Read anuak Edhikiel 29 Bible Online

Edhikiel 29 - anuak bible

Edhikiel 29

¹'Ba kanya tïm cwiic mäk marwa ki tøŋ na apaar, ni nïr dwää apaar, apaar kurriiø, dwør Wuuö Jwøk aö bääta ni kööe,

²ni «Wär dhaanhø, løø nyïmï baŋ Peerø nyeny Ijep, ni caanï luum ajäla man jïre ki jø Ijep bëët.

³Caanï jïre ni kööï, ni man bee luumma caan Kwäärö Wuuö Jwøk, ena köö, « ‹Ka adïëri møn, ï na Peerø nyeny Ijep, ï jääla jäälö; ï ni bëëdö kaamar lääna dwøŋ, ni ïïno but piny yïthakic nyeŋ näm moï, ni kööï, ni «Naam Nail bee mara, ni eni tïïa kaper dëëra.»

⁴'Ba aani, ï gäna gänö ko obïïdhi ki dhiï, ni ö rec nämmi moï ni muna ge dëërï, ni tuuda ïïni wøk ki yïth näm moï ki rec moï bëët moa no onimun dëërï.

⁵Ïïni ki rec näm moï bëët, uuno weta kany mo otal, ni päthu yi pwöla mo leer, ni bäŋ ŋat cooŋ uuni wala koonya uuni. Uuno tïïa na cam jï lääc paap ki wec maal bëët.

⁶Køøre jiy bëët mo wø bëëdö yi Ijep oputge ŋäc ni bee aani na Wuuö Jwøk. Kiper ï na Ijep, ïïna bëëdö kaamar athøny abaarø man wø ö jø Icrielli wø piemge dëëtge ki gø.

⁷'Ba kanyo makge ïïni ki ceŋge, ï puta toor, ni cööbï göökge, ni kany wø piemge dëëtge ki ïïni, ï puta toor, ni ö pëëtge ni putge rege jak.›

⁸«Kiper manøgønø, Kwäärö Wuuö Jwøk aköö, no ‹Opëëllö mara okäla bäätï, ni nääa jiy moï ki lääy moge bëët.

⁹Ijep odööŋ ni bäŋ gïrpiny yie. Køøre nø, oputge ŋäc ni bee aani na Wuuö Jwøk. « ‹'Ba kiper mana kööï, ni «Naam Nail bee mara, ni eni tïïya aani,»

¹⁰kiper manøgønø, ï na Peerø, ïïno jääla ki näm moï, ni raanynya ŋööm Ijep ni put dööŋŋö ni bäŋ gïrpiny yie, ni beeye ki mano täge ki Migdöl këël Acwan, ni pööth keew ki ŋööm Kuuc.

¹¹Bäŋ dhaanhø wala lääy mo ŋutö ki yie. Ni put tïmö ni bäŋ ŋat bëëdö yie ki cwiiri ma pïëraŋween.

¹²Aani, ŋööm Ijep tïïa tïïö nee dööŋe ni bäŋ gïrpiny yie yïthakic mïëri moa no oränynyö; ni ö päänye moe ni putge dööŋŋe no oränynyö ki cwiiri ma pïëraŋween yïthakic päänye moa no oniruuth piny cøøn. Ni puta jø Ijep keethø yïthakic wïth juurre ki yïth mïëri.›

¹³«'Ba luumma caan Kwäärö Wuuö Jwøki bee en, ena köö, ni ‹Noo tïme na aŋuun cwiiri moøgø na pïëraŋween yøø, jø Ijep duua duuö ki dï wïth juurre kwöra keetha ge yïthge.

¹⁴Geni, ge duua wøk ki yi bëët laŋ ni kïtha ge yi ŋööm Ijep mana cwøl ni Patröc, ni beeye ŋöömma beet kwäcge. 'Ba buc nyec marge odwøk piny kaagø.

¹⁵Eno tïmö ni ena piny ki buc nyeye, ni put tïmö ni ba løny jïre këët ki man tïŋ ree maal bäät wïth juurre. Eni eno tïïa ni jääk nee wïth juurre ba kääre këët.

¹⁶Ijep ba tïmö këët na kany ŋääth jø Icrielli, 'ba jø Icriel wïthge oparge ki bääyö marge mana wara ŋääthge Ijep. Ni putge gø ŋäc ni bee aani na Kwäärö Wuuö Jwøk.› »

¹⁷'Ba kanya tïm cwiic mäk marwa ki tøŋ na pïërariiø ka abïriiø, ni dwääy mana dïkwøŋ aciel, dwør Wuuö Jwøk aö bääta ni kööe, ni

¹⁸«Wär dhaanhø, Nabukedenecör nyeny Babiløn jø leny moe atïïe ni teek ki man tukge pääny Tayar. Ŋati man nø wïïe ki gööge anipwøth. 'Ba eni ki jø leny moe bäŋ gïn mo ege joodø ki køør gïna tïïe nee pääny Tayar raanynye.

¹⁹Kiper manøgønø, gïna caan Kwäärö Wuuö Jwøki bee en, ena köö, ni ‹Nyeny Ijep cïba cer Nabukedenecör nyeny Babiløn, ni ö eni ni käl jap kwär moe, ni twier jape; ni beeye jap wø cool jï jø leny moe.

²⁰Ŋööm Ijep cïba cïbö jïre na gät tïïc mare, kiper eni ki jiye gena tïïö kipera. Manøgø caana aani, a na Kwäärö Wuuö Jwøk.

²¹'Ba noo tïme na dïcäŋeca, teek mar jø Icriel duua duuö, ni jaba dhiï yïthakicge, ï na Edhikiel; køøre nø, putge ka ŋäc ni bee aani na Wuuö Jwøk.› »