Read anuak Edhikiel 40 Bible Online

Edhikiel 40 - anuak bible

Edhikiel 40

¹'Ba kanya tïm cwiic mäk marwa ki tøŋ na pïërariiø ka abïïc, ni nïr dwääy apaar ri täk cwiir mana nyään, ni beeye kanya päŋ cwiic ränynyö mar Jerucalem na apaar kurŋween, dïcäŋ manøgø kiree cer Wuuö Jwøk aö bääta ni käl aani.

²Ni manøgø tägi na gïn mo nyootha Jwøki jïra ki yi wïïa; ni käl aani ni kïth aani yi ŋööm Icriel, ni cïp aani bäät kïdi mo bäär døc. 'Ba bäät kïdi manøgø ki jï løø tier-piny da kany mo ogeerø mo nëëni kaamar pääny.

³Køøre eni aana kïth kaagø, ni jïta ki dhaanhø mo dëëre nëëni kaamar nywïënyö ma jwïël. 'Ba ŋatøgø cuŋŋö dhi kal ni cere da thøør røm mo tïïc ka waac lïïna, ka athøra mar røm.

⁴Køøre ena köö jïra, ni «Wär dhaanhø, nëënï ki nyeŋŋï, ni wïnyï ki ïdhi moï, ni këëllï wïïï ri jammi bëët moo nyoodha jïrï; kiper beeye tier gïna käl ïïni kany kipere. Jammi bëët moo jootï kany wär caanï jï jø dhi øt Icriel.»

⁵Kanyøgø aana put jïtö ki kal mo deŋ Øt Jwøk ee wïrö bäre. 'Ba athøra mar røm mana en cer ŋatøgø, bär mare bee gööye abïciel, ni gööyö man nø bääte omëënnö ki kany ma kar lweedi aŋween mo cenø. 'Ba eni, odhïŋ kal arøme, ni tïme na gööyö aciel mar athøra, ni røm bär mar maal mar gø, ni tïme na gööyö aciel thuwø mar athøra.

⁶Køøre ena ci øt-dhi-kal mana en jï løø kur tuul-cäŋ, ni edhe ki kwöra näk otïïö na kwör tiel, ni røm päl-ec mar thudhi mar øt-dhi-kal, ni tïme na gööyö aciel mar athøra.

⁷'Ba uudi mo jø koor, yi-øtø man nø bär mare beeye gööyö aciel mar athøra, ni ö dööŋ yie ni näk gööyö aciel thuwø mar athøra, ni ö yïthakic uudi mo dïkuye ni røm ge na gööye abïïc abïïc. 'Ba thudhi mar øt-dhi-kal mano ci yi-øtø mana en nyïm ki yie na dïët ki Øt Jwøk, dööŋ yie bee gööyö aciel mar athøra.

⁸Køøre eni yi-øtø mana en nyïm na dïët ki Øt Jwøk arøme, ni tïme na gööyö aciel mar athøra.

⁹Ni tïm gööye mo dööŋ yie na abära, ni tïm odhïŋ dëër øtø mar dhi øtø na gööye ariiø. 'Ba dhøk mar yi-øtø mana en nyïm dïët ki Øt Jwøk.

¹⁰'Ba øt-dhi-kal mana en jï løø kur tuul-cäŋ da uut koor adäk adäk yie ki yïth deŋŋi moe løøi ki løøi; ni uut koor moøgø rumme moge dïët, ni rumme moa en yïthakicge poot dïët thuwø.

¹¹Køøre eni dhi kal mano døny øt-dhi-kal ki yie arøme, ni tïme na gööye apaar, ni røm dööŋ-ec mar yi øtø, ni tïme na gööye apaar kurdäk.

¹²'Ba buut uut koor da kal mo bär mare gööyö aciel; 'ba uut koor moøgø päl mar yïthge løøi ki løøi bee gööye abïciel.

¹³Køøre eni dööŋ-ec mar øtø mar dhi kal arøme, ni beeye ki mana täge ki wï øt koor këël wï øt koor maya na näk raŋŋa rege ki gø, ni jïte ki rumme ma pïërariiø ka abïïc, ni manøgø beeye dööŋ-ec mana en yïthakic aŋuun øt koor ka aŋuun øt koor maya.

¹⁴Køøre eni yi-kal mana en dïër arøme ki deŋ gø bäre këël mana këët yi-øtø mana en nyïm na dïët ki dï käl, ni tïme na gööye ma pïërabïciel.

¹⁵'Ba ki mana täge ki dhi kal mano dønyø ki yie këël mano pïïe ya aŋuun yi-øtø mana en nyïm bee gööye ma pïërabïïc.

¹⁶Køøre aana jïtö ki dhøk awëërnyeŋŋi mo therø mo okølø dëët uut koor, ki dëër yi-øtø mana en nyïm ki deŋŋe bäre, ni yïthakic øt koor man nø ogöörö ki kït jaath twöö mo otïïö ni cuŋŋö ni mïërö.

¹⁷Køøre eni aana kïth yi-kal mana en wøk. 'Ba kaace, aana jïtö yie ki yïth-uudi ma pïëradäk ki deŋ kal bäre; ni dï kal bäre mana en nyïm dhøk uudi moøgø, othørø ki kïte.

¹⁸'Ba thør mana thør dï kal ki gø, deŋ dhøk kal othørø ni ena jï piny, ni kany wø ci yi-kal mana en dïër, etha maal.

¹⁹Køøre yïthakic dhi øt-dhi-kal mana en wøk ki dhi øt-dhi-kal mana en dïër arøme, ni jïte ki gööye ma dïpa, ni beeye jï løø kur tuul-cäŋ ki jï løø wï-piny.

²⁰Køøre eni øt-dhi-kal mana dïët ki jï løø wï-piny ni wø døny yi-kal mana en wøk, bär mare ki yie, ki dööŋ yie arøme.

²¹'Ba øt-dhi-kal manøgø jïre da uut koor ma adäk adäk, ni beeye løøi ki løøi. Ni yïthakic uut koor moøgø ki yi-øtø mana en nyïm, rumme moge dïët kaamar øt-dhi-kal mana dïkwøŋ; ni bär mare bee gööye ma pïërabïïc, ni ö dööŋ yie ni näk gööye ma pïërariiø ka abïïc.

²²'Ba awëërnyeŋŋi moe, ki yi-øtø mana en nyïm, ki jer twöe moe moa no ogöörö dëëre ni mïërö, rumme moge dïët kaamar øt-dhi-kal mana näk dïët ki jï løø kur tuul-cäŋ, no othørø na kwör tiel ma tëëŋŋe abïriiø, ni ge raŋŋa rege ki yi-øtø mana en nyïm.

²³'Ba kal mana en dïër, dhee dagø mo raŋŋa rege ki øt-dhi-kal mana en jï løø wï-piny kaamar øt-dhi-kal mana en jï løø kur tuul-cäŋ, ni ö eni ni røm yïthakic uut-dhøk-käälle moa näk raŋŋa rege, ni jïte ki gööye ma dïpa.

²⁴Køøre eni aana kïth jï løø tier-piny, ni jïta ki øt-dhi-kal mør kaace; ni ö eni ni røm yïthakic dhøk uudi ki yi-øtø mana en nyïm, ni tïm rumme moge ni dïët ni caala møga.

²⁵'Ba dëër øt-dhi-kal manøgø ki yi-øtø mare mana en nyïm, da awëërnyeŋŋi ki deŋŋe bäre mo caala awëërnyeŋŋi møga; ni bär mare bee gööye ma pïërabïïc, ni ö dööŋ yie ni näk gööye ma pïërariiø ka abïïc.

²⁶'Ba da kwör tiel mo othørø ma tëëŋŋe abïriiø na mo edhø ki bäätge, ni ge raŋŋa rege ki yi-øtø mana en nyïm. Ni da jer twöe mo ogöörö ni mïërö yïthakic uut koor løøi ki løøi.

²⁷'Ba kal mana en dïër, dhee dagø mo ena jï løø tier-piny; ni røm yïthakic dhøgi moøgø ni ee tiirø ki jï løø tier-piny, ni jïte ki gööye ma dïpa.

²⁸Køøre eni aana kïth yi-kal mana en dïër ki dhøk mana en jï løø tier-piny; ni ö eni ni røm øt-dhi-kal mana en jï løø tier-piny, ni tïm rumme moe ni dïët ni caala møga.

²⁹'Ba uut koor moe thuwø, ki yïthakic uut koor moe, ki yi-øtø mare mana en nyïm, rumme moge poot dïët ni caala møga. 'Ba dëër øt-dhi-kal, ki dëër yi-øtø mana en nyïm, da awëërnyeŋŋi ki deŋŋe bäre; ni bär mare bee gööye ma pïërabïïc, ni ö dööŋ yie ni näk gööye ma pïërariiø kurbïïc.

³⁰'Ba da agööla ki deŋŋe manøgø bäre mo bär mare gööye ma pïërariiø kurbïïc, ni ö dööŋ yie ni näk gööye abïïc.

³¹'Ba yi-øtø mare mana en nyïm, dhee raŋŋa rege ki yi-kal mana en wøk, ni jer twöe ogöörö ni mïërö yïthakic uut koor, ni dhee othørø ki kwör tiel ma tëëŋŋe abära.

³²Køøre eni aana kïth yi-kal mana en dïër jï løø kur tuul-cäŋ; ni ö eni ni røm øt-dhi-kal mana en jï løø kur tuul-cäŋ, ni tïm rumme moe ni dïët ni caala møga.

³³'Ba uut koor moe thuwø, ki yïthakic uut koor moe, ki yi-øtø mare mana en nyïm, rumme moge poot dïët ni caala møga. 'Ba dëër øt-dhi-kal, ki dëër yi-øtø mana en nyïm, da awëërnyeŋŋi ki deŋŋe bäre; ni bär mare bee gööye ma pïërabïïc, ni ö dööŋ yie ni näk gööye ma pïërariiø kurbïïc.

³⁴'Ba yi-øtø mare mana en nyïm, dhee raŋŋa rege ki yi-kal mana en wøk, ni jer twöe ogöörö ni mïërö yïthakic uut koor løøi ki løøi, ni dhee othørø ki kwör tiel ma tëëŋŋe abära.

³⁵Køøre eni aana kïth øt-dhi-kal mana en jï løø wï-piny, ni ö eni ni røm gø, ni tïm rumme moe ni dïët ni caala møga.

³⁶'Ba uut koor moe, ki yïthakic uut koor moe, ki yi-øtø mare mana en nyïm, rumme moge poot dïët kaamar møga thuwø. 'Ba dëër øt-dhi-kal da awëërnyeŋŋi ki deŋŋe bäre; ni bär mare bee gööye ma pïërabïïc, ni ö dööŋ yie ni näk gööye ma pïërariiø ka abïïc.

³⁷'Ba yi-øtø mare mana en nyïm, dhee raŋŋa rege ki yi-kal mana en wøk; ni jer twöe ogöörö ni mïërö yïthakic uut koor; ni dhee othørø ki kwör tiel ma tëëŋŋe abära.

³⁸'Ba da øtø mo dhee ena buut yi-øtø mana en nyïm mar øt-dhi-kal mana en dïër, ni beeye kany wø peny olämme yie mo wø waaŋ bäre.

³⁹'Ba yi-øtø mana en nyïm mar øt-dhi-kal da tharabëëte ariiø løøi ki løøi mo wø ŋaal olämme bäätge, ni beege olämme mo wø waaŋ bäre, ko olämme mo wëën raay, ko olämme mo wø wëën bääyö ki ge.

⁴⁰'Ba løø kal wøk mar dhøk mana en jï løø wï-piny, buut kwöra no othørø na kwör tiel mo edhø ki bäätge, da tharabëëte ariiø yie, ni da ariiø møøk thuwø ki løøk maya mo kwöra no othørø na mo tiel.

⁴¹Kiper manøgønø, tharabëëte moa en løøk aciel kwäänge tïmö na aŋween, ni ö moa en løøk maya ni tïmge na aŋween thuwø. 'Ba noo dwali bëët nø, tïmö na tharabëëte abära, ni beege tharabëëte mo ŋaal olämme bäätge.

⁴²'Ba da tharabëëte ma aŋween thuwø mo tïïc ka kïte mo otieŋø, kiper olämme mo wø waaŋ bäre, ni bär mar man nø bee gööyö aciel ki thääŋö, ni ö dööŋ yi man nø ni näk gööyö aciel ki thääŋö; 'ba bär marge mar maal bee gööyö aciel. 'Ba jap wø ŋaal olämme ki ge ocïp bäätge, ni beege olämme mo wø waaŋ bäre, ki teeŋ olämme møga.

⁴³'Ba da gïï mo odølø kaamar obïïdhi mo bär marge rööma kar lweedi aŋween mo cenø, mo ogänö ki deŋ øtø bäre; ni rïŋ mo olämme ocïp bäät tharabëëte.

⁴⁴Køøre eni aana kïth yi-kal mana en dïër. 'Ba kaace yie da uudi ariiø. Aciel ena deŋ øt-dhi-kal mana en jï løø wï-piny, ni dhee ena jï løø tier-piny. 'Ba maya ena deŋ øt-dhi-kal mana en jï løø tier-piny, ni dhee ena jï løø wï-piny.

⁴⁵Køøre ena köö jïra, ni «Øtø mana näk dhee ena jï løø tier-piny beeye kiper dïlämme mo wø raŋ tïïe mo Øt Jwøk.

⁴⁶'Ba øtø mana näk dhee ena jï løø wï-piny beeye kiper dïlämme mo wø raŋ gïn wø cïp olämme bääte. 'Ba dïlämme moøgø beege wäät Dhadök, ni beege jø tuuŋ Libay na näk ojierø keerge ki man cige nyïm Wuuö Jwøk kuna tïnyge gø.»

⁴⁷Køøre eni bär mar yi-kal arøme, ni jïte ki gööye ma dïpa, ni røm dööŋ yi gø, ni tïme thuwø na gööye ma dïpa. 'Ba gïn wø cïp olämme bääte ena nyïm Øt Jwøk.

⁴⁸Køøre eni aana kïth yi-øtø mana en nyïm mar Øt Jwøk, ni røm odhïŋ dhi øtø, ni tïme na gööye abïïc, ni røm dööŋ ec mar gø, ni tïme na gööye apaar kurŋween, ni bär mar dëër dhi øtø mana en nyïm løøi ki løøi beege gööye adäk adäk.

⁴⁹'Ba bär mar yi-øtø mana en nyïm bee gööye ma pïërariiø, ni ö dööŋ yie ni näk gööye apaar kurciel. 'Ba da kwör tiel mo othørø mo etha maal ki ge, ni da gïï ma ariiø mo caala dïkweeye mo ocwöth piny dhee løøi ki løøi.