Read anuak Edhikiel 32 Bible Online

Edhikiel 32 - anuak bible

Edhikiel 32

¹'Ba kanya tïm cwiic mäk marwa ki tøŋ na apaar kurriiø, ni nïr dwää apaar kurriiø aciel, dwør Wuuö Jwøk aö bääta ni kööe,

²«Wär dhaanhø, wärï ki duut kïmmö kiper Peerø nyeny Ijep ni kööï jïre, «ni ‹Ïïni, dëërï apäärï ki ŋuu mo teek yïthakic wïth juurre, 'ba ïïni, ï caala lääna dwøŋ na en yi naama dwøŋ, niï bëëdö niï jaalla riï yïth nyeŋ näm moï, ni duupï pïï ki tietï, ni put tïmö no odhöönh.›

³«'Ba man beeye luumma caan Kwäärö Wuuö Jwøki, ena köö, «ni ‹Lwaak mo päl jääŋŋa baŋï, ni makge ïïni ka ajääp mara, ni tuutge ïïni wøk.

⁴Ïïno leeŋa wøk bäät ŋøøm, ni weta ïïni yi pwöla mo leer. Wec maal bëët ki lääc paap moa no owär cööra baŋï niï camge, ni jäŋge ki ïïni.

⁵Rïŋ dëërï kera bäät kïte, ni pääŋa yïth agäp-kïte ki rïŋ moï mo odööŋ.

⁶ŋøøm wëëga mäthö ki rem dëërï mano øc piny, këël mano këët røk kïte. Ni ö aleye ni päŋge ki rïŋ dëërï.

⁷'Ba kanyo raanynya ïïni, maal puta ka rïëp, ni tïm ceerri ni cøl. Cäŋ ogëëŋa ki pøøl, ni ö dwääyi ni ba cïpe ki tar.

⁸Gïïa en maal bëët ni wø cïpi ki tar tïïa tïïö ni cøl bäätï, ni ö muudhö ni kïtha gø bäät ŋöömö marï. Luummögø caana aani, a na Kwäärö Wuuö Jwøk.

⁹Cwïny jiy mo thööth owëëga pädhö kanyo ö ränynyö marï noo wïnye jï wïth juurre, këël mïëri moa näk kuyï.

¹⁰Jiy mo thööth geno wëëga bwøk ki gïno tägi dëërï, ni ö nyeye moge ni lwäcge kiper gïïo ö bäätï kanyo tuuŋŋa opëëllö mara nyïmge. 'Ba yi cäŋ mano pädhï yie, ŋati man nø dëëre otïmö ni kwanynyi, ni ö ŋati man nø ni kïmme kiper jwïëye.›

¹¹«Kiper Kwäärö Wuuö Jwøk luumma caane bee en, ena köö, «no ‹Opëëllö mar nyeny Babiløn öö ni jääl ïïni.

¹²Aani, lwaae moï owëëga 'näk ko opëëllö mo jø leny moa teek, ni beege jøøa no ogäy døc røk wïth juurre bëët. Geni, atöör mar Ijep oraanyge, ni ö lwaae moe bëët ni dïïr wïthge.

¹³Lääc paac moe bëët ni wø bëëdö buut pïï moa thööth, ge nääa nääö, ni put tïmö ni bäŋ tier dhaanhø mo duupa pïïögø wala tier lää paac.

¹⁴Køøre nø, pïïe tïïa tïïö ni tøŋ, ni tïïa nyeŋ näm moe ni kwödö kaamar maar nyïïjenni. Luummögø caana aani, a na Kwäärö Wuuö Jwøk.

¹⁵'Ba kanyo tïïa Ijep ni bäŋ gïrpiny yie, ni jwiea gïïa en yie na bäre, ni nääa jø wø bëëdö yie bëët, putge ka ŋäc ni bee aani na Wuuö Jwøk.›

¹⁶«Manøgø beeye duut kïmmö mano jwøk Ijep ki gø. Nyïïakuue mo wïth juurre, duut manøgø owärge kiper Ijep ki lwaae moe.» Luummögø caana Kwäärö Wuuö Jwøk.

¹⁷'Ba kanya tïm cwiic mäk marwa ki tøŋ na apaar kurriiø, ni nïr dwääy apaar kurbïïc, dwør Wuuö Jwøk aö bääta ni kööe,

¹⁸«Wär dhaanhø, jwöŋï kiper lwaa Ijep, ni caanï gø jïre ki man näk mo eni cøøa piny tiet ŋøøm, ni beeye eni ki jic wïth juurre moa teek, ni beeye baŋ jøøa en kar bëët jwïëc jøøa no othøw.

¹⁹Caanï jïge ni kööï, na ‹?Aŋø, u beyø døc nou kaala jø møga? 'Ba ennø, u cøøa piny ni butu piny tiet ŋøøm yïthakic jøøa näk kär daŋø.›

²⁰Geni, geno päth piny yïthakic jøøa 'näk ko opëëllö. Opëëllö anø jiiŋŋi; tuudu eni wøk ki lwaae moe bëët.

²¹'Ba dïbwöthe moa teek na en kar bëët jwïëc jøøa no othøw, geno cäänö kiper Ijep ki jøøa wara køny gø, ni köge, ni ‹Gena ö piny nee butge piny yïthakic jøøa näk kär daŋø, ni beege jøøa 'näk ko opëëllö.›

²²«Nyeny Aciria ki jø leny moe, ge ena kaace, ni bwörö mare ociel bwörri mo lwaae moe, ni beege jøøa 'näk ko opëëllö bëët.

²³Bwör moge ena piny kuya, ni bwör mo jø leny moe rege ciel deŋ bwörö mare. Jøøa wara tïïc mïëri ni lwäär gena thøw, gena 'näk ko opëëllö.

²⁴«Nyeny Ilam ena kaace, ni bwör mo lwaae moe rege ciel deŋ bwörö mare. Geni bëët gena thøw, ni ge 'näk ko opëëllö. Jøøa wara tïïc mïëri ni lwäär, gena ci tiet ŋøøm ni ge kär daŋø. Geni, lään wïc marge arøm dëëtge, ge ki jøøa no onø ci kar bëët jwïëc jiy moa no othøw.

²⁵Eni ki lwaae moe bëët, gena tïmmi ki kar niine yïthakic jøøa no onääö, ni ö bwörri mo lwaae moe ni cielge bwörö mare dïër. Geni bëët ge 'näk ko opëëllö, ni gena jiy mo ge kär daŋø. Geni na tïïc mïëri ni lwäär, lään wïc marge arøm dëëtge, ni cige piny baŋ jøøa en kar bëët jwïëc jiy moa no othøw. Gena but piny yïthakic jøøa no onääö.

²⁶«Nyeny Möcak ki nyeny Tubal ge ena kaace thuwø, ni bwör moge ociel bwörri mo lwaae moge dïër. Geni bëët, ge na näk kär daŋø, ge 'näk ko opëëllö kiper mana bëëtge ni mïëri ege tïïö ni lwäär.

²⁷Geni, ge ba kuuti ki jø leny moa näk kär daŋø na näk ge koony ka jap leny moge, ni beege jøøa koony ni geno thäänhö ko opëëlle moge. 'Ba ajäla mana pïï dëëtge akëët yïth cuu moge, këël na kwøŋge bëëte ni mïëri ege tïïö ni lwäär.

²⁸«Wui, Peerø, ïïni thuwø, ïïno tøyi, ni butï piny yïthakic jøøa näk kär daŋø, ni beege jøøa 'näk ko opëëllö.

²⁹«Ëdöm ki nyeye moe ki jø kööre moe, ge ena kaace. Teek marge aränynyö, ni putge but piny ki jøøa 'näk ko opëëllö na aciel. Gena but piny yïthakic jøøa näk kär daŋø, ni beege jøøa näk onø ci kar bëët jwïëc jøøa no othøw.

³⁰«Kwääri bëët mo wø bëëdö jï løø wï-piny, ki jø Caydan bëët, ge ena kaace. Gena ci piny baŋ jøøa no othøw ni wïthge olääö, ni beege jøøa wara tïïc mïëri ni lwäär ki teek marge. Gena but piny ni ge kär daŋø, ge ki jøøa no onääö ko opëëllö, ni lään wïc marge orøm dëëtge na aciel ki jøøa näk onø ci kar bëët jwïëc jøøa no othøw.

³¹«Peerø ki jø leny moe bëët kanyo neenge jøøgø, geno put jïtö ki cøm cwïny kiper lwaae moe bëët na näk onääö ko opëëllö. Luummögø caana aani, a na Kwäärö Wuuö Jwøk.

³²Këël na bëëde ni lwäär mo dwøŋ yaa kïth bäät jøøa kwøw ki køøre, eni na Peerø en ki lwaae moe ge puta but piny yïthakic jøøa näk kär daŋø, ni bee baŋ jøøa 'näk ko opëëllö.» Luummögø caana Kwäärö Wuuö Jwøk.