi kiperï ni köge ki ïïni, « ‹Wui, aŋø, päänya bëëdö ni ŋäc ki jiye mo wø tïïö bäät naama dwøŋ, ni bëëdö ni jïre da teek bäät naama dwøŋ ki jiy moe, ni jøw bëët mo wø bëëdö kaace lwäär ki gø, oränynyö nidïï!

¹⁸'Ba ennø, jø wø bëëdö bäät naama dwøŋ, dëëtge otïmö ni kwanynyi ki dïcäŋ pädhö marï, ni ö jø wø bëëdö mïëri moa en deŋ naama dwøŋ ni thäŋ yïthge ki ränynyö marï.›

¹⁹«Kiper man beeye luumma caan Kwäärö Wuuö Jwøki, ena köö, ni ‹Aani, ï tïïa tïïö na pääny mo bäŋ gïrpiny yie, ni tïmï kaamar pääny mo ba beet. Aani, naam kööla bäätï ni mwøny ïïni,

²⁰ni kïtha ïïni piny baŋ jøøa en kar bëët jwïëc jøøa no othøw, ni bee baŋ jøøa thøw cøøn, ni tïïa kar bëëtö marï ni ena tiet ŋøøm, kaamar mïëri moa no oränynyö cøøn, ni kuutu na aciel kar bëët jwïëc jøøgø, ni ba cäŋï duuö niï bëëdï kar bëët jwïëc jiy moa kwøw.

²¹Aano kän bäätï ki gïn mo leth døc, ni ö ïïni ni ba bëëdï këët. Ïïno manynyï, ni ba joot ïïni këët na bäre bäre.› Luummögø caana Kwäärö Wuuö Jwøki.»