Read anuak Edhikiel 38 Bible Online

Edhikiel 38 - anuak bible

Edhikiel 38

¹'Ba dwør Wuuö Jwøk aö bääta ni kööe,

²«Wär dhaanhø, løø nyïmï baŋ Göök, ni jäälï gø, ni bee kwäärö mana dwøŋ mar jø Möcak ki Tubal, na en yi ŋööm jø Magöök. Caan luum ajäla man dëëre,

³ni kööï ni man beeye luumma caan Kwäärö Wuuö Jwøki kiperï, ena köö, ni ‹Wui! Göök, ï na kwäärö mana dwøŋ mar jø Möcak ki Tubal, ïïna jääla.

⁴Ïïno dwøga køørï, ni gäna ïïni ko obïth ki tiet nyämme moï, ni tuuda ïïni wøk ki jø leny moï na thööth, ko okwëëc lääy moï, ki jø leny moï mo wø këëdi ki bäät okwëënyi, ni beege jiy bëët moa näk oruyö ki kööt leny, ni beege jø wø këëdi ki kööt leny moa therø ki moa døøŋŋø, ni ge käädö ko opëëlle.

⁵Ni dwala jø Parca bäätï, ge ki jø Kuuc[9] ki jø Put, ni ge käädö ki kööt leny bëët ki cööc nywïëny,

⁶ki Gömer ki jø leny moe bëët, ki Bëëth-Tögarma, paana kare bäär na en jï løø wï-piny, ki jø leny moe bëët, ni beege wïth juurre mo thööth noo dwäti ki ïïni.

⁷« ‹Jek riï nø, ni jiiŋŋï dëërï, ni bee ïïni ki lwaae moï moa näk rege cooŋ buutï, ni bëëdï ni ïïna ŋat kööm geni.

⁸'Ba noo tïme na køør nïne mo thööth, ïïno cwøl baŋ leny. 'Ba noo tïme na yïth cwiiri moo en nyïm, paana näk odøø kare køør leny otugï, ni beege jøøa lem ki røk wïth juurre na duu bäät kïte mo Icriel na bëëdö no oränynyö dïkwøŋ, ni geni bëët ge käl wøk ka røk wïth juurre; 'ba ennø, ge bëët ge bëëdö ni bäŋ gïn lääŋge.

⁹'Ba ïïni ki jø leny moï bëët, ki wïth juurre mo thööth, uuno ö wøk kaamar atuunna, ni tïmu kaamar pöölö, ni putu ŋöömö uum.›

¹⁰«'Ba man bee luumma caan Kwäärö Wuuö Jwøki, ena köö, ‹'Ba noo tïme na dïcäŋeca, da acaara mo öö wïïï, ni cïpï piny ki gïn mo raac,

¹¹ni kööï, na «A cøøa kuna tuua atude moa näk bäŋ kiiri jïge; aani, a cøøa baŋ jøøke ni bëëdö no ojwöm ni bäŋ gïn lääŋge yøøke, ni beege jø wø bëëdö bëët ni bäŋ kiiri jïge, ki dhøk kiiri, ki dïdëëdi.

¹²Aani japge twiera twierø, ni raanynya kwör bëëte moge moa cäŋ geerrø, ni beege ki jiy bëët moa lem ki røk wïth juurre, na näk okwär ki lääc paac ki jammi mo beyø, ni beege jøøa bëëdö yi ŋöömma en dïër.»

¹³'Ba jø Cïïba ki jø Didan, ki dïgäthe mo Tarcëc, ki jiy bëët mo wø bëëdö yïth atude moe, geno köö ki ïïni, na «?Aŋø, ï ööa kuna twierï jøøi møn? ?Lwaae moøgø cooŋï kaper twëër, nee gwet-bïrö ki warkey ki lääc paac ki jammi moa beyø mo thööth nee twierï baŋge?» ›

¹⁴«Kiper manøgønø, ï na wär dhaanhø, caan luummi jï Göök ni kööï ni man beeye luumma caan Kwäärö Wuuö Jwøki, ena köö, ‹?Aŋø, dïcäŋo ö jiya ma jø Icriel noo bëëtge ni bäŋ gïn lääŋge, ba løny man ŋäyï gø?

¹⁵'Ba ïïno ööi ki kar bëëtö marï na en jï løø wï-piny kuya, ïïni ki wïth juurre mo thööth, ni ge bëët ge cäädhi ka bäät okwëëc lääy, ni gena lwaak mo päl, ni gena jø leny mo teek.

¹⁶Niï ööï kaamar pöölö mo uuma piny, nee jiya ma jø Icriel tugï. Wui, Göök, noo tïme na yïth nïne moo ööi, ïïno tïïa nee ŋöömö mara tugï, kiper naa ŋäc wïth juurre kanyo nyoodha bëëtö mara na en kur keere nyïmge ki riï.›

¹⁷«Man beeye luumma caan Kwäärö Wuuö Jwøki, ena köö, na ‹?Aŋø, paa ïïni na cääna kipere yïth nïne moa pöödhö ki dhøk nyïïkuk 'moa mo jø Icriel? Yïth nïreke gena cäänö ki cwiiri mo thööth ki man näk mo ï tïïa tïïö nee ge tugï.

¹⁸'Ba gïno tägi dïcäŋeca bee en: Kanyo ö Gööki noo tuk ŋöömö mar Icriel, aani wëër mara mo lïëth kaamar maac oput ö maal. Luummögø caana aani, a na Kwäärö Wuuö Jwøk.

¹⁹'Ba ki køør këëny cwïny mara ki wëër mara ni wø liel kaamar maac, a caana gø ni dïcäŋögø otïmö ni da dïjäŋ piny mo dwøŋ døc yi ŋööm Icriel.

²⁰'Ba rec mo naama dwøŋ, ki wec maal, ki lääc paap, ki gïïa no ocwääö bëët ni wø muuli ki piny, ki jiy bëët moa en wï ŋöömö, dëëtge otïmö ni kwanynyi nyïma. Kïte rege ojaalge, ni ö aleye ni ŋaarge, ni ö kiiri ni pänhge piny yïth ŋøøm.

²¹Aani opëëllö okäla ni jääla jic Göök bäät kïte 'moa bëët. Luummögø caana aani, a na Kwäärö Wuuö Jwøk. Ŋati man nø wati onääe ko opëëllö mare.

²²Ni jääla geni ki täw mo leth ki køny remø piny. Aani køth mo dwøŋ mo ree da pey mo caala kïte, ki tør mo liel, ojääŋŋa bääte, ni pänh bääte ki jø leny moe ki bäät wïth juurre moa thööth mo wø cäädhi ki eni.

²³Køøre nø, aani, dööŋö mara, ki bëëtö mara na en kur keere, nyoodha nyoodhø jïge, ni tïïa dëëra naa ŋäc nyïm wïth juurre mo thööth. Køøre nø, putge ka ŋäc ni bee aani na Wuuö Jwøk.›