Read anuak Edhikiel 28 Bible Online

Edhikiel 28 - anuak bible

Edhikiel 28

¹'Ba dwør Wuuö Jwøk aö bääta ni kööe,

²«Wär dhaanhø, caanï jï nyeny Tayar ni kööï ni luumma caan Kwäärö Wuuö Jwøki bee en, ena köö, «ni ‹Kiper mana näk miï töödö ki cwïnyï, ïïna cäänö kiper dëërï, ni kööï, ni «Aana Jwøk, aana nø pï piny bäät wälu mar Jwøk dï naama dwøŋ.» 'Ba ïïni, ïïna dhaanhø, ï patha Jwøk, këël na cädï ki cwïnyï ni wïïï leer kaamar Jwøk.

³Ïïni wïïï leer møn niï kaala Daniel, ni bäŋ luubö mo tiere okanø ki ïïni.

⁴Ki køør leec wïc marï ki ŋäc tiet jammi, ïïna jïtö ki jap kwärö kiper dëërï, ni ö warkey ki gwet-bïrö ni cooŋï ge yi øt kän marï.

⁵Ki køør mana bëëdï ni waŋï riek døc ki gath, jap kwärö moï athöönhnhö, ni ö atöörri ni døøŋŋe cwïnyï kiper jap kwärö moï.

⁶Kiper manøgønø, man beeye luumma caana kiperï, a na Kwäärö Wuuö Jwøk, aana köö: ni Kiper mana cädï ni wïïï leer kaamar Jwøk,

⁷jiy mo path wëëga ööny maal bäätï, ni beege jøøa no ogäy døc dï wïth juurre; ge ööa baŋï no opëëlle moge ege wöth wøk, ni raanyge mïërö marï ki leec wïc marï, ni putge ajiem marï päät.

⁸Geni, ge öö ni leeŋge ïïni kar bëët jwïëc jiy moa no othøw, ni thøwï ki thøø mo raac dï naama dwøŋ.

⁹?Løny ki man kööï këët, ni «Aana Jwøk», nyïm jiy moo 'näk ïïni? Ïïni, ï tïmö ni ïïna dhaanhø ceŋ jiy moo 'näk ïïni, niï patha Jwøk.

¹⁰Ïïni, ï thøw ceŋ jøøa path ki thøø mo caala thøw jiy moa näk kär daŋø. Luummögø caana aani, a na Wuuö Jwøk.› »

¹¹'Ba dwør Wuuö Jwøk aö bääta ni kööe,

¹²«Wär dhaanhø, wärï ki duut kïmmö mo cäänö kaper nyeny Tayar, ni kööï jïgø, ni man beeye luumma caan Kwäärö Wuuö Jwøk kiperï, ena köö, «ni ‹Ïïna ŋïï mar bëënynyö mo othur kare, ni wïïï leer døc niï mïërö døc.

¹³Ïïna bëëdö yi Ëden, ni bee ya ajïniina mar Jwøk, ni bëëdï ni ïïno ŋwaŋŋø ki nyeŋ kïte ma teeŋi mo mïërö, ni beege mo kwaar kaamar dha adhieŋ, ki mo piilli kaamar warkey, ki mo mar, ki mo caala okwëër, ki mo ŋwaŋŋi, ki mo tøŋ kede wïlli, ki mo ränni, ki mo caala kït dïmuuy, ki mo caala keenh-orwëëdhö. 'Ba nyeŋ kïte moøgø, gïï wø maai piny ki ge bëëdö no otïïö ki warkey, ni ge jiiŋŋi ka dïcäŋa cwääc ïïni.

¹⁴Ïïno røønyø na nyïïatwiel maal man wø cwøl ni kirubël; niï yaa cïp kaagø na ŋat koor. Ïïni, ï ena bäät kïnna en kur keere na näk mar Jwøk, niï cäädhï ka bäät kïte mo bëëdö kaamar maac.

¹⁵Ki mana täge ki dïcäŋa cwääc ïïni, ï bëëdö ni bäŋ gïn jøøŋŋi ri bëëtö marï; 'ba køøre, ïïna bääyö.

¹⁶Ki køør mana tïm jap gath moï ni thööth, cwïnyï atïmö ni päŋ ka ageem, ni tïmï niï bääö. Kiper manøgønø, ïïna wëëga päät, ni käla ïïni wøk ki bäät Kïn Jwøk. Wui, ï na nyïïatwiel ma kirubël ni wø kurö, ïïna wëëga ränynyö yïthakic kïte moa näk caala maac.

¹⁷Ïïna tïmö niï töödö ki cwïnyï ki køør mïërö marï, ni wëëgï leec wïc marï ränynyö ki køør beer marï. Kiper manøgønø, ïïna leeŋa piny yïth ŋøøm; ni wëëga ïïni cïp nyïm nyeye niï raŋge.

¹⁸Ki køør japa reyø na tïïyï, ki gath mana tïïyï ki jöö mo määnö, karï na en kur keere awëëgï ränynyö. Kiper manøgønø, maac wëëga ööny wøk ki baŋï, ni ö maaci manøgø ni put ïïni waaŋ na bäre, ni puta ïïni tïïc na bur bäät ŋøøm nyïm jiy bëët mo wø neet ïïni.

¹⁹Ni ö wïth juurre bëët moa ŋäc ïïni ni thäŋ yïthge ki gïrï, ni put gïï mo lethi pïï bäätï, ni ö ïïni ni ba bëëdï këët.› »

²⁰Køøre dwør Wuuö Jwøk aö bääta ni kööe,

²¹«Wär dhaanhø, løø nyïmï baŋ pääny Caydan, ni cäännï gø niï jääla gø,

²²ni kööï ni man beeye luumma caan Kwäärö Wuuö Jwøk, ena köö, « ‹Wui, ï na Caydan, ï wëëga ajäla ennø, naa jiem ki køørï, nee ŋäc jiyi moï ni bee aani na Wuuö Jwøk, kanyo jääla ïïni, noo nyoodha ajiem mara na en kur keere iï.

²³Aani, täw mo leth jääŋŋa jääŋŋö bäätï, ni wëëga remø kwödö ki nyeŋ jïëthe moï. Jiy moï geno näk ko opëëllö ni bëëtge no opäänhnhö dïërï. Køøre nø, oŋäcge ni bee aani na Wuuö Jwøk.

²⁴« ‹Kanyøgønø ki røk wïth juurre moa en deŋ Icriel, otïmö ni bäŋ jiy këët mo ogäy mo ge bëëdö kaamar oŋöön ko otwel mo cööba jø Icriel. Køøre putge ka ŋäc ni bee aani na Kwäärö Wuuö Jwøk.›

²⁵«'Ba man beeye luumma caan Kwäärö Wuuö Jwøki, ena köö, ni ‹Kanyo cuuŋa jø Icriel ki dï wïth juurre moa näk geno keethø yïthge, ajiem mara nyoodha nyoodhø dïge ni nëënö jï wïth juurre. Køøre geno bëëdö yi ŋöömö marge mana cïba jï dhaanhnha ma Jeekap.

²⁶Geni, ge bëëdö ni geno gwøø kaace, ni gëëtge ki uudi ni pïïthge ki jer omøki. Geni, ge bëëdö ni geno gwøø kanyo jääla jiy moa en deŋge ni wø cäänö ki gïï mo reyø dëëtge. Køøre nø putge ka ŋäc ni bee aani na Wuuö Jwøk, Jwøk marge.› »