Read anuak Edhikiel 33 Bible Online

Edhikiel 33 - anuak bible

Edhikiel 33

¹'Ba dwør Wuuö Jwøk aö bääta ni kööe,

²«Wär dhaanhø, caanï jï wäät pou, ni Wuuö Jwøk aköö, ni ‹Kanyo wëëga opëëllö ööny yi ŋöömö maru, jiy moa en yi ŋööm pou ge jëëtö ki dhaanhø aciel dïge ni tïïcge gø na ŋat koor geni.

³'Ba ööny tøŋ yi ŋööm paac ojoot ŋatøgø, ni ö eni ni put tuuŋ kooth ni köömma jiy.

⁴'Ba ŋato wïny dwør tuuŋ ni bëëde ni bäŋ gïn mo lääŋŋe kiper gø, ni näk mo opëëllö ööa bääte ni raany jwïëy moe, remø mare tïmö ni ena bääte keere.

⁵Eni kiper mana wïny dwør tuuŋ ni bëëde ni bäŋ gïn mo lääŋŋe kiper gø, remø mare tïmö ni ena bääte keere. 'Ba doo na dwør tuuŋ ee wïnynyö ni reŋe, jwïëye dee piemø.

⁶'Ba ni näk mo ŋat koor manøgø opëëllö joode joodø ni öö, ni wec tuuŋ ki kooth ki man kööm jiy, ni öö opëëllö ni 'näge ki dhaanhø røk jøøgø, ŋatøca othøw yïth raay moe. 'Ba aani, rem ŋatøgø pëënynya pëënynyö bäät ŋat koor manøgø.›

⁷«'Ba ennø, ï na wär dhaanhø, ïïna tïïa na ŋat koor bäät jø Icriel. Kiper manøgønø, wïny luup moi ni cara ii, ni köömmï jø Icriel ki ge.

⁸Ni näk mo aano köö jï ŋat raay, ni ‹Wui ï na ŋat raay, ï thøw møn,› ni kärï ci baŋe kuna köömmï gø nee uutjïëthe moe wiie, ŋat raay manøgø thøw yïth raay moe, 'ba aani remø mare pëënynya pëënynyö bäätï.

⁹'Ba ni näk mo ŋat raay köömmï köömmö ki man wec uutjïëthe moe, ni kweere ki man tïïc gø, eni thøw yïth raay moe, 'ba ïïni, ï dööŋ wøk ra ajäla manøgø.

¹⁰«'Ba ennø, ï na wär dhaanhø, caanï jï jø Icriel ni man beeye luum wø caannu, u köö, ni ‹Japa reyø na tïïcwa, ki raay mowa, atïmö na tëër bäätwa, ni ränywa ki køørge. ?Waano kwøwa nidïï këët nø?›

¹¹Caanï jïge, ni Kwäärö Wuuö Jwøk aköö, ni ‹Kaawat man bëëda naa kwøw en, a na Kwäärö Wuuö Jwøk, cwïnya ba mïnni ki thøø mar ŋat raay, 'ba mana beer, beeye ki man løk cwïnye yïth raay moe ni kwøe. Løgu cwïnynyu! Løgu cwïnynyu ki yïth uutjïëthe mou na reyø! ?Aŋø ni manynyu thøø en, u na jø Icriel?›

¹²«'Ba ï na wär dhaanhø, caanï jï wäät pou, ni kööï, ni ‹Ŋat mo bëëtö mare tiir, kany wø näk mo eno tïïö ki gïï mo reyø, eni ba piem bëëtö mare na tiir; ni ŋat mo bëëtö mare raac, kany wø näk mo cwïnye ee løø, eni ba wëëk bëëtö mare na raac pädhö. Ŋat mo bëëtö mare tiir, ni näk mo tïïö ki raay, ba løny ki man bëëde ni kwøw kiper bëëtö mare mana dïkwøŋ na tiir.

¹³Ni näk mo aano köö jï ŋat mo bëëtö mare tiir, ni «Ï bëëdö niï kwøw møn,» ni ö ŋatøca ni put dëëre ŋääth ki køør bëëtö mare na tiir, ni tïïe ki raay, japa beyø bëët na tïïe, bäŋgø mo wïc di parø ki gø; eni thøw yïth raay moe na tïïe.

¹⁴'Ba ni näk mo aano köö jï ŋat mo bëëtö mare raac, ni «Ï thøw møn,» ni ö ŋatøca ni løk cwïnye yïth raay moe, ni tïme ni tïïya gïn ma adïëri ki gïn mo thïïŋ,

¹⁵ni dwøk gïn mo ee kälö na dïgïti baŋ wati, ni dwøk gïn mo ee kwalø baŋ wati, ni caath køør ciik 'moa ni wø cïp kwøw, ni ba tïïö ki gïn mo raac, eni bëëdö ni kwøw møn; eni ba thøw.

¹⁶Raay moa tïïe bëët bäŋgø mo wïc di parø ki gø mo eni di jäälö kipere. Kiper ena tïïö ki gïn ma adïëri ki gïn mo thïïŋ; eni bëëdö ni kwøw møn.

¹⁷« ‹'Ba wäät pou gena köö, ni «Uutjïëthe mo tïï Kwäärö Wuuö Jwøki ki ge ii ba thïïŋ.» 'Ba beeye uutjïëthe moge na näk ba thïïŋ.

¹⁸Ni näk ŋat mo bëëtö mare tiir, bëëtö mare na tiir wiie wiiø ni tïïe ki raay, eni thøw yïth raaye.

¹⁹'Ba ni näk ŋat mo bëëtö mare raac, bëëtö mare na raac wiie wiiø ni tïme ni tïïya gïn ma adïëri ki gïn mo thïïŋ, eni kwøw ki køør gø.

²⁰Wui, u na jø Icriel, uuna cäŋ köö, ni «Uutjïëthe moi ni tïï Kwäärö Wuuö Jwøki ki ge ii ba thïïŋ.» 'Ba aani, ŋati man nø dëëtu luumme ŋøla ŋølø ki køør uutjïëthe moe.› »

²¹'Ba kanya päŋ cwiic mäk marwa ki tøŋ na apaar kurriiø, ni nïr dwää apaar, abïïc, dhaanhø mør mo opäär wøk ki yi Jerucalem aö baŋa, ni kööe, ni «Pääny anyak!»

²²'Ba ki wäär ni ŋatøgø poot kär öö, cer Wuuö Jwøk aö bääta, ni ö eni ni jap dhaa kanya poot ŋatøgø ni kär öö ka amöölla. Kanyøgø dhaa aput bëëtö ni ree ee jabø, ni put tïmö naa cäänö.

²³Kanyøgø dwør Wuuö Jwøk aö bääta, ni kööe,

²⁴«Wär dhaanhø, jiy moø ni bëëdö ŋööm Icriel kwörö no oränynyö yøø, gena köö, ni ‹Eeberam beeye dhaanhø aciel, 'ba eni ŋöömö alwøre. 'Ba øøni, ø thööth; ennø ŋöömö acïp jïïø na marø møn.›

²⁵Kiper manøgønø, caanï jïge ni man beeye luumma caan Kwäärö Wuuö Jwøki, ena köö, ni ‹Uuna cämö ki rïŋ mo rege da rem, ni wøørru kït gïï wø lammu, ni kunynyu piny ki rem jiy. ?Aŋø, løny ki man lwørru ŋöömö na maru?

²⁶Uuna bëëdö nou ŋäätha opëëlle mou, ni tïïu ki gïï mo reyø, ni ö ŋati man nø dëëtu ni päät cï wati ki man ci baŋ gø na dhaagø. ?Aŋø, løny ki man lwørru ŋöömö na maru?›

²⁷«Caanï jïge ni man beeye luumma caan Kwäärö Wuuö Jwøki, ena köö, ni ‹Kaawat man bëëda naa kwøw en, jiy moa no odööŋ kwöra no oränynyö ge di nääö ko opëëllö, ni ö jiyi moa en ŋää paac ni wëëga ge lääc paap nee ge cam, ni ö jiyi moa en kwör gwøk røk moa teek ki moa en yïth agäp-kïte ni wëëga ge thøø ki täw mo leth.

²⁸Aani, ŋöömö marge wëëga ränynyö ni dööŋe ni bäŋ gïrpiny yie, ni ö teek mar jø wø töödö yie ni cuŋe, ni ö kïte mo Icriel ni dööŋge keerge, ni put tïmö ni bäŋ ŋat mo ŋuti ki bäätge.

²⁹Køøre nø, ŋäcge ŋääö ni bee aani na Wuuö Jwøk, kanyo wëëga ŋöömö marge ränynyö ni dööŋe ni bäŋ gïrpiny yie ki køør japa raac yia ki ge bëët na tïïcge.›

³⁰«'Ba ï na wär dhaanhø, wäät pou mo wø cäänö kiperï deŋ kiir ki dhøk uudi, dhøkge wø løøŋge løøŋŋø ni ge köö, ni ‹Ööu, ni wïnynyø dwøl man ni ööi ki baŋ Wuuö Jwøk en.›

³¹Jiy ööa baŋï kaawat man wø tïïc dhaanhe jaak, ni pïge piny nyïmï kuna wïnyge luup moï kede gena jiya, 'ba ba kïthge bäät tïïc. Geni, ge cara luup mo beyø ki dhøkge, 'ba cwïnyge caara gïï mo reyø ki møt.

³²'Ba ki baŋge, ï caala ŋat mo dwøre met, mo wär ki duut mëër, ni thoom pwöde pwödö ni tøøte tøøtø; kiper luup moï wø wïnyge wïnynyö, 'ba ba kïthge bäät tïïc.

³³'Ba luup moøgø bëët kanyo thurge karge, kiper thura karge møn, ŋäcge ŋääö nø ni da nyikuŋ Jwøk mo bëëdö dïge.»