Read anuak Edhikiel 35 Bible Online

Edhikiel 35 - anuak bible

Edhikiel 35

¹'Ba dwør Wuuö Jwøk aö bääta ni kööe,

²«Wär dhaanhø, løø nyïmï baŋ Kïn Cëër[7] ni caanï luum ajäla man jïre,

³ni kööï ni man beeye luumma caan Kwäärö Wuuö Jwøki, ena köö, «ni ‹Ï na ŋööm Kïn Cëër, ï jääla jäälö. Aani, cera rwiea rwieø bäätï, ni wëëga ï dööŋŋe ni bäŋ gïrpiny yiï ni ïïno ränynyö.

⁴Aani, päänye moï wëëga ränynyö, ni dööŋï ni bäŋ gïrpiny yiï. Køøre nø, ŋäyï ŋääö ni bee aani na Wuuö Jwøk.

⁵« ‹Kiper ïïna bëëdö niï män ki jø Icriel ki kany mo yie bäär, ni wëëgï ge 'näk dïcäŋa enge yïth gïïa leth, ni beeye dïcäŋa jääl geni na aŋuudi.

⁶Kiper manøgønø, kaawat man bëëda naa kwøw en, a na Kwäärö Wuuö Jwøk, a caana gø jïrï, jiy moï køørge oŋwiec ni køny remø marge piny. 'Ba kiper mana bëëdï niï ba män ki køny remø piny, køny remø piny odøø bäätï.

⁷Aani, ŋööm Kïn Cëër wëëga ränynyö ni dööŋe ni bäŋ gïrpiny yie; ni raanynya jiy bëët mo wø ŋuti ki dïëre ki mo wø duui.

⁸Ï na Kïn Cëër, bäätï pääŋa pääŋö ki rïŋ dëët jiy moa no othøw, ni ö jiyi moo 'näk ko opëëllö ni bëëtge ni geno päänhnhö bäät thuuri moï, ki yïth gøli moï, ki yïth aleye moï.

⁹Ïïni, ï tïïa tïïö niï dööŋï ni bäŋ gïrpiny yiï na bäre bäre; ni ö päänye moï ni ba beedi këët. Køøre nø, ŋäyï ŋääö ni bee aani na Wuuö Jwøk.

¹⁰« ‹Kiper ïïna köö, ni «Wïth juurre moi na ariiø ii ki ŋøøm moge, ni beege jø Juuda ki jø Icriel, ge tïmö na 'moa, nee putge dööŋŋö jïwa na thöökwa,» këël na bëëde ni Wuuö Jwøk nut yïthge.

¹¹Kiper manøgønø, kaawat man bëëda naa kwøw en, a na Kwäärö Wuuö Jwøk, a caana gø jïrï, aani, ï jääla jäälö ki køør wëër marï ki keec marï mana nyoothï bäät jiya kiper mana mänï ki geni; ni ööa ni nyoodha dëëra dïge kanyo jääla ïïni.

¹²Køøre nø, ŋäyï ŋääö ni bee aani na Wuuö Jwøk na wïny japa reyø bëët na caanï dëët kïte mo Icriel, na kööï, ni «Gena nø niruuth piny ni ränyge, ni cïp geni jïwa, ni camwa geni na mowa.»

¹³Ïïna cäänö niï töödö bääta ki luup mo thööth, ni wïnynya luup moï.

¹⁴'Ba a na Kwäärö Wuuö Jwøk, luum caana jïrï bee en: Aani, ï wëëga ränynyö, ni ö jø bäät pinynyi bëët ni mïn yïthge ki ränynyö marï.

¹⁵Kiper yiï amïnnö kanya räny ŋööm Icrielli; ni bee tiere noo coola kwör dëërï en. Wui, ï na Kïn Cëër, ï ränynyö, ni bee ïïni ki ŋööm Ëdöm ki kare bäre. Køøre nø, ŋäcge ŋääö ni bee aani na Wuuö Jwøk.›